Anie Edi Jesus Christ?

1. Jesus okodụn̄ ke heaven nte owo eke spirit mbemiso enye ekedide isọn̄. Enye ekedi akpa edibotn̄kpọ Abasi, ndien ke ntre ẹkot enye “akpa edibon” Eyen Abasi. (Colossae 1:15, NW; Ediyarade 3:14) Jesus edi n̄kukụre Eyen oro Abasi okobotde ke idemesie. Jehovah akada Jesus oro okodude uwem mbemiso edide owo nte “etubom anamutom” esie ke ndibot kpukpru n̄kpọ eken ke heaven ye ke isọn̄. (Mme N̄ke 8:22-31, NW; Colossae 1:16, 17) Abasi n̄ko akada enye anam utom nte etubom etịn̄ikọ ke ibuot Esie. Oro edi ntak ẹkotde Jesus “Ikọ.”—John 1:1-3; Ediyarade 19:13.

2. Abasi ama ọnọ Eyen Esie edi isọn̄ ebe ke ndikemen uwem esie nsịn ke idịbi Mary. Ntre Jesus ikenyeneke ete edide owo. Oro edi ntak enye mîkadaha idiọkn̄kpọ m̀mê unana mfọnmma ndomokiet imana. Abasi ọkọdọn̄ Jesus edi isọn̄ ke ntak ita: (1) Ndikpep nnyịn akpanikọ oro aban̄ade Abasi (John 18:37), (2) ndimụm mfọnmma nsọn̄ọnda n̄kama, ọnọde nnyịn uwụtn̄kpọ nditiene (1 Peter 2:21), ye (3) ndiwa uwem esie man anam nnyịn ibọhọ idiọkn̄kpọ ye n̄kpa. Ntak ẹkeyomde emi?—Matthew 20:28.

3. Ke nditre ndinam ewụhọ Abasi, akpa owo oro, Adam, ama anam se Bible okotde “idiọkn̄kpọ.” Ntre Abasi ama ebiere ikpe n̄kpa ọnọ enye. (Genesis 3:17-19) Enye ikanamke n̄kpọ ekekem aba ye mme idaha Abasi, ntre enye ikedịghe aba mfọnmma. Sụn̄sụn̄ enye ama ọkọri ọsọn̄ onyụn̄ akpa. Adam ama ayak idiọkn̄kpọ ọnọ kpukpru nditọ esie. Oro edi ntak nnyịn n̄ko ikọride isọn̄, idọn̄ọ, inyụn̄ ikpan̄a. Didie ke ẹkeme ndinyan̄a ubonowo?—Rome 3:23; 5:12.

4. Jesus ekedi mfọnmma owo ukem nte Adam. Nte ededi, ke mîbietke Adam, Jesus ke mfọnmma usụn̄ ama osụk ibuot ọnọ Abasi idem ke idak n̄kponn̄kan idomo. Enye ke ntre ama ekeme ndiwa mfọnmma uwem owo esie man ekpe utịp idiọkn̄kpọ Adam. Emi edi se Bible etịn̄de aban̄a nte “ufak.” Ntem ẹkeme ndisio nditọ Adam mfep ke ubiomikpe n̄kpa. Kpukpru mbon oro ẹkọn̄de mbuọtidem mmọ ke Jesus ẹkeme ndibọ edifen mme idiọkn̄kpọ mmọ ẹnyụn̄ ẹnyene nsinsi uwem.—1 Timothy 2:5, 6; John 3:16; Rome 5:18, 19.

Utom ukwọrọikọ Jesus ama esịne edinọ ukpep, edinam mme utịben̄kpọ, ye edikam nyak uwem esie nnọ ke ibuot nnyịn

5. Ke ini okodude ke isọn̄ Jesus ama ọkọk mbon udọn̄ọ, ọnọ mbon ọ-biọn̄ udia, onyụn̄ anam oyobio odobo. Enye ama akam anam mme akpan̄kpa ẹset. Ntak emi enye akanamde mme utịben̄kpọ? (1) Enye ama atua mbon oro ẹkebọde ndutụhọ mbọm, ndien enye ama oyom ndin̄wam mmọ. (2) Mme utịben̄kpọ esie ẹkewụt ẹte ke enye ekedi Eyen Abasi. (3) Mmọ ẹwụt se enye edinamde ọnọ okopitem ubonowo ke ini enye akarade isọn̄ nte Edidem.—Matthew 14:14; Mark 2:10-12; John 5:28, 29.

6. Jesus ama akpa ndien Abasi ama anam enye eset ke n̄kpa nte edibotn̄kpọ eke spirit, ndien enye ama afiak ọnyọn̄ heaven. (1 Peter 3:18) Toto ke ini oro, Abasi amanam enye edi Edidem. Ibịghike Jesus eyemen kpukpru idiọkido ye ndutụhọ efep ke isọn̄ emi.—Psalm 37:9-11; Mme N̄ke 2:21, 22.

Copyright © 2006 Watch Tower Bible and Tract Society of Pennsylvania. All rights reserved.