Mme Edinam Ẹmi Abasi Asuade

1. Mme asan̄autom Abasi ẹma se ifọnde. Edi ana mmọ n̄ko ẹkpep ndisua se idiọkde. (Psalm 97:10) Oro ọwọrọ ndifep ndusụk edinam ẹmi Abasi asuade. Nso idi ndusụk edinam oro?

2. Use: Idan̄ mbemiso ndọ, efịbe, edidan̄ ye unam, edidan̄ ye iman, ye idan̄ ukemuduot kpukpru ẹdi ikpọ idiọkn̄kpọ ẹnamde ẹdian Abasi. (Leviticus 18:6; Rome 1:26, 27; 1 Corinth 6:9, 10) Edieke eren ye n̄wan mîdọhọ ndọ edi ẹdụn̄ọ ọtọkiet, mmọ ẹkpenyene ndidianade ntie mîdịghe ntre ẹdian ndọ nte ekemde ye ibet.—Mme Hebrew 13:4.

Abasi asasua ukpammịn, uyịpinọ, mbre mfọniso, ye mme edinam afai

3. Usu Nsu, Mbre Mfọniso, Uyịpinọ: Jehovah Abasi ikemeke ndisu nsu. (Titus 1:2) Ana mme owo oro ẹyomde unyịme esie ẹfep usu nsu. (Mme N̄ke 6:16-19; Colossae 3:9, 10) Kpukpru orụk mbre mfọniso ọyọhọ ye idiọkitọn̄. Ntre mme Christian isinyeneke ebuana ndomokiet ke orụk mbre mfọniso ekededi, utọ nte lottery, mbuba enan̄-mbakara, ye ubre kad ke okụk. (Ephesus 5:3-5) Mme Christian inyụn̄ iyịpke inọ. Mmọ ikohokoi idep mme n̄kpọ oro ẹkeyịpde m̀mê ndimen mme n̄kpọ ye unana edibọ unyịme.—Exodus 20:15; Ephesus 4:28.

4. Ọkpọsọn̄ Iyatesịt, Afai: Iyatesịt oro owo mîkarake ekeme ndida n̄kosịm mme edinam afai. (Genesis 4:5-8) Owo afai ikemeke ndidi ufan Abasi. (Psalm 11:5; Mme N̄ke 22:24, 25) Ọdiọk ndisio usiene m̀mê ndida idiọk nsio usiene idiọk edinam oro mbon en̄wen ẹkemede ndinam nnyịn.—Mme N̄ke 24:29; Rome 12:17-21.

5. Ubreidiọn̄ ye Ubụpekpo: Ndusụk owo ẹsinen̄ede ẹyom un̄wam ẹto odudu mme spirit man ẹdomo ndikọk mme udọn̄ọ. Mbon en̄wen ẹsitọ mme asua mmọ ibọk man ẹnam mmọ ẹdọn̄ọ m̀mê ndikam n̄wot mmọ. Odudu oro ọnọde ofụri edinam ẹmi ibetedem edi Satan. Ntre inaha mme Christian ẹsịn idem ke ekededi ke otu mmọ. (Deuteronomy 18:9-13) Ndisan̄a n̄kpere Jehovah edi mfọnn̄kan ukpeme ndibiọn̄ọ ibọk oro mbon en̄wen ẹkemede nditọ nnyịn.—Mme N̄ke 18:10.

6. Ukpammịn: Idiọkke ndin̄wọn̄ esisịt wine, beer, m̀mê n̄kpọsọn̄ mmịn eken. (Psalm 104:15; 1 Timothy 5:23) Edi ọkpọsọn̄ mbun̄wọn̄i ye ukpammịn ẹkwan̄a ke enyịn Abasi. (1 Corinth 5:11-13; 1 Timothy 3:8) Ebeubọk un̄wọn̄ mmịn ekeme ndibiat nsọn̄idem fo onyụn̄ asuan ubon fo. Enye ekeme n̄ko ndinam fi ọduọ ata usọp usọp odụk mme idomo eken.—Mme N̄ke 23:20, 21, 29-35.

7. Mme owo oro ẹnamde mme n̄kpọ oro Abasi ọdọhọde ke ifọnke “ididaha Obio Ubọn̄ Abasi inyene.” (Galatia 5:19-21) Edieke edide afo emenen̄ede ama Abasi onyụn̄ oyom ndinem enye esịt, afo emekeme ndikịbe mbọhọ mme edinam ẹmi. (1 John 5:3) Kpep ndisua se Abasi ọdọhọde ke ọdiọk. (Rome 12:9) Buana ye mme owo ẹmi ẹnyenede mme ido uten̄e Abasi. (Mme N̄ke 13:20) Mme nsan̄a Christian ẹmi ẹkọride ẹsịm ọyọhọ idaha ẹkeme ndidi ebiet un̄wam otode. (James 5:14) Ke akande kpukpru, beri edem ke un̄wam Abasi ebe ke akam.—Philippi 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.