 |
Beliefs | Future | Medical | Topics | Contact Us | Publications | Languages |
| Nso ke Abasi Oyom Oto Nnyịn? | Ukpepn̄kpọ 13  |
Didie ke Afo Ekeme Ndikụt Ido Ukpono Akpanikọ? |
|
 |
Ndi kpukpru ido ukpono ẹnem Abasi esịt, mîdịghe ndi edi kiet kpọt? (1) |
|
Ntak emi ata ediwak ido ukpono ẹdude ẹmi ẹdọhọde ke idi Christian? (2) |
|
Didie ke afo ekeme ndidiọn̄ọ mme ata Christian? (3-7) |
1. Jesus ọkọtọn̄ọ ata ido ukpono Christ kiet. Ntre mfịn n̄kpasịp otu kiet kpọt ẹmi ẹdide ata mme andituak ibuot nnọ Jehovah Abasi enyene ndidu. (John 4:23, 24; Ephesus 4:4, 5) Bible ekpep ete ke ibat ibat owo kpọt ẹsan̄a ke mfafaha usụn̄ oro adade osịm uwem.—Matthew 7:13, 14. 2. Bible ama ebemiso etịn̄ ete ke mme apostle ẹma ẹkekpan̄a, mme ukwan̄ ukpepn̄kpọ ye mme ido edinam oro mîdịghe eke Christian ẹyenyọni sụn̄sụn̄ ẹdụk esop Christian. Mme owo ẹyedụri mme andinịm ke akpanikọ nditiene mmọ utu ke Christ. (Matthew 7:15, 21-23; Utom 20:29, 30) Oro edi ntak nnyịn ikụtde ata ediwak nsio nsio ido ukpono ẹmi ẹdọhọde ke idi Christian. Didie ke nnyịn ikeme ndidiọn̄ọ mme ata Christian? 3. Ata n̄wọrọnda idiọn̄ọ oro ẹdade ẹdiọn̄ọ mme ata Christian edi nte ke mmọ ẹnyene ata ima ke otu idemmọ. (John 13:34, 35) Owo ikpepke mmọ ndikere nte ke mmimọ imọfọn ikan mme owo ẹmi ẹtode mme orụk m̀mê uduot ikpọkidem eken. Owo inyụn̄ ikpepke mmọ ndisua mme owo ẹtode mme idụt efen. (Utom 10:34, 35) Ntre mmọ isibuanake ke mme ekọn̄. Mme ata Christian ẹsinam n̄kpọ ye kiet eken nte nditọete iren ye iban.—1 John 4:20, 21.
4. Idiọn̄ọ efen ẹdade ẹdiọn̄ọ ido ukpono akpanikọ edi nte ke mme andibuana ke enye ẹnyene ntotụn̄ọ ukpono ẹnọ Bible. Mmọ ẹnyịme enye nte Ikọ Abasi ẹnyụn̄ ẹnịm se enye etịn̄de ke akpanikọ. (John 17:17; 2 Timothy 3:16, 17) Mmọ ẹda Ikọ Abasi nte edide akpan n̄kpọ akan mme ekikere ye mme ido edinam owo. (Matthew 15:1-3, 7-9) Mmọ ẹdomo ndidu uwem ekekem ye Bible ke uwem mmọ eke usen ke usen. Ntre mmọ ikwọrọke n̄kpọ kiet ndien ekem ẹnam n̄kpọ en̄wen.—Titus 1:15, 16. 5. Ana ido ukpono akpanikọ n̄ko okpono enyịn̄ Abasi. (Matthew 6:9) Jesus ama anam mbon en̄wen ẹdiọn̄ọ enyịn̄ Abasi, kpa Jehovah. Ana mme ata Christian ẹnam kpasụk ntre. (John 17:6, 26; Rome 10:13, 14) Mmanie ke n̄kann̄kụk mbufo ẹdi mbon oro ẹsiande mbon en̄wen ẹban̄a enyịn̄ Abasi? 6. Ana mme ata Christian ẹkwọrọ ẹban̄a Obio Ubọn̄ Abasi. Jesus ama anam ntre. Enye ama esitịn̄ kpukpru ini aban̄a Obio Ubọn̄ oro. (Luke 8:1) Enye ama owụk mme mbet esie ndikwọrọ ukem etop emi ke ofụri isọn̄. (Matthew 24:14; 28:19, 20) Mme ata Christian ẹnịm ke akpanikọ ẹte ke Obio Ubọn̄ Abasi kpọt edida ata emem ye ifụre ọsọk isọn̄ emi.—Psalm 146:3-5. 7. Mme mbet Jesus inyeneke ndidi ubak idiọk ererimbot emi. (John 17:16) Mmọ itieneke ibuana ke mme mbubehe ukaraidem ererimbot emi ye mme eneni n̄kaowo. Mmọ ẹfep idem ke idiọk eduuwem, mme edinam, ye edu edinam ẹmi ẹdide ọsọ n̄kpọ ke ererimbot. (James 1:27; 4:4) Nte afo emekeme ndidiọn̄ọ otu ido ukpono ke n̄kann̄kụk mbufo oro enyenede mme idiọn̄ọ ata Ido Ukpono Christ? |
||
Ẹkesio ke 1996 |
 |
Copyright © 2006 Watch Tower Bible and Tract Society of Pennsylvania. All rights reserved. |
|
