Kunnudetọ Jehovah Tọn lẹ—Mẹnu Wẹ Yé Yin? Etẹwẹ Yé Yise?

Yé tindo ojlo to hiẹ mẹ

Mẹnu Wẹ Yé Yin?

OJLO Kunnudetọ Jehovah tọn lẹ tọn wẹ yindọ hiẹ ni jẹakọ hẹ yé ganji. Hiẹ sọgan ko dukosọ hẹ yé taidi kọmẹnu po azọ́nwatọgbẹ́ lẹ po kavi to nuwiwa gbẹzan egbesọ tọn devo lẹ mẹ. Hiẹ sọgan ko mọ yé to tòhomẹ-liho ji, nado to linlinnamẹwe lẹ zedonukọnna aligbọntọ lẹ. Kavi hiẹ sọgan ko dọho kleun de hẹ yé to ohọ̀n towe ji.

Na taun tọn, Kunnudetọ Jehovah tọn lẹ tindo ojlo to hiẹ po dagbemẹ-ninọ towe po mẹ. Yé jlo na yin họntọn towe lẹ bo na dọ nususu na we dogbọn yedelẹ, nuhe yé yise, titobasinanu yetọn, gọna nuhe yé lẹn gando gbẹtọ lẹ po aihọn he mẹ mímẹpo to gbẹnọ te lọ po go dali. Nado hẹn ehe di, yé ko wleawu alọnuwe ehe tọn na we.

To aliho susu mẹ Kunnudetọ Jehovah tọn lẹ ma gbọnvona gbẹtọ devo lẹ gba. Yé tindo nuhahun paa lẹ—yèdọ akuẹzinzan tọn, agbasalan tọn, numọtolanmẹ tọn. Yé nọ ṣinuwa to whedelẹnu, na yé ma yin mẹpipe, yin gbigbọdo, kavi mẹhe ma sọgan ṣinuwa lẹ gba. ṣigba yé nọ tẹnpọn nado plọnnu sọn numimọ yetọn lẹ mẹ bo nọ plọn Biblu po sọwhiwhe po nado basi vọjlado he nuhudo etọn tin lẹ. Yé ko basi klandowiwe hlan Jiwheyẹwhe nado wà ojlo etọn, podọ yé nọ yí yedelẹ zan nado hẹn klandowiwe ehe di. Yé nọ dín anademẹ sọn Ohó Jiwheyẹwhe tọn po gbigbọ wiwe etọn po dè to nuwiwa yetọn lẹpo mẹ.

E yin nujọnu taun na yé dọ nuyise yetọn lẹ ni yin zize sinai do Biblu ji bọ e mayin do hopàdọ gbẹtọ tọn tata lẹ kavi nuyise sinsẹ̀n tọn lẹ ji gba. Yé tindo numọtolanmẹ he apọsteli Paulu tindo to whenuena e dọho to gbọdo glọ dọmọ: “Mì gbọ yè ni yí Jiwheyẹwhe do nugbonọ, ṣigba gbẹtọ lẹpo lalonọ.” (Lomunu lẹ 3:4*) Na nuhe dù nuplọnmẹ heyin zizedonukọnnamẹ taidi nugbo Biblu tọn lẹ, Kunnudetọ lẹ nọ kẹalọyi aliho he Beleanu lẹ hodo to whenuena yé sè yẹwhehodidọ apọsteli Paulu tọn: “Yé kọ̀n ayiha dai do yí ohó lọ, bo nọ to Owe-wiwe lẹ dín egbesọegbesọ, eyin mọ wẹ onú nẹlẹ yin.” (Owalọ lẹ 17:11) Kunnudetọ Jehovah tọn lẹ yise dọ sinsẹ̀n-nuplọnmẹ lẹpo wẹ dona yin whiwhlepọn to gbesisọmẹ hẹ Owe-wiwe gbọdo lẹ, vlavo eyin yewlẹ wẹ ze nuplọnmẹ lọ donukọnnamẹ kavi mẹdevo lẹ. Yé basi oylọna we—dotuhomẹna we—nado wà ehe to hodọdopọ towe hẹ yé mẹ.

Sọn ehe mẹ e họnwun dọ Kunnudetọ Jehovah tọn lẹ tindo yise to Biblu mẹ taidi Ohó Jiwheyẹwhe tọn. Yé nọ pọ́n owe 66 etọn lẹ hlan taidi nuhe yin gbigbọdo bo sọgbe to whenuho-liho. Dehe nọ yin yiylọ to paa mẹ dọ Alẹnu Yọyọ lọ wẹ yé nọ dlẹnalọdo taidi Owe-wiwe Glẹki Klistiani tọn lẹ, podọ Alẹnu Hoho lọ wẹ yé nọ ylọdọ Owe-wiwe Heblu tọn lẹ. Yé nọ ganjẹ awe lẹpo go, yèdọ Owe-wiwe Glẹki tọn po Heblu tọn lẹ po, bo nọ mọnukunnujẹemẹ tlọlọ adavo fie hogbe lọ lẹ kavi lẹdo hodidọ lọ tọn lẹ dohia te hezeheze dọ yé yin yẹhiadonu tọn lẹ. Yé mọnukunnujẹemẹ dọ susu dọdai Biblu tọn lẹ wẹ ko mọ hẹndi yí, devo lẹ to hẹndi mọyi to alọnu, podọ devo lẹ gbẹ́ pò to tenọpọn hẹndi.

OYÍN YETỌN

Kunnudetọ Jehovah tọn lẹ? Mọwẹ, lehe yé nọ ylọ yedelẹ gbọn niyẹn. Oyín zẹẹmẹ-basinanu tọn de wẹ, he dohia dọ yé nọ dekunnu gando Jehovah, Jiwheyẹwhe-yinyin etọn, po lẹndai etọn lẹ po go. “Jiwheyẹwhe,” “Oklunọ,” po “Mẹdatọ” po—taidi “Togán,” “Ahọlu,” po “Awhàngán” po—yin tẹnmẹ-yinkọ lẹ bo sọgan yin yiyizan na gbẹtọ voovo lẹ. Ṣigba “Jehovah” yin oyín mẹdetiti tọn bo dlẹnalọdo Jiwheyẹwhe ganhunupotọ lọ po Mẹdatọ wẹkẹ lọ tọn po. Ehe yin didohia to Psalm 83:18, sọgbe hẹ lẹdogbedevomẹ Biblu Wiwe Gungbe tọn dọmọ: “Na yé nido yọnẹn dọ, hiẹ, oyín mẹhe tọn dopo kẹdẹ nọ yin JEHOVAH, wẹ Gigogán to wẹkẹ lẹpo ji.”

Oyín Jiwheyẹwhe tọn to Heblu dowhenu tọn mẹ

Yinkọ lọ Jehovah (kavi Yahweh, dile Bible de Jérusalem heyin Katoliki Lomu tọn podọ dile delẹ to weyọnẹntọ lẹ mẹ nọ ylọ ẹ dọ) sọawuhia diblayi whla 7 000 to Owe-wiwe Heblu dowhenu tọn lẹ mẹ. Suhugan Biblu lẹ tọn ma yí ì zan sọmọ gba ṣigba nọ yí “Jiwheyẹwhe” kavi “Oklunọ” do diọtẹnna ẹn. Etomọṣo, etlẹ yin to Biblu ehelẹ mẹ, mẹde sọgan yọ́n fie wefọ Heblu dowhenu tọn lẹ yí Jehovah zan te, na to otẹn enẹlẹ mẹ hogbe heyin yíyí do diọtẹnna ẹn lẹ nọ yin kinkàn po wekun daho heyin hinhẹn whè lẹ po, dole: JIWHEYẸWHE, OKLUNỌ. Lẹdogbedevomẹ egbezangbe tọn susu lẹ wẹ yí oyín lọ Jehovah kavi Yahweh zan. Enẹwutu, Isaia 42:8 hia to Traduction du monde nouveau mẹ dọ, “Yẹn wẹ Jehovah. Oyín ṣie niyẹn.”

Kandai Biblu tọn he Kunnudetọ Jehovah tọn lẹ nọ yizan taidi dodonu oyín yetọn tọn tin to weta 43tọ Isaia tọn mẹ. To finẹ ninọmẹ aihọn lọ tọn yin pinpọnhlan taidi ninọmẹ whẹdatẹn de tọn: Yẹwhe akọta lẹ tọn yin oylọ-basina nado hẹn kunnudetọ yetọn lẹ wá nado wá na kunnudenu dodowiwa yetọn tọn kavi nado sè kunnudetọ he tin to adà Jehovah tọn mẹ lẹ tọn bo yọ́n nugbo lọ. Jehovah lá na omẹ etọn lẹ to finẹ dọmọ: “Mìwlẹ wẹ kunnudetọ ṣie lẹ, wẹ Jehovah dọ, podọ devi ṣie he yẹn ko de; na mì nido yọnẹn bo yí mi sè, bosọ mọnukunnujẹemẹ dọ yẹn wẹ ewọ: jẹnukọnna mi Jiwheyẹwhe depope ma tin, mọjanwẹ devo depope ma na tin to godo na mi. Yẹn, yèdọ yẹn, wẹ Jehovah; podọ gbọnvona mi whlẹngantọ depope ma tin.”—Isaia 43:10, 11, American Standard Version.

Jehovah Jiwheyẹwhe tindo kunnudetọ lẹ to aigba ji yèdọ na owhe fọtọ́n lẹ jẹnukọnna jiji Jesu tọn. To whenuena Heblu lẹ weta 11 slẹ́ delẹ to omẹ yisenọ mọnkọtọn lẹ mẹ pó godo, Heblu lẹ 12:1 dọmọ: “Enẹwutu sọle yè yí aslọ [kunnudetọ] tọn susu lẹdo mí pé ga di ehe, mì gbọ mí ni dè onú pinpẹn lẹpo do apadopo, po ylando he ma sinyẹnawu nado tẹdo omẹ go po, bosọ gbọ mí ni nọ yí homẹfa do họ̀n alèwezun he yè ze do mí nukọn.” Jesu dọ to Pọntiu Pilati nukọn dọmọ: “Hlan opodo he wẹ yè ko do ji mi, podọ hlan opodo he wẹ yẹn do wá aihọn mẹ, na yẹn nido dekunnu hlan nugbo lọ.” Ewọ yin yiylọdọ “kunnudetọ dodonọ, nugbonọ.” (Johanu 18:37; Osọhia 3:14) Jesu dọna devi etọn lẹ dọmọ: “Mìwlẹ na mọ huhlọn yí whenuena [gbigbọ wiwe] wá mì ji: mìwlẹ nasọ yin kunnudetọ na mi to Jelusalẹm mẹ, to Jude lẹpo mẹ, po Samalia po, podọ jẹ opodo aigba tọn.”—Owalọ lẹ 1:8.

Enẹwutu, to egbehe gbẹtọ 6 000 000 delẹ he to lilá wẹndagbe Ahọluduta Jehovah tọn gbọn Jesu Klisti gblamẹ to aigba he hugan 230 lẹ ji tindo numọtolanmẹ lọ dọ e sọgbe dọ yé ni nọ ylọ yedelẹ dọ Kunnudetọ Jehovah tọn lẹ.

Nudi Kunnudetọ 6 000 000 wẹ tin to aigba he hugan 230 lẹ ji

* Adavo e yin didohia to alọpa devo mẹ, wefọ he yin dide to alọnuwe ehe mẹ lẹ yin sọn lẹdogbedevomẹ Biblu Wiwe lọ Gun Alada tọn mẹ, po kinkàn wekun dopodopo tọn po sọgbe hẹ wekinkan egbezangbe tọn. Fie NW yin didohia bọdo hoyidọ de go te, e dohia dọ lẹdogbedevomẹ lọ yin bibasi sọn New World Translation of the Holy Scriptures—With References mẹ.

Copyright © 2006 Watch Tower Bible and Tract Society of Pennsylvania. All rights reserved.