Kunnudetọ Jehovah Tọn lẹ—Mẹnu Wẹ Yé Yin? Etẹwẹ Yé Yise?

Yọn-na-Yizan Họakuẹ Wẹndagbe lọ Tọn na Lẹdo Towe

TO AIHỌN egbehe tọn mẹ mí nọ saba sè hogbe lọ dọ: “Nunọwhinnusẹ́n sinsẹ̀n Klistiani tọn lẹ ma yọn-na-yizan gba. Yé ma tlẹ sọgan hẹn kọdetọn dagbe wá to aihọn egbehe tọn he doglẹ lọ mẹ gba.” Ṣigba, to hodọdopọ de mẹ to nukọntọ Hindu tọn Mohandas K. Gandhi po Afọzedaitọ Grande-Bretagne tọn to Inde, yèdọ Lord Irwin po ṣẹnṣẹn, linlẹn he gbọnvo taun de wẹ yin didetọ́n. E yin linlin etọn na dọ Lord Irwin kanse Gandhi nuhe ewọ lẹndọ e na didẹ nuhahun he tin to ṣẹnṣẹn na Grande-Bretagne po Inde po. Gandhi ze Biblu bo hùn in do weta atọ́ntọ Matiu tọn bo dọmọ: “To whenuena otò towe po ṣie po na yinuwa sọgbe hẹ nuplọnmẹ he yin didoai gbọn Klisti dali to Yẹwhehodidọ Osó ji tọn ehe mẹ, mí na ko didẹ nuhahun mítọn lẹ e mayin otò mítọn lẹ tọn kẹdẹ wẹ gba ṣigba aihọn lọ pete tọn.”

Yẹwhehodidọ enẹ dọho gando dindin gbigbọnọ-yinyin podọ yinyin homẹmimiọnnọ, jijọhonọ, lẹblanunọ, po owanyi na dodowiwa po go. E ma yindọ e gblewhẹdo mẹhuhu kẹdẹ wẹ gba ṣigba adì-dùdù do mẹdevo lẹ go ga, mọdopolọ e ma yindọ e gblewhẹdo ayọdide kẹdẹ wẹ gba ṣigba linlẹn agọ̀ zanhẹmẹ tọn lẹ ga. E dọho jẹagọdo afọdide gbẹdai matin mẹtọnhopọn tọn he nọ klán owhé lẹ bo nọ dọ̀n nuhahun plá ovi lẹ go. E dọna mí dọ: ‘Yiwanna mẹhe tlẹ gbẹwanna we lẹ, nọ nanú mẹhe tin to nuhudo mẹ lẹ, doalọtena whẹdida na mẹdevo lẹ matin lẹblanu, yinuwa hẹ mẹdevo lẹ dile hiẹ na jlo nado yin nuyiwa hẹ do.’ Eyin ayinamẹ ehe lẹpo yin yíyí do yizan mẹ, e na hẹn alemọyi susugege lẹ wá. Dile mẹhe nọ yí yé zan to lẹdo towe mẹ lẹ sù sọ, mọwẹ lẹdo towe na pọnte sọ!

Kunnudetọ Jehovah tọn lẹ nọ yinuwadomẹji to aliho ehe mẹ. Biblu nọ plọn yé nado na sisi alọwle. Ovi yetọn lẹ yin pinplọn nunọwhinnusẹ́n he sọgbe lẹ. Nujọnu-yinyin whẹndo tọn nọ yin nùzindeji. Whẹndo he tin to kọndopọmẹ lẹ yin dona de na lẹdo towe, etlẹ yin na akọta towe. Whenuho bẹ apajlẹ huhlọn aihọn tọn susu lẹ hẹn he gbakija to whenuena kanṣiṣa whẹndo tọn lẹ gbọjọ bọ walọ mawé jideji. Lehe mẹdopodopo kavi whẹndo he ji Kunnudetọ Jehovah tọn lẹ yinuwado nado nọ nọgbẹ̀ sọgbe hẹ nunọwhinnusẹ́n Klistiani tọn lẹ sù sọ, mọwẹ sẹ́nhẹngba, walọ mawé, po danuwiwa po na depò to lẹdo towe mẹ do.

Dopo to nuhahun sinsinyẹn he to ahidihẹ lẹdo po akọta lẹ po wẹ nuvẹun akọ̀ tọn. To vogbingbọn mẹ apọsteli Pita dọmọ: “Yẹn pọ́n dọ Jiwheyẹwhe ma yin mẹnukuntahopọntọ gba: ṣigba to akọta lẹpo mẹ, mẹhe dibusi i, bo wazọ́n dodo, wẹ yè kẹalọyi to e dè.” Podọ Paulu wlan dọmọ: “Mẹde ma tin bo yin Ju kavi Glẹki, mẹde ma tin bo yin mẹmẹglọ kavi mẹmẹdekannu, mẹde ma tin bo yin sunnu, kavi yọnnu, na omẹ dopo wẹ mìmẹpo to Klisti Jesu mẹ.” (Owalọ lẹ 10:34, 35; Galatianu lẹ 3:28) Kunnudetọ Jehovah tọn lẹ kẹalọyi ehe. Gbẹtọ akọ̀ po sinmẹ agbasa voovo tọn lẹpo po nọ nọpọ́ bo nọ wazọ́n to pọmẹ to tatọ-tẹnnọ yetọn, alahọ lẹ, podọ to agun lẹ mẹ.

To Aflika, akọ̀ delẹ ma sọgan nọpọ́ hẹ ode awetọ matin avùn gba. Etomọṣo, to plidopọ Kunnudetọ Jehovah tọn lẹ tọn tẹnmẹ, gbẹtọ lẹ sọn susu akọ̀ voovo lẹ tọn mẹ nọ dùnú, damlọn, bo nọ basi sinsẹ̀n dopọ to kọndopọ pẹkipẹki po gbẹdido zohunhun tọn po mẹ. Awú ko jí nukunmọnu ahọlu tọn lẹ to whenuena yé mọ ehe. Linlinwe Amsterdam News heyin 2 août 1958 tọn dọho gando apajlẹ nugandomẹgo mẹkọndopọ sinsẹ̀n nugbo Klistiani tọn go. Zẹẹmẹ lọ yin whinwhàn gbọn ayidido plidopọ akọjọpli tọn heyin nùdego jẹnukọn lọ dali fie Kunnudetọ he hugan mado-ẹnẹ livi dopo tọn lẹ pli dopọ te to Tòdaho New York tọn mẹ.

“To filẹpo Mẹyuu lẹ, yovo lẹ po omẹ Whèzẹtẹn-waji tọn lẹ po, sọn adà gbẹninọ tọn lẹpo po adà aihọn tọn lẹpo po mẹ, yí ayajẹ po awuvivo po do dogbẹ́ hẹ yedelẹ. . . . Kunnudetọ he to sinsẹ̀n-basi lọ lẹ he wá sọn aigba 120 lẹ ji ko nọpọ́ bo basi sinsẹ̀n dopọ to jijọho mẹ, bo dohia Amelikanu lẹ lehe e sọgan yin bibasi po awubibọ po do. . . . Plidopọ lọ yin apajlẹ he to sisẹ́ de gando lehe gbẹtọ lẹ sọgan wazọ́n bo nọgbẹ̀ to pọmẹ do go.”

Mẹsusu sọgan dọ dọ nunọwhinnusẹ́n sinsẹ̀n Klistiani tọn lẹ ma yọn-na-yizan to ojlẹ egbezangbe tọn ehe mẹ. Ṣigba, onú devo tẹwẹ ko hẹn kọdetọn dagbe wá kavi wẹ na hẹn kọdetọn dagbe ẃa? Nunọwhinnusẹ́n Klistiani tọn lẹ sọgan yin nuhọakuẹ taun eyin yé yin yiyizan to lẹdo towe mẹ todin, podọ yé na yin dodonu lọ nado kọ̀n ‘akọta lẹ, akọ̀ lẹ, po gbẹtọ’ lẹpo po dopọ lẹdo aihọn pé to gandudu Ahọluduta Jiwheyẹwhe tọn do gbẹtọvi lẹ ji glọ.—Osọhia 7:9, 10.

Copyright © 2006 Watch Tower Bible and Tract Society of Pennsylvania. All rights reserved.