Kunnudetọ Jehovah Tọn lẹ—Mẹnu Wẹ Yé Yin? Etẹwẹ Yé Yise?

JIWHEYẸWHE jotẹnna kanyinylan, bọ livi susu to aigba ji desọn ojlo mẹ wá nado hẹn ẹn zun aṣa. Di dohia, yé nọ fọ́n awhàn dote, de bọmbu dó ovi lẹ, hù aigba sudo, bo nọ hẹn huvẹ wá. Livi susu nọ nù-azọ̀ bo nọ bẹ azọ̀n agbasa wiwọ̀ afuje tọn, yé nọ hẹn ayọdide zun aṣa bo nọ bẹ asamẹzọ̀n, yé nọ nù ahàn sinsinyẹn zẹjlẹgo bo nọ bẹ azọ̀n alín tọn, po mọmọ po sọyi. Na nugbo tọn omẹ mọnkọtọn lẹ ma jlo dọ kanyinylan ni doalọte gba. Yé jlo poun dọ yasanamẹ etọn lẹ ni yin didesẹ. Whenuena yé gbẹ̀n nuhe yé ko dó lẹ, yé nọ dawhá dọ, “Naegbọn e jọ do go e?” Podọ yé nọ gblewhẹdo Jiwheyẹwhe, dile Howhinwhẹn lẹ 19:3 dọ do: “Nululu gbẹtọ lọsu tọn wẹ nọ hẹn gbẹzan etọn gble, podọ enẹgodo e nọ gblehomẹdo OKLUNỌ go.” (The New English Bible) Podọ eyin Jiwheyẹwhe hẹnalọdotena ylanwiwa yetọn, yé na fọ́ngu na mẹdekannujẹ yetọn he yé hẹnbu nado wà ẹ wutu!

Whẹwhinwhẹ́n tangan Jehovah tọn na dotẹnmẹ jijodona kanyinylan wẹ yin nado na gblọndo avùnnukundiọsọmẹ Satani tọn. Satani Lẹgba dọ dọ Jiwheyẹwhe ma sọgan ze gbẹtọ lẹ do aigba ji he na yin nugbonọ hlan Ẹn to whlepọn glọ gba. (Job 1:6-12; 2:1-10) Jehovah jotẹnna Satani nado gbọṣi aimẹ nado tindo dotẹnmẹ hundote lọ nado do nugbo-yinyin avùnnukundiọsọmẹ etọn tọn hia. (Eksọdusi 9:16) Satani zindonukọn nado to yajiji hẹnwa todin, nado lilẹ́ gbẹtọ lẹ sọta Jiwheyẹwhe, dile e to tintẹnpọn nado do nugbo-yinyin avùnnukundiọsọmẹ etọn tọn hia. (Osọhia 12:12) Ṣigba, Job hẹn tenọgli go. Mọwẹ Jesu lọsu basi do. Klistiani nugbo lẹ to mọwà todin.—Job 27:5; 31:6; Matiu 4:1-11; 1 Pita 1:6, 7.

E ma sọgbe hẹ Biblu gba. E taidi nuhe vẹawu nado yise kiki na gbẹtọvi lẹ ko yọ́n oylan na owhe kanweko susu lẹ wutu. Jehovah dá aigba bo dọna gbẹtọvi lẹ nado yí sunnu po yọnnu dodonọ lẹ po do gọ́ e ji nado penukundo atin lẹ po kanlin lẹ po go bo wlebòna whanpẹ etọn kakati nado và ẹ sudo. (Pọ́n hosọ lọ “Etẹwẹ Yé Yise” po “Wẹndagbe lọ He Yé Jlo Dọ Hiẹ ni Sè” po.) Kakati opagbe Paladisi tọn enẹ nido vẹawu nado yise, ninọmẹ awubla tọn dintọn lọ wẹ yin nuhe ylanhugan nado zindonukọn. Paladisi na diọtẹnna ẹn.

Yise to opagbe ehelẹ mẹ mayin yise he ma tindo dodonu gba. ‘Yise nọ bọdo nuhe yin sisè go.’ Gbọn Ohó Jiwheyẹwhe tọn pinplọn dali, nuyọnẹn etọn nọ họnwun bọ yise nọ whẹ́n deji.—Lomunu lẹ 10:17; Heblu lẹ 11:1.

Whenuho dokunkun nujijọ Biblu tọn lẹ zinnudo gbesisọ-yinyin suhugan whenuho Biblu tọn ji. Lẹnunnuyọnẹn nujọnu tọn nọgodona Biblu. Nugbo he bọdego helẹ ko tin to Biblu mẹ na ojlẹ dindẹn whẹpo yé do yin yinyọnẹn gbọn weyọnẹntọ aihọn tọn lẹ dali: diọdo debọdo-dego he mẹ aigba lọ jugbọn to awuwiwle etọn whenu, dọ aigba lọ tin to lobòto, dọ e yin zizeplá do dovlomẹ do agbagbá, podọ dọ ohẹ̀ lẹ nọ zìn gbejizọnlin gaa lẹ.—Gẹnẹsisi, weta 1; Isaia 40:22; Job 26:7; Jẹlemia 8:7.

Nugbo lọ dọ Biblu yin gbigbọdo yin didohia gbọn hẹndi dọdai lẹ tọn dali. Daniẹli dọ dọdai jẹnukọn gando awuwiwle po aijijẹ huhlọn aihọn tọn lẹ po go, gọna ojlẹ lọ to whenuena Mẹssia na wá bo na yin hùhù. (Daniẹli, weta 2, 8; 9:24-27) To egbehe, dọdai devo lẹ gbẹ́ pò to hẹndi mọyi, bo to ojlẹ ehelẹ dohia taidi ‘azán godo tọn lẹ.’ (2 Timoti 3:1-5; Matiu weta 24) Oyọnẹn jẹnukọn mọnkọtọn lẹ ma tin to huhlọn gbẹtọ tọn mẹ gba. (Isaia 41:23) Na nudọnamẹ dogọ, pọ́n owe lọ La Bible: Parole de Dieu ou des hommes? po Y a-t-il un Créateur qui se soucie de vous? po, he yin zinzinjẹgbonu gbọn Watchtower Bible and Tract Society dali.

Hiẹ dona plọn Biblu bo lẹnayihamẹpọn do e ji, bo nọ to gbigbọ Jiwheyẹwhe tọn biọ to ojlẹ dopolọ mẹ nado deanana we. (Howhinwhẹn lẹ 15:28; Luku 11:9-13) “Eyin mẹde ma tindo nuyọnẹn to mì mẹ,” wẹ Biblu dọ, “ni kanbiọ to Jiwheyẹwhe dè, mẹhe nọ na omẹ susugege, bo ma nọ wọhẹ omẹ, yè na na ẹn.” (Jakobu 1:5) Humọ, alọgọnamẹnu Biblu pinplọn tọn lẹ tin he jẹ nado gbadopọnna. To paa mẹ nuhudo nọ tin na alọgọ sọn mẹdevo lẹ dè, dile e jọ do to whenuena Filipi plọnnu hẹ Etiopianu lọ. (Owalọ lẹ 8:26-35) Kunnudetọ Jehovah tọn lẹ nọ deanana plọnmẹ Biblu lẹ vọ́nu hẹ jlodotọ lẹ to owhé yetọn lẹ gbè. Vòawu nado biọ devizọnwiwa ehe.

Agọjẹdomẹ tin do yẹwhehodidọ Jesu tọn go, podọ e dọ dọ hodotọ etọn lẹ na yin agọjẹdo ga. To whenuena homẹ mẹdelẹ tọn hùn do nuplọnmẹ Jesu tọn go, sinsẹ̀nnọ agọjẹdomẹtọ lẹ gblọn dọmọ: “Be yè hẹn míwlẹ danbú ga wẹ? Be mẹde yí ì sè to ogán lẹ mẹ, kavi to Falesi lẹ mẹ?” (Johanu 7:46-48; 15:20) Susu mẹhe na ayinamẹ we ma nado plọnnu hẹ Kunnudetọ lẹ yin vlavo mayọndenọ kavi nuvẹunnọ lẹ. Plọnnu hẹ Kunnudetọ lẹ bo pọ́n na dewetiti vlavo eyin nukunnumọjẹnumẹ Biblu tọn towe jideji kavi lala.—Matiu 7:17-20.

To ehe wiwà mẹ yé nọ hodo apajlẹ Jesu tọn. E yì Ju lẹ dè. Ju lẹ tindo sinsẹ̀n yetọn, ṣigba to aliho susu mẹ e ko zẹ̀pá na Ohó Jiwheyẹwhe tọn. (Matiu 15:1-9) Akọta lẹpo wẹ tindo wunmẹ voovo sinsẹ̀n tọn lẹ, vlavo dehe yé ylọdọ Klistiani kavi dehe mayin Klistiani tọn. E yin nujọnu taun na gbẹtọ lẹ nado tẹdo nuyise he sọgbe hẹ Ohó Jiwheyẹwhe tọn titi lẹ go, podọ vivẹnudido Kunnudetọ lẹ tọn nado gọalọna yé to ehe wiwà mẹ wleawuna dohia owanyi kọmẹnu tọn.

Mẹdepope he ylọ sinsẹ̀n etọn dọ nujọnu dona lẹndọ enẹ wẹ yin dehe sọgbe lọ. Eyin e ma yinmọ, naegbọn ewọ nado tẹdo e go? Klistiani lẹ yin tudohomẹna dọmọ: “Mì nọ dindona onú popo dagbedagbe, mì hẹn ehe yin dagbe go gligli.” (1 Tẹsalonikanu lẹ 5:21) Mẹde dona tindo nujikudo dọ nuyise etọn lẹ sọgan yin godonọna gbọn Owe-wiwe lẹ dali, na yise nugbo dopo akàn wẹ tin. Efesunu lẹ 4:5 zinnudo ehe ji, bo donù “Oklunọ dopo, yise dopo, baptẹm dopo” go. Jesu ma kẹalọyi pọndohlan vọ́donanu egbezangbe tọn dọ aliho susu wẹ tin, sinsẹ̀n susu wẹ tin, bọ yemẹpo planmẹ yì whlẹngán mẹ gba. Kakatimọ, e dọmọ: “Bibó wẹ họntonu lọ, jijlọ sọ wẹ ali lọ, he hẹn omẹ yì ogbẹ̀ mẹ, pẹvide wẹ yé he dín in mọ lẹ.” Kunnudetọ Jehovah tọn lẹ yise dọ yé ko dín in mọ. Eyin e ma yinmọ, yé na dín sinsẹ̀n devo.—Matiu 7:14.

Lala. Livi susu he ko nọgbẹ̀ to owhe kanweko he wayi mẹ lẹ bo ma yin Kunnudetọ Jehovah tọn lẹ na lẹkọwa ogbẹ̀ to fọnsọnku whenu bo na tindo dotẹnmẹ hundote lọ nado nọgbẹ̀. Susu mẹhe to gbẹnọ todin lẹ sọgan gbẹ́ ze teninọ na nugbo po dodowiwa po jẹnukọnna “nukunbibia daho lọ,” bọ yé na mọ whlẹngán. Humọ, Jesu dọ dọ mí ma dona nọ dawhẹ na ode awetọ mítọn gba. Míwlẹ nọ pọ́n awusọhia gbonu tọn; Jiwheyẹwhe nọ pọ́n ahun mẹ. E nọ mọnu po gbesisọ po bo nọ dawhẹ po lẹblanu po. E ko ze whẹdida do alọ Jesu tọn mẹ, e mayin do mítọn mẹ gba.—Matiu 7:1-5; 24:21; 25:31.

Gando nunina akuẹ tọn lẹ go, apọsteli Paulu dọmọ: “Omẹ dopodopo dile e lẹn to ayiha etọn mẹ do, mọwẹ mì ni gbọ e ni na do; e yin po hùnhlún po blo, kavi huhlọndohẹnbasi tọn blo: na Jiwheyẹwhe yiwanna nunamẹtọ homẹhunnọ.” (2 Kọlintinu lẹ 9:7) To Plitẹnhọ Ahọluduta tọn po ohọ̀ plidopọ tọn heyin Kunnudetọ Jehovah tọn lẹ tọn po mẹ, akuẹjọ ma nọ yin yíyí pọ́n gbede. Apotin lẹ nọ yin zize dote na e nido bọawu na mẹdepope he jlo nado na nunina lẹ nado wàmọ. Mẹdepope ma nọ yọ́n nunina he mẹdevo basi kavi eyin mẹdevo lẹ ma na. Mẹdelẹ penugo nado na susu hugan mẹdevo lẹ; mẹdelẹ sọgan nọ ma penugo nado na nudepope. Jesu do pọndohlan dagbe lọ hia to whenuena e basi zẹẹmẹ do adọkun-potin he tin to tẹmpli Jelusalẹm tọn mẹ po mẹhe to nunina basi lẹ po ji: Nugopipe omẹ lọ tọn nado na podọ gbigbọ nunina lọ tọn wẹ yin nujọnu, e mayin sọha akuẹ he yin nina lọ tọn wẹ gba.—Luku 21:1-4.

To whenuena mẹde ko mọnukunnujẹ oyọnẹn opagbe Paladisi aigba ji tọn to Ahọluduta Klisti tọn glọ mẹ, omẹ lọ na jlo nado lá ẹ na mẹdevo lẹ. Hiẹ lọsu na wàmọ ga. Wẹndagbe de wẹ e yin!—Owalọ lẹ 5:41, 42.

Ehe wiwà yin aliho titengbe de nado dohia dọ hiẹ yin devi Jesu Klisti tọn. To Biblu mẹ, Jesu yin yiylọdọ “kunnudetọ dodonọ, nugbonọ.” To whenuena e tin to aigba ji e dọyẹwheho, dọmọ: “Ahọludu olọn tọn sẹpọ,” podọ e do devi etọn lẹ hlan gbonu nado wà onú dopolọ. (Osọhia 3:14; Matiu 4:17; 10:7) To godo mẹ, Jesu degbena hodotọ etọn lẹ dọmọ: “Enẹwutu mì yì, bo hẹn akọta lẹpo zun nuplọntọ, . . . [bo] sọ nọ plọn yé.” E sọ dọ dọdai dọ whẹpo opodo lọ na wá, “yè nasọ dọyẹwheho wẹndagbe ahọludu tọn helẹ to aigba fininọ lẹpo mẹ na okunnu de hlan akọta lẹpo.”—Matiu 24:14; 28:19, 20.

Aliho susu wẹ tin nado lá wẹndagbe ehe. Hodọdopọ hẹ họntọn lẹ po mẹyinyọnẹn lẹ po nọ saba hùn aliho lọ dote nado wàmọ. Mẹdelẹ nọ basi i gbọn wekanhlanmẹ winwlan dali kavi gbọn alokan yiyizan dali. Mẹdevo lẹ nọ yí owe he bẹ nudọnamẹ he yé lẹndọ mẹyinyọnẹn de na tindo ojlo titengbe to e mẹ lẹ hẹn hlan ẹn. Na ojlo lọ ma nado wọnji mẹdepope go wutu, Kunnudetọ lẹ nọ yì sọn họndekọn jẹ họndekọn po wẹndomẹ lọ po.

Biblu bẹ oylọ-basinamẹ zohunhunnọ ehe hẹn dọmọ: “Gbigbọ po asiyọyọ po dọmọ, Wá. Ewọ he to sisè ni dọmọ, Wá. Podọ mẹhe nugblahu gbọ e ni wá. Ewọ he jlo, gbọ e ni yí osin ogbẹ̀ tọn lọ vọ́nu.” (Osọhia 22:17) Didọna mẹdevo lẹ dogbọn Paladisi aigba ji tọn po dona etọn lẹ po dali dona yin bibasi sọn ojlo mẹ wá, yèdọ sọn ahun he gọ́ na ojlo nado lá wẹndagbe ehe mẹ.

Mí deji dọ hiẹ tindo kanbiọ devo lẹ dogbọn Kunnudetọ Jehovah tọn lẹ po nuyise yetọn lẹ po dali. Vlavo whẹho delẹ sọawuhia taidi nuhe gẹdẹ. Mí na jlo nado na gblọndo na kanbiọ towe lẹ. Otẹn ma sù sọmọ to alọnuwe ehe mẹ gba, enẹwutu mí basi oylọ na we nado kàn yé sè Kunnudetọ lẹ to lẹdo towe mẹ. Hiẹ sọgan wàmọ vlavo to opli Plitẹnhọ Ahọluduta mẹ tọn lẹ tẹnmẹ kavi to whenuena yé basi dlapọn na we to owhé towe gbè. Kavi hiẹ sọgan yí kanbiọ towe lẹ hlan Watch Tower, gbọn yíyí dopo to adlẹsi he jẹ to odò lẹ mẹ zan dali.