OPODO
SINSẸ̀N LALO TỌN
KO SẸPỌ!

Etẹwẹ Sinsẹ̀n Lalo Yin? Be sẹ́nhẹngba he nọ yin bibasi to oyín sinsẹ̀n tọn mẹ lẹ nọ hẹn apọṣi we ya? Be awhàn, nukunbianamẹ [terrorisme], po nugbomadọ po he gbayipe to mẹhe sọalọakọ́n dọ yé to Jiwheyẹwhe sẹ̀n lẹ ṣẹnṣẹn nọ hẹn homẹgble we na pọndohlan he a tindo gando dodowiwa go wutu ya? Naegbọn e do yindọ sinsẹ̀n wẹ nọ hẹn susu nuhahun lọ lẹ tọn wá?

Whẹho lọ ma gando sinsẹ̀n lẹpo go gba, ṣigba sinsẹ̀n lalo wẹ yin adọ̀ nuhahun ehelẹ tọn. Jesu Klisti, omẹ nukundeji sinsẹ̀n tọn, he nọ yin sisi na lẹdo aihọn pé lọ, dohia dọ sinsẹ̀n lalo wẹ nọ sisẹ́ gbẹtọvi lẹ nado wà nuhe ylan, kẹdẹdile “atin yìnyọn lọ hẹn sinsẹ́n ylanylan jẹgbonu” do. (Matiu 7:15-17) Sinsẹ́n nankọ wẹ sinsẹ̀n lalo nọ detọn?

Sinsẹ̀n Lalo . . .

NỌ DOALỌ TO AWHÀN PO TONUDIDỌ PO MẸ: Linlinwe lọ Asiaweek dọmọ: “To asie po fidevo lẹ po, nukọntọ he to ogántẹn dín dogọ vẹkuvẹku lẹ nọ gbọn goyiyi dali deanana linlẹn sinsẹ̀nnọ lẹ tọn nado hẹn pekọ wá na nuhudo yetọn titi lẹ.” Taidi kọdetọn de, linlinwe lọ na avase dọmọ: “Aihọn lọ tin to bẹbẹnu bẹwlu tọn.” Sinsẹ̀ngán he diyin to États-Unis de lá dọmọ: “Mì dona hù nukunbianamẹtọ lẹ whẹpo mẹhuhu nido doalọte.” Etẹwẹ yin tadona he kọ̀n e wá? “Mì sukúndona yé to oyín Oklunọ tọn mẹ.” To vogbingbọn mẹ, Biblu dọmọ: “Eyin mẹde dọ, Yẹn yiwanna Jiwheyẹwhe, bo gbẹwanna mẹmẹsunnu etọn, lalonọ wẹ ewọ.” (1 Johanu 4:20) Jesu tlẹ dọmọ: “Mì yiwanna kẹntọ mìtọn lẹ.” (Matiu 5:44) Sinsẹ̀n nẹmu wẹ hiẹ lẹndọ hagbẹ etọn lẹ nọ doalọ to awhànfunfun mẹ?

HẸN SINSẸ̀N-NUPLỌNMẸ LALO GBAYIPE: Sinsẹ̀n susu wẹ nọ plọnmẹ dọ alindọn kavi gbigbọ yin onú mayinukundomọ de to gbẹtọ mẹ he nọ luntọ́n to okú whenu. Gbọn nuplọnmẹ ehe gblamẹ, susu sinsẹ̀n ehelẹ tọn wẹ nọ tafu hagbẹ sinsẹ̀n tọn yetọn lẹ bo nọ biọ akuẹ nado sọgan hodẹ̀ na alindọn he ko kú lẹ. Ṣ̣̣igba, nuhe Biblu plọnmẹ gbọnvo. “Alindọn he waylando, e na kú.” (Ezekiẹli 18:4) “Mẹhe to ogbẹ̀ yọnẹn dọ emi na kú; ṣigba oṣiọ lẹ ma yọ́n nude.” (Yẹwhehodọtọ 9:5) Jesu plọnmẹ dọ oṣiọ lẹ na fọ́n, ṣigba eyin gbẹtọvi lẹ tindo alindọn jọmaku, be fọnsọnku masọ yin dandan ba. (Johanu 11:11-25) Be sinsẹ̀n towe nọ plọnmẹ dọ alindọn ma nọ kú wẹ ya?

NỌ MIỌNNUKUNDO FẸNNUWIWA ZANHẸMẸ TỌN: To otò susu lẹ mẹ, pipli sinsẹ̀n tọn lẹ nọ de sunnu he nọ zanhẹ sunnu po yọnnu he nọ zanhẹ yọnnu po lẹ taidi yẹwhenọ bo nọ biọ to togán lẹ si nado hẹn alọwle to vijinu dopolọ lẹ ṣẹnṣẹn sọgbe hẹ osẹ́n. Sinsẹ̀n he tlẹ nọ gblewhẹdo fẹnnuwiwa lẹ nọ kẹalọyi nukọntọ sinsẹ̀n tọn he nọ zanhẹ ovi lẹ gánnu-gánnu lẹ. Ṣigba, etẹwẹ Biblu plọnmẹ gando fẹnnuwiwa zanhẹmẹ tọn go? E dọ hezeheze dọmọ: “Yè klọ mì blo; galọtọ lẹ, kavi boṣiọsẹntọ lẹ, kavi ayọdetọ lẹ, kavi yọnnujọmẹ lẹ, kavi yé he nọ yí sunnu do hẹn yede gble lẹ . . . ma na dugu ahọludu Jiwheyẹwhe tọn.” (1 Kọlintinu lẹ 6:9, 10) Be hiẹ yọ́n sinsẹ̀n he nọ miọnnukundo fẹnnuwiwa zanhẹmẹ tọn lẹ ya?

Etẹwẹ na jọ do sinsẹ̀n he nọ de sinsẹ́n ylankan jẹgbonu lẹ go to sọgodo? Jesu na avase dọmọ: “Atin he ma hẹn sinsẹ́n dagbe jẹgbonu lẹpo, yè na sán ẹn liai, bosọ dọ̀n ẹn dlan miyọ́n mẹ.” (Matiu 7:19) Mọwẹ, sinsẹ̀n lalo na yin hihọliai bo nasọ yin vivasudo! Ṣigba, whetẹnu podọ nawẹ ehe na jọ gbọn? Numimọ dọdai tọn he yin kinkàndai to owe Osọhia weta 17 po 18 po mẹ, wleawuna gblọndo lọ.

Nawẹ sinsẹ̀n lalo na wá opodo gbọn?

Yí nukun homẹ tọn do pọ́n nujijọ lọ. Ayọdetọ de sinai to gbekanlin he dobu de ji. Gbekanlin lọ tindo ota ṣinawe po azò ao po. (Osọhia 17: 1-4) Mẹnu wẹ yọnnu ayọdetọ lọ nọtena? E to huhlọn yizan “do ahọlu aigba tọn lẹ ji.” E yí avọ̀ gefunwunmẹ, po nuwhẹ́nkun po do doaṣọ na ede, bosọ tindo adọkun tlala. Humọ, gbọn owọ́n etọn dali wẹ ‘yè klọ akọta lẹpo.’ (Osọhia 17:18; 18:12, 13, 23) Biblu gọalọna mí nado yọnẹn dọ ayọdetọ ehe lọ wẹ pipli sinsẹ̀n tọn lẹdo aihọn pé. E ma nọtena sinsẹ̀n dopo de poun gba, ṣigba, sinsẹ̀n he nọ hẹn sinsẹ́n ylankan jẹgbonu lẹpo.

Gbekanlin he ji ayọdetọ lọ te nọtena huhlọn tonudidọ aihọn tọn lẹ.* (Osọhia 17:10-13) Sinsẹ̀n lalo sinai do gbekanlin tonudidọ tọn ehe ji, bo to vivẹnudo nado yinuwado nudide etọn lẹ ji bosọ to anadena ẹn.

Ṣigba, nupaṣamẹ de na jọ to madẹnmẹ. “Azò ao he hiẹ mọ to ota na kanlin lọ, ehelẹ wẹ na gbẹwanna ayọdetọ lọ, bo na basi i matinhuwhẹhomẹtọnọ, bosọ hẹn ẹn jẹmẹ́, yé na dù olàn etọn, bo nasọ yí miyọ́n do fiọ ẹ gbidigbidi.” (Osọhia 17:16) To ajijimẹ, huhlọn tonudidọ aihọn tọn lẹ na diọnukunsọ sinsẹ̀n lalo bo na và ẹ sudo gbidigbidi! Gbọnna? Owe Osọhia tọn basi zẹẹmẹ dọmọ: ‘Jiwheyẹwhe ko yí do ayiha yetọn mẹ nado hẹn ojlo etọn di.’ (Osọhia 17:17) Mọwẹ, Jiwheyẹwhe na hẹn sinsẹ̀n lalo nado dogbè na walọ ylankan he mẹ e ko doalọte to oyín etọn mẹ lẹpo. Gbọn nuyiwa dodo tọn dali, e na yí galọtọgbẹ́ tonudidọ tọn etọn zan taidi nuyizan etọn nado và yọnnu ayọdetọ lọ sudo.

Etẹwẹ hiẹ dona wà eyin a ma jlo na tindo mahẹ to kọdetọn ylankan sinsẹ̀n lalo tọn mẹ? Jiwheyẹwhe na tulimẹ gbọn wẹnsagun etọn dali dọmọ: “Mì tọ́n sọn e mẹ, mì omẹ ṣie emi.” (Osọhia 18:4) Na nugbo tọn, ojlẹ lọ die nado họ̀n sọn sinsẹ̀n lalo mẹ! Ṣigba, fie wẹ hiẹ sọgan họnyi? E ma yin nado lẹzun mẹhe ma tindo yise to Jiwheyẹwhe mẹ gba, na sọgodo omẹ enẹ lọsu tọn dózin. (2 Tẹsalonikanu lẹ 1:6-9) Sinsẹ̀n nugbo wẹ yin fibẹtado dopo akàn lọ. Nawẹ hiẹ sọgan yọ́n sinsẹ̀n nugbo gbọn?

Lehe hiẹ sọgan yọ́n sinsẹ̀n nugbo gbọn

Sinsẹ́n dagbe nankọ wẹ sinsẹ̀n nugbo dona detọn?—Matiu 7:17.

Sinsẹ̀n Nugbo . . .

NỌ DO OWANYI HIA: Sinsẹ̀n-basitọ nugbo lẹ ‘mayin apadewhe aihọn tọn,’ kinklan akọ kavi aṣa tọn ma tin to ṣẹnṣẹn yetọn gba, podọ yé nọ tindo ‘owanyi na yede.’ (Johanu 13:35; 17:16; Owalọ lẹ 10:34, 35) Kakati nado to ode awetọ yetọn lẹ hù, yé nọ jlo nado kúdo ota yedelẹ tọn mẹ.—1 Johanu 3:16.

NỌ DEJIDO OHÓ JIWHEYẸWHE TỌN GO: Sinsẹ̀n nugbo ma nọ plọnmẹ “otanhoho” podọ ma nọ plọnmẹ “ogbedai gbẹtọ lẹ tọn . . . di nuplọnmẹ yetọn lẹ” gba, kakatimọ nuplọnmẹ etọn nọ sinai do Ohó Jiwheyẹwhe tọn, Biblu ji. (Matiu 15:6-9) Etẹwutu? Na “Owe-wiwe lẹpo gbingbọ́n sọn Jiwheyẹwhe mẹ yin alenọ ga na mẹpinplọn, na wọhẹmẹ, na anademẹ.”—2 Timoti 3:16.

NỌ HẸN WHẸNDO LẸ LODO BO NỌ TẸDO NUJINỌTEDO HE YIAGA WALỌDAGBE TỌN LẸ GO: Sinsẹ̀n nugbo nọ plọn asu lẹ nado nọ ‘yiwanna asi yetọn lẹ kẹdẹdi agbasa yede tọn,’ bo nọ gọalọna asi lẹ nado nọ ‘yí yẹyi do gbògbéna asu yetọn lẹ,’ bosọ nọ plọn ovi lẹ nado nọ ‘setonuna mẹjitọ yetọn lẹ.’ (Efesunu lẹ 5:28, 33; 6:1) Humọ, mẹhe tindo azọngban lẹ dona yin apajlẹ dagbenọ.—1 Timoti 3:1-10.

Be sinsẹ̀n de ko jẹ nujinọtedo ehelẹ kọ̀n ya? Owe lọ Holocaust Politics, he yin zinzinjẹgbonu to 2001, dọmọ: “Eyin susu gbẹtọvi lẹ tọn nọ hodo nuhe Kunnudetọ Jehovah tọn lẹ nọ plọnmẹ bosọ nọ wà lẹ, nuvasudo pligidi sọgan ko doalọte podọ danuwiwa akọ vivasudo tọn ma nasọ tin to aihọn mẹ ba.”

Na nugbo tọn, to aigba 235 lẹ ji, Kunnudetọ Jehovah tọn lẹ nọ plọnmẹ nujinọtedo walọdagbe tọn sọn Biblu mẹ bosọ nọ nọgbẹ̀ sọgbe hẹ nuhe plọnmẹ yé te lẹ. Mí to tudohomẹna we nado biọ to Kunnudetọ Jehovah tọn lẹ si nado gọalọna we nado plọn nuhe Jiwheyẹwhe to bibiọ sọn dè we na hiẹ nido sọgan sẹ̀n ẹn po alọkẹyi po. Din wẹ ojlẹ lọ nado yinuwa. Ma dọngbàn blo. Opodo sinsẹ̀n lalo tọn ko sẹpọ!—Zẹfania 2:2, 3.

*  Na zẹẹmẹ gigọ́ do hosọ ehe ji, pọ́n owe lọ Osọhia—Hẹndi Pete Etọn Sẹpọ! he Kunnudetọ Jehovah tọn lẹ zinjẹgbonu.