Etẹwẹ Ahọluduta Jiwheyẹwhe Tọn Yin?

1. To whenuena e tin to aigba ji, Jesu plọn hodotọ etọn lẹ nado hodẹ̀ na Ahọluduta Jiwheyẹwhe Tọn. Ahọluduta de yin gandudu de he ahọlu de nọ yin tatọ na. Ahọluduta Jiwheyẹwhe Tọn yin gandudu vonọtaun de. E yin didoai to olọn mẹ bo na dugán do aigba ehe ji. E na klan yinkọ Jiwheyẹwhe tọn do wiwe, kavi hẹn ẹn zun wiwe. E na hẹn ojlo Jiwheyẹwhe tọn zun wiwà to aigba ji dile e yin wiwà do to olọn mẹ.—Matiu 6:9,10.

2. Jiwheyẹwhe dopagbe dọ Jesu na lẹzun Ahọlu Ahọluduta Etọn tọn. (Luku 1:30-33) To whenuena Jesu tin to aigba ji, e dohia dọ e na yin Ahọlu awuvẹmẹtọ, dodonọ, po pipé po. To whenuena e lẹkọyi olọn mẹ, e ma yin zize sinai do ofin ji taidi Ahọlu Ahọluduta Jiwheyẹwhe Tọn to afọdopolọji gba. (Heblu lẹ 10:12, 13) To 1914, Jehovah na Jesu aṣẹpipa he E ko dopagbe etọn na ẹn lọ. Sọn whenẹnu gbọ́n, Jesu ko dugán to olọn mẹ taidi Ahọlu dide Jehovah tọn.—Daniẹli 7:13, 14.

3. Jehovah ko sọ ṣinyan sunnu po yọnnu nugbonọ delẹ po sọn aigba ji nado yì olọn mẹ. Yé na dugán hẹ Jesu taidi ahọlu lẹ, whẹ̀datọ lẹ, po yẹwhenọ lẹ po do gbẹtọvi lẹ ji. (Luku 22:28-30; Osọhia 5:9, 10) Jesu ylọ gandutọgbẹ́ to Ahọluduta etọn mẹ ehelẹ dọ “lẹngbọpa pẹvi.” Sọha yetọn yin 144 000.—Luku 12:32; Osọhia 14:1-3.

4. To afọdopolọji he Jesu lẹzun Ahọlu, e yàn Satani po angẹli ylankan etọn lẹ po sọn olọn mẹ wá lẹdo aigba tọn ji. Enẹwutu wẹ onú lẹ do ylan sọmọ to aigba ji fi sọn 1914 gbọ́n. (Osọhia 12:9, 12) Awhàn lẹ, huvẹ lẹ, azọ̀nylankan lẹ, jideji sẹ́nhẹngba tọn lẹ—ehe lẹpo yin apadewhe “ohia” de tọn he to didohia dọ Jesu to gandu podọ titonu ehe tin to azán godo tọn etọn lẹ mẹ.—Matiu 24:3, 7, 8, 12; Luku 21:10,11; 2 Timoti 3:1-5.

5. To madẹnmẹ Jesu na dawhẹna gbẹtọ lẹ, bo na klan yé sọn yenọzo go dile lẹngbọhọtọ nọ klan lẹngbọ lẹ sọn gbọgbọẹ lẹ go do. “Lẹngbọ” lẹ wẹ mẹhe na ko do yede hia taidi mẹjidugando nugbonọ etọn lẹ. Yé na mọ ogbẹ̀ madopodo yí to aigba ji. “Gbọgbọẹ” lẹ wẹ mẹhe na ko gbẹ́ Ahọluduta Jiwheyẹwhe Tọn dai lẹ. (Matiu 25:31-34, 46) To sọgodo he tin to yakẹ mẹ, Jesu na va omẹ taidi gbọgbọẹ lẹpo sudo. (2 Tẹsalonikanu lẹ 1:6-9) Eyin hiẹ jlo na yin dopo to “lẹngbọ” Jesu tọn lẹ mẹ, hiẹ dona dotoai hlan owẹ̀n Ahọluduta lọ tọn bo yinuwa sọgbe hẹ nuhe hiẹ ko plọn.—Matiu 24:14.

To gandudu Jesu tọn glọ, wangbẹnamẹ kavi nuvẹun ma na tin ba

6. Todin aigba yin mimá ketekete do otò susu mẹ. Dopodopo tindo gandudu etọn titi. Akọta ehelẹ nọ saba hoavun sọta yede. Ṣigba Ahọluduta Jiwheyẹwhe Tọn na diọtẹnmẹna gandudu gbẹtọvi tọn lẹpo. E na dugán taidi gandudu dopo kẹdẹ lọ do aigba lọ pete ji. (Daniẹli 2:44) Enẹgodo awhàn, sẹ́nhẹngba, po danuwiwa po ma na tin ba. Gbẹtọ lẹpo na nọ jijọho po pọninọ po mẹ.—Mika 4:3, 4.

7. To Gandudu Owhe Fọtọ́n Jesu Tọn whenu, gbẹtọvi nugbonọ lẹ na lẹzun mẹpipe, podọ aigba lọ pete na lẹzun paladisi de. To vivọnu owhe fọtọ́n lọ tọn, Jesu na ko wà nuhe Jiwheyẹwhe biọ to e si nado wà lẹpo. To whelọnu lo e na gọ̀ Ahọluduta lọ jo na Otọ́ etọn. (1 Kọlintinu lẹ 15:24) Naegbọn hiẹ ma nado dọna họntọn po mẹyiwanna towe lẹ po dogbọn nuhe Ahọluduta Jiwheyẹwhe Tọn na wà dali?

Copyright © 2006 Watch Tower Bible and Tract Society of Pennsylvania. All rights reserved.