1. Lagɔzuzukwë a ma -wʋ a-a -mää zlɩ ΄mö, ΄mö Zezwii glɩnɩ a-a ΄wë, ΄n ɔ yiɛ bhäla mä΄ä dʋdʋ ΄wʋ yi. Lagɔ ΄a -bhɛbhɛlii ΄wuë a ΄bhöönɩda ΄mö ɔ glɩnɩɛ, nza wa lɔɔ Lagɔ ΄a “tɛkäyuu.” (Kɔlɔɔsɩ a -nʋa 1: 15; ΄Klʋkälɩwɛlɩɩ 3: 14) Lagɔ ΄a tɛkäyuu ɔ wäla ɔnyɩgäsɛ, ΄mö Zezwii glɩnɩɛ. Libhonʋnyɔ a mɔɔ kä slɛlɛɛ, Zoova ghlɛnɩɛ ΄mö, ΄n ɔ yiɛ ΄pɩwʋ a -lii ΄wuë -bhɛ, -mä zlɩ ΄mö a -nɩɩ -nyɛ mä΄ä dʋdʋ ΄wʋ a -nɩɩ ΄sɔ, ΄mö Zezwii glɩnɩ a-a ΄wë, ΄n ΄ɔ yiɛ bhäla nɩkpɛ a sɛ mä΄ä dʋdʋ ΄wʋ yi. (Proverbes 8: 22-31; Kɔlɔɔsɩ a -nʋa 1: 16, 17) ΄Mö Lagɔ ΄zʋä ΄ɔ wɛlɩɩ a ΄yliwʋnyɔ ΄wʋ. Nza wa laa Zezwii “Lagɔ ΄a ngli a Wɛlɩɩ.”— Zaah 1: 1-3; ΄Klʋkälɩwɛlɩɩ 19:13.
2. Malii ΄mö Lagɔ ghlɛnɩɛ ΄mö, ΄n ΄ɔ yiɛ ΄ɔ yuu mä΄ä dʋdʋ ΄wʋ -lɛmö. Zaa Zezwii a dɩba nɩ
-bhö -aa sɛ a nɩkpɛ. Nza Zezwii ΄nɩɛ ΄nyinylolii a gugbë ΄wʋ libhïmö. Kïbhïï ta yɩ ΄kää ΄nglɩ ΄n Lagɔ yiɛ Zezwii mä΄ä dʋdʋ ΄wʋ tie miɛ dɛ΄ɛ: (1) Ɔ -kanyɩ Lagɔ ΄a -gömö a wɛlɩɩ -mii kää gbëaa ΄mö sʋlʋnɩ (Zaah 18: 37), (2) Ɔ ΄kä ΄tɩɩ nɛmö nzɩ sɛ ɔ ΄zʋä, -a ΄kä -sɩbhä ΄ɔ gbäpöö -gänɩmö (1Piɛlɩ 2: 21), nzɩ (3) ɔ ΄kä ɔnyɩ ΄wäla zɩ ɔ -kanyɩ ΄nyinylolii -nyɛ kwie ΄sɔ ΄wlu ΄mö -sɛ. Maa ΄saa ΄kä bhä ΄nglɩ ΄n Zezwii yi bhä ɔnyɩ ΄wäla ΄nɩ?— Matie 20: 28.
3. Ɛ΄ɛ -bhö nyɩasɛ, maa tɛkänɩkpɛ Adaa a Lagɔ ΄a ΄klʋkpamösɛsʋʋ ΄mö Biblë laa “΄nyinylolii.” ΄N Lagɔ yɔ kwie a -jie ΄mö ΄pä. (Genèse 3:17-19) Ɔ΄ɔɔ ΄saa Lagɔ ΄yɩbhä nʋ zaa, Lagɔ a ΄yila ΄klʋ a dɔ΄wʋ, ɔ΄ɔɔ a ΄wlɩlɩ -wʋ. Zaa ΄nyinylolinʋnyɔ ɔ glɩnɩɛ. ΄N ΄ɔ yiɛ pɛɛpɛpɛɛpɛ gɔɔ ΄n ΄ɔ yiɛ ΄ku. -Sɩbhä Adaa pïlanɩɛ ɔ yuëa ΄wuë ΄nyinylolii. -Mi΄la ΄wuë a za, -a gɔɔ, guu -lɩbhanyɩɛ ΄n
-a ΄kumöä. Sɛɛ nɩkpa ΄wuë ΄kä bhä ΄pʋpʋɛ ghlɩ ΄nɩ?— Ghlɔɔmö a -nʋa 3:23; 5: 12.
4. Sɛ Adaa ΄nɩɛ a-a ΄nyinylolii ΄mö -kä la, -sɩbhä Zezwii -wʋ möä ΄tɩɩ. Maa Zezwii ɔbhlɩ mɔ ΄zʋä Lagɔ ΄klʋkpamö tenyii, ɛ yi -mä yɔlɔylʋ ΄kɔdʋ ΄mö ma -këë, Zezwii mɔ ΄zʋä Lagɔ ΄klʋkpamö. Adaa ΄a ΄nyinylolii a za, Zezwii ΄wäla ΄ɔ zɩkpaa a ΄nɩɛ ΄nyinyloli ΄mö -kä, nzɩɩ ɔ
-kanyɩ ΄nyɩnyloli a gbʋ -gömö -sɛ. ΄Mö Biblë laa “galɛ ΄mö -sɛsʋ.” Yɩ za kwie a gbʋ bhɛnɩ a
-sɩkaa wʋ ΄kä Adaa ΄a yuëa -gömö ΄bhöö Lagɔ a ΄yila ΄klʋ a dɔ΄wʋ. -Wa tɛɛnɩɛ Zezwii dlɩ, Lagɔ bhɛnɩ a -sɩkaa ɔ ΄kä ΄wa ΄nyinylolii a gbʋ ΄yi ΄tatinɩ, nzɩɩ wa ΄kä ΄kwädlɩkwädlɩnɩ
-bhölɩ. —1Timotee 2: 5, 6; Zaah3: 16; Ghlɔɔmö a -nʋa 5:18, 19.
 |
-Mä Zezwii ΄a Lagɔ libho ΄mö, ɔ ΄cɩa nɩkpa lagɔwɛlɩɩ, ɔ -bhɛ zɩzɛlii ΄n ΄ɔ yiɛ -aa ΄wlumö ɔnyɩ ΄wäla. |
|
 |
|
5. Zezwii -wʋ a-a mä΄ä dʋdʋ ΄wʋ la, ɔ yɛmanɩ guzuwa, ɔ lia nɩkpa ngɔmʋ ΄lɩbhää, ɔ kpanɩ vuu ΄kɔdʋ, ΄n ΄ɔ yiɛ -wa yɛ ΄ku ΄wë a -bɛ glu -sɛ. ΄Saa kä bhä ΄nglɩ ΄n ΄ɔ yi bhä zɩzɛlii -bhɛ ΄nɩ? -Mii ΄kää nglɩ ΄n ΄ɔ yiɛ zɩzɛlii -bhɛ ΄miɛ dɛ΄ɛ: (1) Nɩkpa wa yɔlɔ a ngäzɩ mii lɩbhɔɔ nza ɔ ΄yɩbhää ɔ ΄kʋä kwänɩ. (2) ΄Ɔ zɩzɛlii mii tulanɩɛ nɩkpa ΄ylimö nɩɩ, Lagɔ ΄a yuu ΄mö ɔ glɩnɩɛ
-tiamö. (3) Ɔ -kä dʋdʋ ΄wuë a ΄Kämanɔ ΄wʋ ΄libhï, ΄saa ɔ kää -wa -zoo ΄klʋkpamö ΄wlu nʋʋ, ΄mö ɔ zɩzɛlii tulanɩɛ ΄ylimö—Matie 14:14; Maakö 2: 10-12; Zaah 5: 28, 29.
6. Zezwii ΄kuä ΄wëë, ΄n Lagɔ yoo glu -sɛ. Lagɔzuzukwë a sɛ ɔ -zʋä ΄n ΄ɔ yiɛ -mä zlɩ ΄mö ΄wlu ΄sɩbhä. (1Piɛlɩ 3:18) Tɛɛnɩ a -lɛ, Lagɔ yoo ΄kämanɩnyɔ ΄kɔdɔ ΄wʋ ΄zʋa. -Lɛ ΄naa ΄kä a΄a ΄mö gwälɛ ΄n Zezwii ΄kää bhäla mä΄ä dʋdʋ ΄wʋ a ΄nyinylolii -nyɛ yɔlɔylʋ ΄sɔ ΄yli bhɩa. Psaume 37: 9-11; Proverbes 2: 21, 22. |
