1. Lagɔ Zoova -wʋ ΄wlɩlɩ, ɔ -wʋ ΄ɔ dɛ. Zaa ɔ yɩbhä nɩɩ, ΄ɔ -nʋa nɩ -wʋ ΄wlɩlɩ ΄yize -mä ΄wa Lagɔbʋbɔsaa ΄mö, -mä ΄wa nɛmönɛmösaa ΄mö, -mä ΄wa dlɩpäsaa -nyɛ ΄wa -wʋwʋsaa ΄mö ΄sɔ. (1Piɛlɩ 1:16) Nɩkpɛ kä ɔ ΄kä Lagɔ a ΄yila ΄klʋ a dɔ΄wʋ ΄wlɩlɩ -wʋ nʋ, ΄yli yɔwʋ ɔ ΄kää tɛɛmanɩ. Ɛ΄ɛ -bhö nyɩasɛ, maa -sɩkaa a zɩkpa -a -wʋä ΄mö ΄nɩɛ ΄wlɩlɩ -wʋ. -Sɩbhä a za -a
-nyɛ -aa ΄nyinylolii a mötɛɛnɔ ΄sɔ kää tʋ gwɩ. Maa swɩ nɩ -tɩnyɩ yɔwʋ ΄kunɩ.
2. ΄Wlɩlɩ -wʋwʋɛ -mä -a΄a lagɔbʋbɔsaa ΄mö: -A kä -a ΄kä Zoova bʋbɔ nʋʋ, -a nɩ panɩ ΄fʋ a lagɔgligbïï -nyɛ yɩ ΄cɩawɛlɩɩ ΄n yɩ päpägböö ΄sɔ -gömö. -A kä -a ΄kä ΄fʋ a lagɔgligbïï ΄mö ΄wlʋ. A nyʋa ΄sɔ nɩ tɩ΄ɛ bhʋ -bhlʋ yɩ. (2 Kɔlɛɛtɩ a -nʋa 6: 14-18; ΄Klʋkälɩwɛlɩɩ 18: 4) ΄N -a nɩ
-kä Lagɔ a dɔ΄wʋ gbëa ΄cɩɛ ΄wëë, -a nɩ ΄nɛmanɩ -anyɩ ΄wʋ, nɩkpa -mumuë -tɩnyɩa ΄wa yiowɛlɩ ΄mö dulanɩ.—2 Zaah 10, 11.
3. ΄Wlɩlɩ -wʋwʋɛ -mä -aa nɛmönɛmösaa ΄mö: Zoova yɩbhä nɩɩ, ΄ɔ -nʋa nɩ nɛmö ΄kwädlɩ lagɔsɛ. (1Piɛlɩ 2:12) -A -bhɛbhɛlii ΄wuë yɩ yi zizaa a bhë -këë, ɔ ΄yila ΄klʋ yɩ pöä. (Ebleewaa 4:13) -A kä -a ΄kä mä΄ä ΄pɩwʋ a -lizoku -nyɛ ΄ngwlɩ -nyɛ nyɩbhɛlɩ ΄sɔ a sɛsɛnɩ sɛsɛnɛ kɛ΄mö -sɛ. 1Kɔlɛɛtɩ a -nʋa 6: 9-11.
4. ΄Wlɩlɩ -wʋwʋɛ -mä a dlɩpäsaa ΄mö: -A -kä kwädlɩ -li a -lii dlɩ ΄wʋ pää, -a΄a nɛmönɛmösaa yi ΄wlɩlɩ -wʋ. (Filiipö a -nʋa 4: 8) Maa ΄n -a΄a dlɩ ΄wʋ pää -lii -kä zokuu glɩnɩ ΄yize, -lizoku -a ΄kää nʋ. (Matie15: 18-20) ΄Bhlibhli -lii ΄wuë yɩ ΄kää -a΄a dlɩpäsaa fɩ päla, -a nɩ tɩ kɛ zɩ. –A -kä ΄kwädlɩ lagɔwɛlɩɩ ΄cɩɛ, -a΄a dlɩpäsaa yi ΄wlɩlɩ -wʋ.
5. ΄Wlɩlɩ -wʋwʋɛ -mä -a΄a -wʋwʋsaa ΄mö: Lagɔ a tietiewaa wa glɩnɩɛ za, Klɩtiɛwaa a ΄möpälabanɩ -nyɛ ΄wa kpökpöö ΄sɔ, kä yɩ ΄kä ΄wlɩlɩ -wʋ. -A -kä ΄kwlɛ yɔwʋ ΄bhöö, -A kä -a ΄kä kɛ wɔlʋ. -A -kä΄ɛ lile kɛ zɩɛ yie, -a kä -a ΄kä kɛ wɔlʋ ΄wë, nzɩ -a ΄kä li. ΄N a nɩ ΄kwlɛ yɔwʋ ΄mö nɩ dɛ -kä, a -kä ΄kwlɛ yɔwʋ möä, a kä a ΄kä ΄bhlu, nzɩ a -kä zɛmö bhɩɛ ΄wë, a ΄kä -lɛ ΄wʋ wɛnɩ. (Deutéronome 23: 12, 13) -Wʋwʋsa ΄mö a ΄wlɩlɩ -wʋwʋɛ mɛ kä ΄nglɩ ΄n gu nɩ ΄lɩbhää nɩkpɛ. -Sɩbhä a za Klɩtɩɛ a -budu ΄mlɩ -nyɛ ΄wʋ yɔwʋ ΄sɔ, kä wʋ ΄kä ΄wlɩlɩ -wʋ. Dɛ ɔ glɩɛ a -nʋa kä wa ΄kä ΄ɔ -buduu ΄nine ΄mö ΄pänɩ.
6. Wlɩlɩ -wʋwʋɛ -mä -a΄a bhïlawɛlɩ ΄mö: Lagɔ a -nʋa kä wa ΄kä ΄kwädlɩ gbëaa bhïla. Ɛ΄ɛ -bhö nyɩasɛ, maa yiowaa ΄nɩɛ -mä Lagɔ a ΄Pɩwʋlelea ΄wʋ ΄bhle -kä. (Ɛfɛɛzɩ a -nʋa 4:25; ΄Klʋkälɩwɛlɩɩ 21:8) Klɩtiɛwaa ΄nɩɛ wa ΄kä wɛlɩzoku ngli -kä. Wa΄a -ɔɔzʋkäwɛlɩ ΄yukwli -pʋnɩ, ΄n wa ΄nɩɛ -sɛmö. Ɛ yi -mä libhoo ΄mö oo, ɛ yi -mä -sukumö ΄mö oo, -mä ΄wa glɩ da ma oo, nɩkpa ΄wuë yi sɛ nɩɩ, ΄wa nglii a wɛlɩ ΄wuë ΄wlɩlɩ yɩ -wʋä. Ɛfɛɛzɩ a -nʋa 4: 29, 31; 5: 3.
| Lagɔ a -nʋa kä wa ΄kä-mä -lii ΄wuë ΄mö a dɔ΄wʋ ΄wlɩlɩ -wʋ. |
 |
|
