Nʋnʋlii yɩ nyuä Lagɔ dlɩ yɔwʋ - Zoova ΄a Bhlɩnɩwaa a Watchtower Society a Site Web 'bhli lowliwa nyɛ 'bhlibhë ' wʋë yiɛ

Zoova ΄a Bhlɩnɩwaa a Watchtower Society a Site Web 'bhli lowliwa nyɛ 'bhlibhë ' wʋë yiɛ

Beliefs

Future

΄Saa Lagɔ yɩbhä bhä -a nɩ nʋ ΄nɩ?

΄cɩɛcɩɛ kïbhë 10

Nʋnʋlii yɩ nyuä Lagɔ dlɩ yɔwʋ
	-Lizoku yɩ ΄nɩɛ Lagɔ ΄yila ΄klʋ ngwa, sɛ -a ΄libhï bhä ΄wʋ ΄nɩ? (1)
	Nyɩbhɛlʋ -nyɛ nglɔ ΄sɔ a glɩglɩsɛ a -mii nɩ bhä nɛnɩ ΄nɩ? (2)
	Sɛ Klɩtiɛ ΄libhï bhä: yio ΄wʋ ΄nɩ? (3) ΄bhlibhlie ɛ kää moni gwë ΄wʋ ΄nɩ? (3) ΄wi ΄wʋ ΄nɩ? (3) yɔwʋ kälɩkälɛ ΄wʋ ΄nɩ? (4) gukäkʋ ΄wʋ ΄nɩ? (5) nʋnɩmänɩmʋ ΄wʋ ΄nɩ? (6)
	Sɛ nɩkpɛ ΄kä bhä ɔ nʋnʋlizoku kɛ΄mö -sɛ nɩ? (7)

1. Yɩ nɛnɩɛ, ΄mö Lagɔ a -nʋa -waa. Maa -lizoku ΄wuë a -gömö panɩ panɛ, ΄mö wa kää wa ΄kä ΄cɩɛ. (Psaume 97: 10) Mɩɩ sɛ zɛmö nɩɩ, wa nɩ tɩɩ nʋnʋlii yɩ ΄nɩɛ Lagɔ dlɩ yɔwʋ nɛnɩ kɛ zɩ. Nʋnʋli a -mii bhä ΄nɩ?

2. Nyɩbhɛlɩɩ -nyɛ ngwlɩɩ ΄sɔ a sɛsɛnɩ sɛsɛnɛ: -Mumuë ΄nɩɛ -bhlɛ kwäkwänɩ ΄n wa -wʋä ΄nglɔ -nyɛ ΄luwli ΄sɔ ΄mö. Nglʋsɛtɛlɩtɛlɛ -nyɛ gbɩsɛtɛlɩtɛlɛ ΄sɔ, nɩkpa -wa -nyɛ nɩma pöä nɩkpa a sɛ sɛɛ, -wa -nyɛ wanyɩ a -daayuë pöä sɛ, -wa -nyɛ wa ΄bhɩanyɩbhɛlɩ pöä ΄ngwlɩ a sɛ sɛ, yɩ ΄wuë ΄nyinylolii a kädɩ yɩ glɩnɩɛ -mä Lagɔ a yila ΄klʋ a dɔ΄wʋ. (Lévitique 18:6; Ghlɔɔmö a -nʋa1: 26, 27; 1Kɔlɛɛtɩ a -nʋa 6:9, 10) Nɩkpa ΄sɔ -kä ΄nglɔ -nyɛ ΄luwli ΄sɔ ΄mö -wʋ, ΄n wa nɩ -bhlɛ kwäkwänɩ, wa kä wa ΄kä yɔwʋ ΄bhöö bhöönɩ. Wa kä΄ɛ wa ΄kä ΄wʋ glɩnɩ nʋʋ, -mä ΄bhlɩlowluwaa dlɩ ΄mö, -mä wa kää wa ΄kä kwäkwänɩɛ mö. Ebleewaa 13: 4..

Nʋnɩmänɩmʋ, yɔwʋ kälɩkälɛ, ΄bhlibhlie ɛ kää moni gwë -nyɛ ΄Wi ΄sɔ ΄nɩɛ Lagɔ dlɩ yɔwʋ nɛnɩ.

3. Yio, ΄Bhlibhlie ɛ kää moni gwë -nyɛ ΄Wi ΄sɔ: Lagɔ Zoova gbëa ɔ kää nglii. (Tiitɩ 1:2) Nɩkpa -kä wa ΄kä Lagɔ dlɩ yɔ΄wʋ nɛnɩmanɩ nʋʋ, wa΄aa wa ΄kä yio -kä. (Proverbes 6: 16-19; Kɔlɔɔsɩ a -nʋa 3: 9, 10) ΄Bhlibhlie ΄wuë ɛ kää moni gwë, -lii ΄wuë a ΄tʋzokwëa ɛ kää gwë. Nza Klɩtiɛwaa nɩ ΄pä möä ΄bhlibhlie ɛ kää moni gwë, miɛ nɩɩ, lotolii, PMU, -nyɛ Bigoo ΄sɔ. (Ɛfɛɛzɩ a -nʋa 5: 3-5) Klɩtiɛwaa nɩ ghli ΄wi. Wa pɩamö΄ɛ -lii wa yiɛ sɛ nɩɩ ΄wi ghli -lii yɩ glɩnɩɛ ΄n wa ΄libhï΄ɛ ΄wi ΄mö käbönɩkpɛ a -lu ΄wʋ. — Exode 20:15; Ɛfɛɛzɩ a -nʋa 4: 28.

4. ΄Klɛkäkʋ, -nyɛ Yɔwʋ Kälɩkälɛ ΄sɔ: Nɩkpɛ nɩ ɔ klɛ dʋdʋ ΄wʋ -lɛmö, ɔ yi ΄ku ΄lɩbhä. (Genèse 4: 5-8) Nɩkpɛ -kä yɔwʋ kälɩnyɔ glɩnɩ, ɔ΄ɔɔ bhɛnɩ ɔ ΄kä Lagɔ a bheyi zʋ. (Psaume 11:5; Proverbes 22: 24, 25) Kpa -sɛsʋ ΄nɩɛ nɛnɩ, -sɩbhä a za ΄n nɩkpɛ -kanyɩ -lizoku ΄wlu nʋʋ, -a nɩ tɩ yɩ kpa -sɛ. —Proverbes 24:29; Ghlɔɔmö a -nʋa 12:17-21.

5. Gukäkʋ: Göpögöpöwaa -mumuë -wʋ -lɛ, ΄wʋ wa yɩbhää ΄n wa göpöä gwii. -Mumuë ΄lɩbhä΄ɛ wa -gblɩwa gu ΄mö, nzɩ gu ΄kʋä ΄lɩbhä wa ΄kä ΄ku. Sataa mɔɔ -wʋä -lizoku ΄la ΄wuë nimï. Nza Klɩtiɛwaa ΄nɩɛ -kä wa ΄kä gukäkʋ a kii ΄wuë kɛ zɩ. (Deutéronome 18:9-13) ΄N wa -kanyɩ gu ΄mö ΄lɩbhää, Zoova a ΄yize -kpöö ΄mö -a ΄kää yɔwʋ glɩ, mɔɔ -lɛ -a΄a ΄wʋ yinyɔ kɔdɔ mɔ.—Proverbes 18: 10.

6. Nʋnɩmänɩmʋ: Wa΄aa nʋ nɩɩ -a nɩ tɩ nʋ ΄nɩmä nʋ, maa -a bhɛnɩ -a ΄kä duvɛɛ yie, biɛlɩ yie, -nyɛ nwɩɩ -mimii ΄sɔ ΄nɩmä (Psaume 104:15; 1Timotee 5:23). Maa -a ΄kä tenyii nʋ ΄nɩmä -këë wʋ -kanyɩ lɩbhä, mɩɩ ΄nɩɛ Lagɔ dlɩ yɔwʋ nɛnɩ. (1Kɔlɛɛtɩ a -nʋa 5: 11-13; 1Timotee 3:8) -A -kä tenyii nʋ ΄nɩmää, wʋ bhɛnɩ wʋ -kanyɩ gu ΄lɩbhää, wʋ yi -a΄a ligbëa nyima. Wʋ bhɛnɩ΄ɛ wʋ -kanyɩ -mä ΄sunɩ -a ΄kä -lizoku ΄mö bhlinɩ.—Proverbes 23: 20, 21, 29-35.

7. Nɩkpa wa -nʋä ΄saa ΄nɩɛ Lagɔ dlɩ yɔwʋ nɛnɩ, wa΄aa -mä “Lagɔ ΄a ΄pɩwʋlelea ΄wʋ ΄bhle -kä.” (Galatii a -nʋa 5: 19-21) A -kä Lagɔ a -waa -tiasɛ nʋʋ, a -kä΄ɛ a ΄kɔ dlɩ yɔwʋ nɛnɩmanɩ nʋʋ, a kä a ΄kä -lizoku ΄la kɛ΄mö -sɛ. (1Zaah 5: 3) -Lizoku -mii ΄nɩɛ Lagɔ dlɩ yɔwʋ nɛnɩ a gömö panɩ panɛ, ΄mö a nɩ ΄cɩɛ. (Ghlɔɔmö 12:9) Nɩkpa wanyɩ nɛmönɛmösaa nɛnɩɛ Lagɔ dlɩ yɔwʋ, ΄mö a kää a -nyɛ ΄kä wʋ-bhlinɩ. (Proverbes 13:20) -Mä Lagɔ a -nʋa gla΄mö, wa ΄nɛɛnɩɛ lagɔwɛlɩɩ a dɔ΄wʋ ΄ylimö, wa bhɛnɩ wa kanyɩ kwänɩ. (Zaakö 5:14) -Lii ΄la ΄wuë ΄mö a dɔ΄wʋ, a nɩ tɛɛnɩ Lagɔ a kwänɩkwänɛ dlɩ -mä bhibhebhibhiu ΄mö.—Filiipö a -nʋa 4: 6, 7, 13.

Wa –bhɛnɩɛ 2007
Copyright © 2012 Watch Tower Bible and Tract Society of Pennsylvania. All rights reserved.