ПЕЗЭ
КЕНГЕЛИЦЯ
РЕЛИГИЯНТЬ МАЛАСО!

Мезе истямось кенгелиця религиясь? Ацирьгавтыть ли тынк берянь тевтне, конатне теевить религиянть лемсэ? Токави ли седеенк, зярдо марятадо войнадо, терактто, конатнень теицятнень ютксо улить кортыцят, буто сынь важодить Пазонтень? Савты ли кеженк се, зярдо религиянь тевень теицятне ярмакто тейнить эрьва кодат берянь тевть? Мекс ламонь ризкстнэнь ды мелявкстнэнь коренсо ашти религиясь?

Чумонть неть берянь тевтнень кис кандыть аволь весе религиятне, анцяк кенгелиця религиясь. Иисус Христос, конанть пек ловить ламо кемицятне, мерсь, што кенгелиця религиясь, кода берянь чувтось, «чачты амаштовикс умарть» (Матв. 7:15—17). Кодат жо умарензэ кенгелиця религияньть?

Кенгелиця религиясь...

ПРИМИ УЧАСТИЯ ВОЙНАТНЕСЭ ДЫ ЭЦИ ПОЛИТИКАС. Журналсо «Эйшауик» сермадозь: «Весе Азияванть ды лия таркатнева оймеялтонь прявтнэ азорксчинть кис бороцямсто манчезь саить эстест лезэ сынсест кемицятнень вельде». Седе тов журналсоньть ульнесь сермадозь: «Минек масторлангось аламонь — аламонь ормаскады». Вейке американь религиозной деятелесь мерсь: «Эряви маштомс террористнэнь, штобу лоткавтомс сынст терророст». Кодат сонзэ бороцямонь методонзо? «Маштынк сынст весень минек Азоронть лемсэ!» Библиясо жо сермадозь: «Кие корты: «Мон вечкса Пазонть»,— сонсь кирде кеж эсензэ кемиця ялганзо лангс, се кенгелиця» (1 Иоанн. 4:20). Теде ламо Иисус кортась: «Вечкеде эсенк душмантнэнь» (Матв. 5:44). Ламо ли муевить религият, конатнень кемиця ялгатне а примить участия войнатнесэ?

СРАВТНЕ КЕНГЕЛИЦЯ ТОНАВТОМАТ. Ламонст религиятне тонавтыть: оймесь эли оймеялтось — те анеявикс вий, кона ломаненть куломсто лиси рунгонзо потсто ды эри седе тов. Те тонавтомась ламонст религиятненень канды сюпавчи. Эсь кемицятнень пельде кемикуротнесэ саить ярмакт кулыця ломатнень оймест коряс озномонть кис. Библиясо тень коряс сермадозь лиякс. «Пежетьс совиця оймесь, се кулы» (Езек. 18:4). «Эрицятне содыть — сы куломась, кулозтне мезеяк а содыть» (Экл. 9:5). Иисус тонавтсь кулозтнень вельмемадо. Бути оймесь акулыця Иисусонь тонавтомась карми смустемка (Иоанн. 11:11—25). Тонавты ли тынк религиясь буто оймесь а кулси?

А ЧУМОНДЫ УСКУРЯМОНЬ — УСКСЕВЕМАНЬ ТЕВТНЕНЬ. Чи озамо масторга кой — кона кемикуротнесэ путыть попокс цера цера марто ды ава ава марто удсицят, вешить прявтнэнь пельде мерема урьвакстомань — венчамонь регистрация цера цера марто ды ава ава марто. Натой сеть кемикуротне, конатне чумондыть ускурямонь — усксевемань тевтнень, кирдить корост удсиця эйкакш марто поптнень. Мезнень тонавты Библиясь? Сонзэ эйсе чарькодевикстэ сермадозь: «Илядо ильведсте эсь прянк! Сеть, кить усксевить — ускурить, эли сюконить аволь алкуксонь Пазнэнь, эли кить авидечисэть мирде — ни икеле, истя жо цера цера марто удсицятне... а совавить Пазонть Инязорксчинтень» (1 Кор. 6:9, 10). Содатадо ли тынь религият, конат кирдить кор ускурямонь — усксевемань тевтнень коряс?

Мезе учи сеть релгиятнень, конатне чачтыть амаштовикс умарть? Иисус мерсь: «Эрьва чувтонть, кона паро умарть а чачты, керясызь, ды толс каясызь» (Матв. 7:19). Неть валтэ невтить: кенгелиця религиясь карми керязь ды емавтозь! Кода ды зярдо те ушодови? Те кевкстеманть лангс каршо валось муеви Библиясто, Апокалипсис книганть 17 ды 18 главатнестэ.

Кода кенгелиця религиясь сы пезензэ?

Арседе: тандавкс идем ракшанть копорензэ лангсо ласте ашти ускуриця ава. Идем ракшанть сисем прят ды кемень сюрот (Апок. 17:1—4). Кие истямось те ускуриця авась? Сонзэ ули виезэ весе «масторлангонть инязортнэнь» лангсо.Сон оршазь парсеень, чопода якстере ды валдо якстере коцтсо, сонзэ ули фимиамозо ды экшели сюпавчисэ. Теде башка, мунямонзо эйсэ сон «виде ки лангсто пурдавты весе раськень ломантнень» (Апок. 17:18; 18:12, 13, 23). Библиясь максы чарькодемс миненек: те ускуриця авась — весе масторонь кенгелиця религиятне. Сон эсензэ эйсэ невти аволь кодамо-бути вейке, а весе религиятнень, конатне чачтыть амаштовикс умарть.

Идем ракшась, конанть лангсо ашти озадо ускуриця авась, те весе масторлангонть политикань империясь* (Апок. 17:10—13). Кенгелиця религиясь ашти озадо те политической идем ракшанть лангсо, снартни велявтомс эсензэ пелев идем ракшанть тевень тееманзо ды путы азорксчи лангсонзо.

Курок теевить дивань полавтовкст. Библиясо евтазь: «Неть кемень сюротне, конатнень тон неить, ды идем ракшась кежэйгадыть те ускуриця аванть лангс ды сезнесызь оршамонзо, кадсызь сонзэ кепе — штапо.Сынь азарьстэ порьсызь сонзэ рунгонзо ды пултасызь толсо» (Апок. 17:16). Апак учо масторлангонь инязортнэ пек кежейстэ прыть кенгелиця религиянть лангс ды целанек сонзэ емавтсызь! Кие максы сынест истямо мель? Библиясо Апокалипсис книгасонть евтазь: «Пазось путсь инязортнэнь седейтнес бажамо топавтомс Сонзэ арсеманзо» (Апок.17:17). Кода неяви, Пазось терьдсы кенгелиця религиянть каршо мереме весе кежтевтнень кис, конатне тейнезь Пазонть лемсэ. Пазось, виде тевензэ коряс, эстензэ саи лезэ политической усксевскензэ вельде, ды путы седейтнес бажамо топавтомс эсь судямонзо.

Мезе теемс тыненк, зярдо арась меленк емамс кенгелиця религиянть марто? «Монь раськем, кадык Вавилононть!»,— терди Пазонть евтыцясь (Апок. 18:4). Нейке шказо лисемс кенгелиця религиясто. Ды кува вешнемс кекшема тарка? Ансяк аволь атеизмасо. Сонзэяк аразь икелепельксэзэ (2 Фесс. 1:6—9). Вейкине кекшема тарка — алкуксонь религиясь. Кода сонзэ содамс?

Кода содамс алкуксонь религиянть

Кодат паро умарть чачты алкуксонь религиясь? (Матв. 7:17).

Алкуксонь религиясь...

НЕВТИ ВЕЧКЕМА. Алкуксонь Пазонь важодицятне «аволь масторлангонть пельде».Сынст а явить национальной ды расовой пирявкстнэ.Сынст ютксо ашти вечкемась (Иоанн. 13:35; 17:16; Ап. т. 10:34—35). Сынь зярдояк а кармить маштомо эсест вейсэнь озныцятнень,— седеяк, сынь анокстыть максомс эрямост сынст кисэ (1 Иоанн. 3:16).

СЕДЕ ПЕК КЕМИ ПАЗОНТЬ ВАЛОНТЕНЬ. Алкуксонь религиясь а тонавты «койтненень»ды «ломанень теевть кармавтовкстнэнень» — сон теи весе эсензэ тонавтоманзо Пазонь Валсто, Библиясто (Матв. 15:6—9). Мекс? Секс што «весе Сермадовкстнэ чачтозь Пазонть Оймеялтонзо вельде ды лезэвть. Сынь тонавтыть минек, ливтить лангс пежетенек, аравтыть виде ки лангс» (1 Тим. 3:16).

КЕМЕКСТЫ СЕМИЯТНЕНЬ ДЫ КИРДИ СЭРЕЙ ОБУЦЯНЬ НОРМАТНЕНЬ. Алкуксонь религиясь тонавты мирдтнень «вечкемс эсь нитьнень, кода эсест рунгост», нитненень сон лезды тонавтнемс «ваномс мирдензэ меленть», ды тонавты эйкакштнень кунсоломс тетятнень — аватнень (Эф. 5:28, 33; 6:1). Теде башка, сетнень, кинень максозь азорчи, эряви эстест улемс обуцянь невтевксэкс (1 Тим. 3:1—10).

Топавты ли кодамояк религиясь истямо тердевкс? Книгасонть «Холокостонь политикась» конась нолдазь 2001 иестэ, кортави: «Бути седе ламо ломанть эрявольть Иеговань Свидетелензэ ладсо, кемевельть сенень, мезде евтнить неть кемицятне, модалангонь эрицятне а нолдавлизь Холокостонть, ды ломантне зярдояк авольть тандале геноцидэнть эйстэ» (Holocaust Politics).

Иеговань Свидетелензэ аволь ансяк евтнить библиянь принциптьнеде 235 масторга ды территориява, ды сынсь кирдить эйсэст. Минь рекомендоватано тыненк пшкадемс Иеговань Свидетелензэ туртов, штобу содамс Пазонть тердевксэнзэ ды тонавтнемс сонензэ савтомантень.Ней шказо важодемс. Котьмамс шка арась. Кенгелиця религиянть пезэ маласо! (Соф 2:2, 3).

*  Седе ламо те кевкстеманть коряс сермадозь книгасонть «Апокалипсис: сонзэ сех покш тевезэ маласо!», конань нолдызь Иеговань Свидетелензэ.