Na Cava Sara Mada e Kaya na iVolatabu?

SE MANI niusiveva cava o wilika, porokaramu ni retioyaloyalo cava o sarava, se siteseni cava ena retio o vakarorogo kina, o na vakadinata ni sa ka ni veisiga na basulawa, ivalu, kei na vakacaca ni batikadi! Vakacava na leqa sara ga o dau sotava? De dua e vakamosia voli na yalomu ena gauna oqo na nona tauvimate se mate e dua na wekamu voleka. O rairai vakila tale ga na ka a yacovi Jope ni a kaya ni ‘vakamalumalumutaki koya na levu ni nona rarawa.’—Jope 10:15, The Holy Bible in the Language of Today.

Tarogi iko mada:

• Oqo beka na inaki ni Kalou vei au kei na kawatamata kece?
• O cei e rawa ni vukei au ena noqu leqa?
• Ena yaco beka na bula vakacegu e dela i vuravura?

E veivakacegui na ka e kaya na iVolatabu me baleta na veika oqo.

E KAYA NA IVOLATABU NI OQO E SO NA VEISAU ENA VAKAYACORA NA KALOU E VURAVURA.

“E na tavoya tani [na Kalou] na wai ni mata kece ga mai na matadra . . . ka sa na sega tale na mate; sa na sega tale ga na rarawa se na tagi se na vutugu, ni ra sa takali tani na veika makawa.”—Vakatakila 21:4, VV

“Ena qai ladelade na lokiloki me vaka na me kila.”—Aisea 35:6

“Ena qai rai na matadra na mataboko.”—Aisea 35:5

“O ira kece era tu ena ibulubulu e nanumi ira tu na Kalou . . . era na lako mai kina.”—Joni 5:28, 29, NW

“Na lewe ni koro ena sega ni kaya, Ka’u sa tauvi mate.”—Aisea 33:24

“Ena sa tu e vuravura . . . na sila e qumi rawarawa ga.”—Same 72:16

ME YAGA VEI IKO NA KA E KAYA NA IVOLATABU

Kua ni nanuma ni tadra wale ga na veika e tabaki. Sa yalataka na Kalou ni na vakayacora na veika oqo, sa vakamacalataka tale ga na iVolatabu na sala ena vakayacori kina.

Ia, sega ni koya ga oya na ka e kaya na iVolatabu. E vakarautaka tale ga na yavu mo marautaka kina na bula ena gauna sara mada ga oqo. Vakasamataka mada na veika o dau lomaocaocataka kei na leqa o dau sotava. Leqa beka vakailavo, leqa vakavuvale, tauvimate, se nona takali e dua na wekamu voleka. E tu ena iVolatabu na ivakasala yaga ena veika e vauca na nomu leqa ena gauna oqo, ena vakacegui iko tale ga ena saumi ni lomatarotaro vaka oqo:

• Na cava eda rarawa voli kina?
• Eda na walia vakacava na noda nuiqawaqawa?
• Na cava meda cakava meda marautaka kina noda bula vakavuvale?
• Na cava e yacovi keda nida mate?
• Eda na raici ira tale beka na wekada voleka era sa takali yani?
• Na ivakadei cava e tu meda kila kina ni na vakayacora dina na Kalou na nona vosa ni yalayala?

Nomu wilika tiko na ivola oqo e dusia ni o vinakata mo kila na ka e kaya na iVolatabu. Ena yaga vei iko na ivola oqo. O na raica ni vakarautaki na taro ni veiparakaravu ena boto ni drauniveva. E vica vata na milioni era sa vakadinadinataka na yaga ni nodra veivosakitaka vata na iVolatabu kei ira na iVakadinadina i Jiova ni taurivaki na ivola e dau vakarautaki na kena taro. E nuitaki ni na yaga tale ga vei kemuni. Me vakalougatataki kemuni mada ga na Kalou ena nomuni vulica na ka sara ga e kaya na iVolatabu!

KILA NA NOMU IVOLATABU

E TIKO ena iVolatabu e 66 na ivola. Era wasei na ivola yadua ena vica na wase ra qai wasewasei tale na wase ena vica na tikina, me vakarawarawataka noda wilika. Nira volai na tikinivolatabu ena ivola oqo, na imatai ni vika ni volai oti na yaca ni ivola e dusia na wase ni ivola, na ikarua ni vika e dusia na tikina. Kena ivakaraitaki, na “2 Timoci 3:16” e vakaibalebaletaki ena ikarua ni ivola vei Timoci, wase 3, tikina e 16.

Ena totolo sara na nomu kila na iVolatabu ke o vakacega na veitikinivolatabu era volai ena ivola oqo. Kena ikuri, vakacava mo saga mo dau wili iVolatabu e veisiga? Ke o dau wilika e tolu, va, se lima na wase ena dua na siga, sa rawa ni o wilika tasevu na iVolatabu ena loma ga ni dua na yabaki.