SA VOLEKA
NA ITINITINI NI
LOTU LASU!

E kilai vakacava na lotu lasu? O dau vuturitaka na veika ca e caka tiko ena yaca ni lotu? O lomaleqa ni o raica na ivalu, vakamate tamata vakaveitalia, kei na veivaqumi era cakava tiko o ira era kaya nira qarava na Kalou? Ke dikevi na veika ca e yaco tiko nikua, levu ga na gauna ena kunei ni lotu sara ga e vu tiko ni veika ca oqori. Baleta na cava?

Ke raici vinaka, e sega ni leqa na lotu kece, e leqa ga na lotu lasu. A kaya o Jisu Karisito ni lotu lasu ena dau vuataka ga na vua ca, me vaka ga ni ‘kau ca ena vuataka na vua ca.’ (Maciu 7:15-17) Na cava gona na vua ni lotu lasu?

Lotu Lasu

VAKAITAVI ENA IVALU KEI NA POLITIKI NA LOTU LASU: “Mai Esia kei na veivanua tale e so,” e kaya na ivola Asiaweek, “era dau veisiwati na iliuliu era koco itutu ena nodra vakayagataka vaqaseqase e so na ivakavuvuli vakalotu e dau talei sara vei ira na lewenivanua.” Mani tauca na ivakaro oqo na ivola oya: “Sa kena irairai gona ni sa na qai torosobu ga o vuravura.” Dua na iliuliu levu ni lotu mai Mereke e kaya oqo: “Ena qai oti ga na veivakamatematei ke ra vakamatei taumada na dauvakacaca (terrorist).” E vakatura o koya na iwali oqo: “Mera vanalaki taucoko ena yaca ni Turaga na dauvakacaca.” Na kena veibasai e kaya na iVolatabu: “Kevaka sa kaya e dua, Au sa lomana na Kalou, a sa cata na wekana, sa lasulasu ko koya.” (1 Joni 4:20) Bau kaya sara o Jisu mera ‘lomani na keda meca.’ (Maciu 5:44) E vica mada na lotu o rawa ni cavuta nira vakaitavi sara tiko ga ena ivalu na lewedra?

VAKATETEA NA IVAKAVUVULI LASUTAKI NA LOTU LASU: Levu na lotu e nodra ivakavuvuli ni bula tiko ga na yalo ena gauna sa mate kina na yago. Na ivakavuvuli oqo era dau rawaka kina na veilotu vaka oqori, oya ena nodra lavaka me saumi na veimasulaki e caka ena vukudra na sa takali, ni nanumi nira se bula tiko. Ia e duatani na ka e vakatavuvulitaka na iVolatabu. “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka.” (Dauvunau 9:5, neitou na matanivola kala.) A vakavulica o Jisu ni o ira na mate era na vakaturi—ena tawayaga gona na veivakaturi ke dina na vakasama ni sega ni mate na yalo ni tamata. (Joni 11:11-25) Vakaevei, e dau vakavulici beka ena nomu lotu ni sega ni mate na yalo?

VAKATARA NA VEIYACOVI TAWAKILIKILI NA LOTU LASU: Ena levu na lotu ena so na vanua, era dau lesi mera italatala e so e kilai nira dau veimoceri vakatagane se veimoceri vakayalewa. Ra dau surevaka tale ga na veilotu oqori me vakalawataki na veiwatini vakatagane se vakayalewa. Na veilotu mada ga era vakacala na veidauci e laurai tale nira sega ni cakava e dua na ka vei ira nodra italatala e kilai nira vaqaseni ira na gonelalai. Ia na cava e kaya na iVolatabu? E tukuna vakamatata: “Dou kakua ni vakaisini kemudou: o ira na daudara, kei ira na dausoro ki na matakau, kei ira na dauyalewa, kei ira na viavia vaka na yalewa, kei ira na veimoceri vakatagane . . . era na sega ni rawata na matanitu ni Kalou.” (1 Korinica 6:9, 10) Vakacava o kila e so na lotu era sega tu ni okata me dua na ka na veiyacovi tawakilikili?

Na cava beka na itinitini ni veilotu e ca na vuadra? Kaya o Jisu: “Na kau vakaaduaga sa sega ni vuataka na vua vinaka sa ta laivi, ka biu ki na buka waqa.” (Maciu 7:19) Io, ena tamusuki na lotu lasu qai vakarusai vakadua! Ena yaco vakacava oqo, ena yaco tale ga ni naica? Na kena isau e kune ena dua na raivotu vakaparofisai e volai ena Vakatakila wase 17 kei na 18.

Ena tini vakacava na lotu lasu?

Raitayaloyalotaka mada oqo. E dua na yalewa dautagane e vodo toka ena dua na manumanu vakadomobula, e vitu na uluna, tini nona ileu. (Vakatakila 17:1-4) O cei beka na yalewa dautagane oqo? E tukuni ni vakacolasau voli vei ira “na tui kei vuravura.” E vakaisulu lokaloka, vakayagataka na ilumu boi vinaka, qai vutuniyau vakalevu. Ra bau ‘vakacalai na veivanua kece’ ena nona vakatevoro. (Vakatakila 17:18; 18:12, 13, 23) Na iVolatabu e vakaraitaka ni yalewa dautagane oqo na isoqosoqo vakalotu e tetevi vuravura na kena levu. Oqo e sega ni dua wale ga na lotu, ia na lotu kece era vuataka na vua ca.

Na manumanu kila e vodo toka kina na yalewa dautagane e dusi ira na veiliutaki vakapolitiki kei vuravura.* (Vakatakila 17:10-13) Na nona vodo gona o lotu vei manumanu kila e kena ibalebale ni dau via vakayaco lomana ena veika era vakatulewataka na isoqosoqo vakapolitiki, me lewa tale ga na nodra itosotoso.

Sega ni dede ga oqo, sa na yaco e dua na ka vakadomobula. “Nai leu e tini ko a raica, kei na manumanu, eratou na cata na yalewa dautagane, a ratou na kitaki koya me biu ka me luvawale; ia eratou na kania na lewena, ka vakamai koya sara e na buka waqa.” (Vakatakila 17:16) Ena vuki vakasauri ena sala e sega ni namaki na mataisoqosoqo vakapolitiki kei vuravura me mokuti lotu lasu qai vakarusa vakadua! Na cava beka e vakavurea na veimoku oqo? E sauma na Vakatakila: “Sa vakacuruma ki lomadra na Kalou na gagadre me ra vakayacora kina na lomana.” (Vakatakila 17:17, VV, neitou na matanivola kala.) Io, ena tarogi lotu lasu na Kalou me baleta na veika torosobu sa dau vakarogorogocataka kina na yacana. E raici na lewadodonu ni Kalou ena nona vakayagataki koya tale na itau vakapolitiki nei lotu lasu me vakatauitotogi.

Na cava mo cakava ke o sega ni via wili kei lotu lasu ni sa vakarusai? E tauca na veivakadreti oqo na italai ni Kalou, “Dou lako tani mai vua, oi kemudou na noqu tamata.” (Vakatakila 18:4) Io, sa kena gauna dina oqo mo dro mai vei lotu lasu! Ia mo dro i vei? Ena sega ni rawa ni o dro vei ira era sega ni via kila na Kalou, baleta na rusa tale ga sa waraki ira tu mai. (2 Cesalonaika 1:6-9, VV) Sa nomu ivakaruru ga na lotu dina. O na kila gona vakacava se i vei na lotu dina?

E kilai vakacava na lotu dina?

Na cava me vuataka na lotu dina?—Maciu 7:17.

Lotu Dina

BULATAKA NA LOLOMA NA LOTU DINA: Era “sega ni vakavuravura” na lewe ni lotu dina, sega ni wasei ira na roka ni kuliniyagodra se nodra itovo vakavanua. Era dau “veilomani.” (Joni 13:35; 17:16; Cakacaka 10:34, 35) Era sega ni veivakamatematei vakataki ira, era bolea ga na mate ena vukudra era lotu vata.—1 Joni 3: 16.

NUITAKA NA VOSA NI KALOU NA LOTU DINA: Na lotu dina e sega ni vakavuvulitaka “na vunau ni tamata mei vakavuvuli,” e yavutaka ga nona ivakavuvuli ena Vosa ni Kalou, na iVolatabu. (Maciu 15:6-9) Ena vuku ni cava? Baleta ga ni “Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu.”—2 Timoci 3: 16.

VAQAQACOTAKA NA BULA VAKAVUVALE KEI NA ITOVO VINAKA NA LOTU DINA: Na lotu dina e vakavulica na tagane me ‘lomana na watina me vaka na yagona dina,’ tubera tale ga na yalewa me “vakarokorokotaka na watina,” qai vakavulici ira na gone mera ‘talairawarawa vei nodra itubutubu.’ (Efeso 5:28, 33; 6:1) O ira tale ga era lesi ena itavi ni veiliutaki e dodonu me vinaka nodra itovo.—1 Timoci 3:1-10.

Bau dua na lotu e kune kina na ivakatagedegede kece oqo? Kaya na ivola Holocaust Politics, tabaki ena 2001: “Ke levu cake era bulataka na ivakavuvuli era vunautaka ra qai vakaitovotaka na iVakadinadina i Jiova, ke a rawa ni tarovi na nona laba tamata vakayauyau o Itala ena keba ni veivakararawataki, vakaoti tale ga e vuravura na laba tamata vakayauyau.”

O ira na iVakadinadina i Jiova ena 235 na vanua era sega wale ga ni vunautaka na ivakatagedegede savasava ni iVolatabu—era bulataka sara ga. Yalovinaka, mo ni kerei ira na iVakadinadina i Jiova mera vakavulici kemuni ena ka e vinakata na Kalou, mo ni qaravi koya rawa kina ena sala e vakadonuya. Sa kena gauna sara ga oqo mo ni cakava kina e dua na ka. Kua ni lokuyara. Sa voleka dina na itinitini ni lotu lasu!—Sefanaia 2:2 , 3.

*  Na kena ivakamacala matailalai e kune ena ivola Revelation—Its Grand Climax At Hand! Tabaka na iVakadinadina i Jiova.