Na Cava na iNaki ni Kalou me Baleta na Vuravura?

1. E bulia na vuravura oqo o Jiova me bula tawamudu kina na tamata. A nona inaki mera tawani vuravura tu ga na tamata yalododonu mamarau. (Same 115:16; Aisea 45:18) Ena sega vakadua ni rusa na vuravura; ena tu ga me tawamudu.—Same 104:5; Dauvunau 1:4.

2. Ni se bera ni bulia na tamata na Kalou, e digia e dua na yasayasa lailai kei vuravura qai cakava me dua na parataisi totoka. E vakatoka me were o Iteni. Oqo na vanua e biuti rau kina na imatai ni tagane kei na yalewa, o Atama kei Ivi. E inaki ni Kalou me rau vakaluveni me rau qai vakatawai vuravura. Ni toso na gauna, erau sa na qai vakatetea yani na parataisi me robota na vuravura taucoko.—Vakatekivu 1:28; 2:8, 15.

Sa yali na parataisi

3. Rau a valavala ca o Atama kei Ivi ena nodrau nakita me rau beca na lawa ni Kalou. Oya na vuna e vakatalai rau tani kina o Jiova mai na were o Iteni. Sa mai yali na parataisi. (Vakatekivu 3:1-6, 23) Ia e se sega ni guilecava o Jiova na nona inaki me baleta na vuravura. Sa yalataka tu ni na veisautaka tale me parataisi me rawa nira bula tawamudu kina na tamata. Ena vakayacora vakacava oqo?—Same 37:29.

4. Ni se bera ni veisautaki na vuravura oqo me parataisi, mera na kau tani mada na tamata ca. (Same 37:38) Ena vakayacori oqo ena Amaketoni, ni oya na ivalu ni Kalou me vakaoti kina na ivakarau ca. Sa na qai vesu o Setani me 1,000 na yabaki. Kena ibalebale oqo ni sa na sega ni vo e dua na tamata ca me vakaleqa tale tiko na vuravura. O ira ga na tamata ni Kalou era na bula.—Vakatakila 16:14, 16; 20:1-3.

5. Ni oti oya, sa na qai veiliutaki me Tui kei vuravura oqo o Jisu Karisito me 1,000 na yabaki. (Vakatakila 20:6) Sa na qai kauta tani tiko vakalalai o koya na ivalavala ca mai na noda vakasama kei na yagoda. Eda sa na qai vakataki rau tale o Atama kei Ivi ni rau se bera ni valavala ca. Sa na sega tale na tauvimate, qase, kei na mate. Era na vakabulai na tamata tautauvimate, o ira na tamata qase era na vuki mera cauravou se goneyalewa tale.—Jope 33:25; Aisea 33:24; Vakatakila 21:3, 4.

6. Ena loma ni Duanaudolu na Yabaki ni Veiliutaki i Jisu, ena nodra cakacaka na tamata yalodina mera veisautaka na vuravura kece me parataisi. (Luke 23:43) O ira tale ga na vicavata na milioni era mate tu era na vakaturi ina bula vakatamata e vuravura. (Cakacaka 24:15) Ke ra vakayacora na ka e tukuna vei ira na Kalou, era na bula tawamudu tiko ga e vuravura. Ke sega, era na vakarusai vakadua me tawamudu.—Joni 5:28, 29; Vakatakila 20:11-15.

7. O koya gona, sa na vakavatukana na ka e nakita taumada na Kalou me baleta na vuravura. Vakaevei, o vinakata me nomu tale ga na veivakalougatataki ena qai yaco oya? Ke vaka kina, e dodonu mo vulica tiko ga na veika mo na kilai Jiova vinaka kina, mo talairawarawa tale ga vua. Ena vakarawarawataka na nomu vakayacora oqo na nomu dau tiko ena nodra soqoni na iVakadinadina i Jiova ena nodra Kingdom Hall voleka vei iko.—Aisea 11:9; Iperiu 10:24, 25.

Ni oti na Amaketoni, ena veisautaki na vuravura me parataisi

Copyright © 2011 Watch Tower Bible and Tract Society of Pennsylvania. All rights reserved.