Na Cava na Matanitu ni Kalou?

1. Ena nona bula e vuravura o Jisu, e vakavulici ira na nona imuri mera dau masuta na Matanitu ni Kalou. Na Matanitu oqo e dua na ituvatuva ni veiliutaki e liutaka e dua na tui. Na Matanitu ni Kalou e matanitu uasivi. E tauyavu mai lomalagi qai lewa mai na vuravura. Ena vakavuna me vakarokorokotaki na yaca ni Kalou. Ena raica me caka na loma ni Kalou e vuravura me vaka sa caka tiko mai lomalagi.—Maciu 6:9, 10.

2. E yalataka na Kalou ni o Jisu ena Tui ni nona Matanitu. (Luke 1:30-33) Ni se bula e vuravura o Jisu, e vakadinadinataka ni na dua na iLiuliu uasivi, yalovinaka, qai dau lewadodonu. Ni sa lesu i lomalagi, a sega ni lai vakatikori sara me Tui ni Matanitu ni Kalou. (Iperiu 10:12, 13) Na lewa a yalataka o Jiova ni na solia vei Jisu a qai vakataqara vua ena 1914. Mai na gauna oya, sa veiliutaki tu kina o Jisu mai lomalagi ena nona itutu vakatui lumuti i Jiova.—Taniela 7:13, 14.

3. E digitaka tale ga mai vuravura o Jiova e so na tagane kei na yalewa yalodina mera lako i lomalagi. Era na lai veiliutaki kei Jisu mera nodra tui, nodra turaganilewa, kei na nodra bete na kawatamata. (Luke 22:28-30; Vakatakila 5:9, 10) O Jisu e vakatokai ira na lai veiliutaki kei koya ena nona Matanitu mera “qele-ni-sipi lailai.” Era le 144,000.—Luke 12:32; Vakatakila 14:1-3.

4. Ni vakatikori oti ga o Jisu me Tui, e kolotaki Setani sara kei ira nona agilosi ca mai lomalagi. Ra sa mai tu oqo ena yasayasa kei vuravura. Oya na vuna me tekivu mai na 1914, sa qai ca ga kina vakalevu na bula e vuravura. (Vakatakila 12:9, 12) Na ivalu, dausiga, mate ca, na toso cake tiko ga ni basulawa—na ka kece oqo era tiki ni “vakatakilakila” e vakadinadinataka ni sa veiliutaki tiko o Jisu, ni sa yacova tale ga oqo na iotioti ni kena veisiga na ituvaki ni veika oqo.—Maciu 24:3, 7, 8, 12; Luke 21:10, 11; 2 Timoci 3:1-5.

5. Sa voleka oqo me lewai ira na tamata o Jisu, me tawasei ira me vaka na ivakatawa e tawasei ira na sipi mai na me. O ira na “sipi” o ira na sa vakadinadinataka nira tamata yalodina i Jisu. Era na rawata na bula tawamudu e vuravura. O ira na “me” o ira na sega ni via vakarorogo ina lewa ni Matanitu ni Kalou. (Maciu 25:31-34, 46) Sa voleka oqo me na vakarusai ira kece na tamata vaka na me o Jisu. (2 Cesalonaika 1:6-9) Ke o via wili tale ga mo dua na “sipi” i Jisu, e dodonu mo rogoca na itukutuku ni Matanitu ni Kalou qai cakacakataka sara na ka o sa rogoca.—Maciu 24:14.

Ena ruku ni veiliutaki i Jisu, sa na sega tale na veicati se veivakaduiduitaki

6. Ena gauna oqo, e kakavidavida tu o vuravura me vicavata na vanua. Na dui vanua e tu vata kei na kedra matanitu. Ra dau veivaluvaluti na veimatanitu oqo. Ia na Matanitu ni Kalou ena mai talaraki ira kece na matanitu vakatamata. Ena qai liutaka duadua ga na vuravura na matanitu oya. (Taniela 2:44) Sa na oti vakadua na ivalu, basulawa, kei na itovo kaukaua. Sa ra na veisaututaki ra qai duavata na tamata kece.—Maika 4:3, 4.

7. Era na yacova na bula uasivi na tamata yalodina ena loma ni Duanaudolu na Yabaki ni nona Veiliutaki o Jisu, sa na parataisi tale ga na vuravura taucoko. Ni sa cava na duanaudolu na yabaki, sa na vakayacora o Jisu na ka kece e tukuna vua na Kalou me cakava. Ni oti oya, sa na qai vakasuka tale na lewa ni Matanitu vua na Tamana. (1 Korinica 15:24) Vakacava mo tukuna vei ira nomu itokani kei ira na wekamu na veika ena vakayacora na Matanitu ni Kalou?

Copyright © 2011 Watch Tower Bible and Tract Society of Pennsylvania. All rights reserved.