Toro Volekata na Kalou ena Masu

1. Na masu na noda dau vosa ena yalo vakarokoroko vua na Kalou. Mo dau masu wasoma vua na Kalou. O na qai vakila ni vaka sara ga e dua na nomu itokani voleka o koya. E dina ni uasivi sara o Jiova qai kaukaua, ia e dau rogoca ga na noda masu! E vakacava, o dau masu wasoma vua na Kalou?—Same 65:2; 1 Cesalonaika 5:17.

2. E tiki ni noda sokalou na masu. O koya gona, e dodonu meda masu ga vua na Kalou o Jiova. Ni se bula e vuravura o Jisu, e dau masu ga vua na Tamana, sega tale ni dua. E dodonu meda cakava tale ga oqo. (Maciu 4:10; 6:9) Ia, na noda masu kece me dau cavuti ena yaca i Jisu. E vakaraitaka oqo nida doka na itutu i Jisu, nida vakabauta na nona isoro ni veivoli.—Joni 14:6; 1 Joni 2:1, 2.

3. Nida sa masu, e dodonu me vu sara ga mai lomada noda vosa vua na Kalou. Meda kua ni cavuqaqataka tu ga noda masu, se meda wilika mai na dua na ivola ni masu. (Maciu 6:7, 8) E rawa nida masu ena itutu e vakaraitaka noda veidokai, ena gauna cava ga, se vanua cava ga eda via masu kina. Na masu mada ga eda cavuta lo e lomada e rogoca na Kalou. (1 Samuela 1:12, 13) E dau vinaka ke rawa nida gole ina dua na vanua vakanomodi, o keda ga vakataki keda, da qai masulaka kina na veika me baleti keda.—Marika 1:35.

4. Na cava soti o rawa ni masulaka? Na veika cava ga o kila ni na yaga ina nomudrau veiwekani kei na Kalou. (Filipai 4:6, 7) Na masu ni Turaga e vakaraitaka ni dodonu meda masulaka na veika e baleta na yaca i Jiova kei na nona inaki. E rawa tale ga nida kerea me soli vei keda na veika e yaga vei keda vakayago, me vosoti noda ivalavala ca, da qai vukei meda valuta na veitemaki. (Maciu 6:9-13) Nida masu meda kua ni nanumi keda ga. Na veika eda masulaka e dodonu me salavata kei na loma ni Kalou.—1 Joni 5:14.

5. O rawa ni masu ke o via vakavinavinaka vua na Kalou se o via vakacaucautaki koya. (1 Veigauna 29:10-13) Mo masu ke o sota kaya na leqa, se vakatovolei nomu vakabauta. (Same 55:22; 120:1) E kilikili mo dau masu ni o se bera ni kana. (Maciu 14:19) E sureti keda o Jiova meda dau “masu tikoga.”—Efeso 6:18.

6. Sa qai vinakati ga vakalevu meda masu kevaka eda valavala ca bibi. Ena gauna vaka oya, e dodonu meda kerei Jiova me lomani keda, me vosoti keda. Ke da tusanaka noda cala vua da qai saga vakaukaua meda kua ni cakava tale, e “tu vakarau me vosoti” keda na Kalou.—Same 86:5, NW; Vosa Vakaibalebale 28:13.

7. O Jiova e rogoca ga nodra masu na yalododonu. Ena rogoca wale ga nomu masu na Kalou ke o saga tiko ena nomu vinaka kece mo vakaitovotaki iko ena nona lawa. (Vosa Vakaibalebale 15:29; 28:9) Ni o sa masu, mo masu ena dela ni yalomalumalumu. (Luke 18:9-14) E dodonu mo cakacakataka sara na ka o sa masuta. O na vakadinadinataka kina ni tiko vei iko na vakabauta, ni vu dina mai lomamu na ka o masulaka tiko. Ena qai rogoca ga nomu masu o Jiova ke o vakayacora oqo.—Iperiu 11:6.

Copyright © 2006 Watch Tower Bible and Tract Society of Pennsylvania. All rights reserved.