O na Kunea Vakacava na Lotu Dina?

1. E tekivutaka o Jisu e dua ga na lotu Vakarisito dina. O koya gona, nikua e dodonu me dua ga na ilawalawa dausokalou dina, era sokaloutaka na Kalou o Jiova. (Joni 4:23, 24; Efeso 4:4, 5) E kaya na iVolatabu ni le vica ga era lako tiko ena gaunisala qiqo ni bula.—Maciu 7:13, 14.

2. E parofisaitaki ena iVolatabu ni na curu vakamalua ina ivavakoso vakarisito na ivakavuvuli cala kei na ivalavala e so e sega ni vakarisito ena gauna era mate kina na yapositolo. Ena tubu mai e so era na mari ira na vakabauta mera muri ira, mera kua ni muri Karisito. (Maciu 7:15, 21-23; Cakacaka 20:29, 30) Oya na vuna eda raica tu kina e levu na lotu era kaya voli nira lotu Vakarisito. Eda na kila vakacava se e vei na lotu Vakarisito dina?

3. Na ka duadua era kilai tani kina na lotu Vakarisito dina na nodra veilomani. (Joni 13:34, 35) Era sega ni vakavulici mera nanuma nira uasivi cake vei ira na kaitani, se o ira e duatani na roka ni kuli ni yagodra. Era sega tale ga ni vakavulici mera cati ira na kaitani. (Cakacaka 10:34, 35) Era sega gona ni dau vakaitavi ena ivalu. O ira na lotu Vakarisito dina era dau veinanumi me vaka na veitacini kei na veiganeni.—1 Joni 4:20, 21.

Na lotu Vakarisito dina era dau veilomani, doka na iVolatabu, ra qai dau vunautaka na Matanitu ni Kalou

4. E dua tale na ivakatakilakila ni lotu Vakarisito dina na nodra doka vakalevu na iVolatabu. Era ciqoma me Vosa dina ni Kalou ra qai vakabauta na ka e kaya. (Joni 17:17; 2 Timoci 3:16, 17) Era raica na Vosa ni Kalou me bibi cake mai na vakasama ni tamata se itovo vakavanua. (Maciu 15:1-3, 7-9) Era saga ena nodra bula ni veisiga mera bulataka na ivakavuvuli ni iVolatabu. Era sega gona ni vunautaka e dua na ka ra qai cakava tiko e duatani tale na ka.—Taito 1:15, 16.

5. Na lotu dina tale ga me doka na yaca ni Kalou. (Maciu 6:9) O Jisu e vakatakila na yaca ni Kalou o Jiova vei ira na tani. Mera cakava tale ga oqo na lotu Vakarisito dina. (Joni 17:6, 26; Roma 10:13, 14) O cei era kilai ena vanua o vakaitikotiko kina nira dau lako mera lai tukuna na yaca ni Kalou vei ira na tani?

6. O ira na lotu Vakarisito dina mera vunautaka yani na Matanitu ni Kalou. E cakava oqo o Jisu. E dau wewe ni gusuna na Matanitu ni Kalou. (Luke 8:1) E vakaroti ira nona tisaipeli mera vunautaka na itukutuku vata ga oqo i vuravura taucoko. (Maciu 24:14; 28:19, 20) Era vakabauta na lotu Vakarisito dina ni Matanitu duadua ga ni Kalou ena kauta mai na vakacegu kei na sautu dina ina vuravura oqo.—Same 146:3-5.

7. Mera kua ni vakavuravura na tisaipeli i Jisu. (Joni 17:16) Era sega ni vakaitavi ena veika vakapolitiki kei na kudru e dau caka. Era cata ni muria na itovo kei na ivalavala e sa ivakarau tu ni bula e vuravura. (Jemesa 1:27; 4:4) E vakacava, o rawa ni dusia na isoqosoqo lotu ena nomu vanua e kune kina na ivakatakilakila oqo ni lotu Vakarisito dina?

Copyright © 2011 Watch Tower Bible and Tract Society of Pennsylvania. All rights reserved.