1. Ena gauna oqo o sa na vulica e levu na itukutuku yaga mai na iVolatabu. Na ka o sa kila oqo sa na rawa ni vakamuai iko mo tekivu vakaitovotaka na itovo vakarisito. (Efeso 4:22-24) E yaga dina na ka o sa mai kila oqori mo na rawata kina na bula tawamudu. (Joni 17:3) Ia, e bibi mera rogoca tale ga na tani na itukutuku vinaka mera na vakabulai kina. E nodra itavi na lotu Vakarisito kece mera vunau vei ira na tani. E ivakaro sara ga ni Kalou oqo.—Roma 10:10; 1 Korinica 9:16; 1 Timoci 4:16.
2. Sa rawa sara ga ni o tekivu tukuna vei ira na tiko tikivi iko na veika vinaka o vulica tiko. Tukuna tale ga vei ira na wekamu voleka, nomu itokani, nomu icaba mai koronivuli, kei ira oni cakacaka vata. Ia mo vakayacora oqori ena yalovinaka kei na yalovosovoso. (2 Timoci 2:24, 25) Nanuma tiko ni na lauti ira cake vakalevu na tani na nona itovo e dua mai na ka e kaya. De na dreti ira gona na tani na nomu itovo vinaka mera na via rogoci iko kina.—Maciu 5:16; 1 Pita 3:1, 2, 16.
3. Ni toso na gauna, de o sa na rawa ni tomani ira na iVakadinadina i Jiova ena ivavakoso o tiko kina ena cakacaka vakavunau. Oqo e dua dina na ikalawa bibi ina nomu toso vakayalo. (Maciu 24:14) Sa na dua dina na ka marautaki mo vukea e dua tale me mai qaravi Jiova, me qai rawata kina na bula tawamudu!—1 Cesalonaika 2:19, 20. |
