E Fefe’aki a Le Pule’aga o Le Atua?

1. I lana ma’uli i le kele, na ako’i e Sesu ki ana tisipulo ke lotou faikole o uiga mo le Pule’aga o le Atua. Ko se pule’aga e takitaki e se sau. E makese a le Pule’aga o le Atua. E tu’u ia i le lagi ti e pule’i loa e ia a le kele. E fakatapusa loa e ia, pe fakamā’oki’oki a le suafa o le Atua. E fakasoko loa e ia a le finegalo o le Atua i le kele o fai pe i selo.–Mateo 6:9, 10.

2. Na fakapapau e le Atua e liliu loa a Sesu ko le Sau o Lona Pule’aga. (Luka 1:30-33) I le temi na nofo ai Sesu i le kele, na fakasā e ia e liliu loa ko se Pule agamālie, faitotonu ti mo saosaoa. I lana toe liliu ki le lagi, na se fakanofo atu ai fa’i a ia ko le Sau o le Pule’aga o le Atua. (Epeleo 10:12, 13) I le fētu’u 1914, na soli e Seova a le tu’ulaga pule leia na ’aga ia o fakapapau ake kiate ia. Talu mei ai, e pule Sesu i le lagi ko le Sau na fakanofo e Seova.–Taniela 7:13, 14.

3. Na toe fili e Seova a ’iki tagata mo fafine agatonu i le kele ke lotou fano ki le lagi. E lotou pule’i loa mo Sesu a le kele, ko ni sau, mo ni tu’i fakamāu, ti mo ni pelepitelo. (Luka 22:28-30; Apokalipisi 5:9, 10) Na fakaigoa’i e Sesu ko le “gā kau manu liliki” a lātou alā ka kau sau mo ia i lona Pule’aga. E lotou tino 144 000.–Luka 12:32, Tausi Fo’ou Faka-Futuna; Apokalipisi 14:1-3.

4. I le ’oki fakanofo Sau o Sesu, na kapu ti mo tī ake a Satana mo ana kau ’aselo agaveli mei le lagi ki le kele. Ko le tupu’aga leia o le kua veli ’oki o le malama leinei talu mei le fētu’u 1914. (Apokalipisi 12:9, 12) Ko tau, ko oge, ko ta’i masaki, ko fenua e se koi fakapoipoi ki le lao–ko ne’a fuli anā e kau ki le “fakama’iloga” leia ko Sesu kua pule ti kua vave puli’i a le tu’u leinei.–Mateo 24:3, 7, 8, 12; Luka 21:10, 11; 2 Timoteo 3:1-5.

5. Kua tatae mai le temi ka fakamāu ai e Sesu a le fenua, o fai pe se tagata tausi manu e ’aga o vae’i kese a le ovi mei le koti. Ko “ovi” ko lātou alā na lotou agatonu kiate ia. E ma’ua loa e lātou a le ma’uli le’egato i le kele. Ko “koti” ko lātou alā na lotou ’aga o ti’aki a le Pule’aga o le Atua. (Mateo 25:31-34, 46) Kua feofi mai le temi ka ’aga ai Sesu o mate’i a lātou fuli alā e fai pe ni koti. (2 Tesalonika 1:6-9) Kapau e kotou fia liliu ko se “ovi” a Sesu, ti e tonu ke kotou fakalogo ki le logo o le Pule’aga ti mo kotou ma’uli’i a ne’a alā e kotou ako’i.–Mateo 24:14.

I le takitaki a Sesu, e se toe i ai loa se vesi’a ti mo se fakapalatasi

6. I le temi leinei, kua vaevae fakafenua a le kele. E tasi ma’ua e fenua anā lona pule’aga. E tautau fetau’aki a fenua anā. Kae e fetogi loa e le Pule’aga o le Atua a pule’aga fakatagata fuli anā. Ko le pule’aga fa’i lenā e tasi ka pule ki le kele kātoa. (Taniela 2:44) Ti e se toe i ai loa se tau, se tukipo, se agamakeke. E ma’u’uli fakatasi loa a le fenua fuli i le tokamālie ti mo le logo tasi.–Mikea 4:3, 4.

7. I le lolotoga Temi Sau o Sesu i Fētu’u e Afe, e liliu loa le kakai agatonu o saosaoa, ti e liliu loa mo le kele kātoa ko le palatiso. I le faka’oki o fētu’u e afe, kua fakasoko kātoa loa e Sesu a ne’a alā na kole ake e le Atua kiate ia ke ’aga ia o fai. Ti e toe soli ake loa e ia a le Pule’aga ki lona Tamana. (1 Kolinito 15:24) Ko le ā e se kotou fakasā ai ki okotou kaune’a ti mo okotou famili a ne’a alā ka fai e le Pule’aga o le Atua?

Copyright © 2006 Watch Tower Bible and Tract Society of Pennsylvania. All rights reserved.