E Tonu Ke Me’ā a Kaunaga a Le Atua

1. Ko Seova Atua e me’ā ti mo mā’oki’oki. E loto a ia ke me’ā mo ana kau atolasio–i le potu fakalaumalie, i aga alā e tonu ke tou fai, i le fakakaukau, ti mo le potu fakatino. (1 Petelo 1:16) E se ko se ne’a faigaofie sakita nofo me’ā i mu’a o le Atua. E tou ma’u’uli i le malama e se me’ā. Tasi leia ne’a, e tonu ke tou tau’i otātou oli leia ke tou fai se ne’a e veli. Kae e se tonu ke tou tuku atātou faiga.

2. Tou Me’ā i Le Potu Fakalaumalie: Kapau e tou fia tausi kia Seova, e se mafai ke tou tokoi ki ni fa’asiga akonaki pe ko ni aga’i fenua o le lotu sala. E tonu ke tou mavae mei le lotu sala ti auana tou toe tokoi kiai. (2 Kolinito 6:14-18; Apokalipisi 18:4) I latātou ako le mā’oki o uiga mo le Atua, e tonu ke tou tokakaga na fakasēsē tātou e ni kakai e lotou faiakonaki sala.–2 Soane 10, 11.

3. Tou Me’ā i Aga e Tonu Ke Tou Fai: E loto Seova ke taupau e ana kau atolasio a le aga faka Kilisiteano mā’oki i temi fuli. (1 Petelo 2:12) E tio a ia ki ne’a fuli e tou fai, o fela’aki mo ne’a alā e tou fai fakafufū. (Epeleo 4:13) E tonu ke tou ti’aki a felāve’i fakatino le’e’aoga ti mo ’iki a aga e se me’ā o le malama leinei.–1 Kolinito 6:9-11.

4. Tou Me’ā i Le Fakakaukau: Kapau e tou faka’apele lotātou fakakaukau ki ni ne’a mālilie, ti e toe mālie loa mo latātou aga. (Filipe 4:8) Kae kapau e tou taupau ni manatu kelekele, e iku ai loa ki aga e veveli. (Mateo 15:18-20) E tonu ke tou ti’aki a fa’asiga māsolo leia e mafai ke kelekele ai lotātou fakakaukau. E mafai ke tou faka’apele lotātou fakakaukau mo ni manatu mālie i latātou ako le Folafola a le Atua.

5. Tou Me’ā i Le Potu Fakatino: Talie e lotou fakafofoga le Atua, koia e tonu ai ki le kau Kilisiteano ke lotou fakame’ā olātou kuaga ti mo olātou ne’alava. E tonu ke tou fanofano otātou lima mokā tou fano ki le fale vao, ti mo tou fanofano otātou lima i mu’a o latātou fāfā ki se ne’akai. Kapau e se ma’ua ni tuio ke faka’ano ai le vai veli, ti e tonu loa ke tanu a faikauga. (Tetelonome 23:12, 13) Kapau e kotou me’ā i le potu fakatino, ti e mālie loa lokotou ma’uli fakatino. Ko le kāiga o le Kilisiteano e tonu ke tokamālie ti mo me’ā i loto ti mo fafo. E tonu ke iloa koutou e le kakai o lokotou kolo, e kotou tuku se faifaitaki mālie.

6. Ke Me’ā Atātou Māsau: Ko kaunaga a le Atua e tonu ke lotou fakasā tu’uma’u le mā’oki. Ko le kau gutu loi e se lotou ulu ki le Pule’aga o le Atua. (Efeso 4:25; Apokalipisi 21:8) E se māsau veli a le kau Kilisiteano. E se lotou fakalogo pe lotou fai ni fakasuasua kelekele pe ko ni fakamatala e veli. E lotou makese i lalātou fale ga’oi, i le faleako, ti mo kakai o lolātou kolo, talie e mē’a lalātou māsau.–Efeso 4:29, 31; 5:3.

Ko kaunaga a le Atua e tonu ke lotou me’ā i potu fuli

Copyright © 2006 Watch Tower Bible and Tract Society of Pennsylvania. All rights reserved.