Ko Aga Alā e Vesi’a Kiai Le Atua

1. Ko kaunaga a le Atua e lotou fia fai ki ne’a alā e mālie. Kae e tonu loa ke lotou ako ke lotou vesi’a ki ne’a alā e veli. (Pesalemo 97:10) Ko lona fakauiga ke lotou ti’aki a fa’asiga aga leia e vesi’a kiai le Atua. Ko ā a fa’asiga aga anā?

2. Le Folonikasio: Ko le felāve’i fakatino i mu’a o le āvaga, le tono, le felāve’i fakatino mo le manu, ti mo le felāve’i fakatino mo se kāiga, ti mo le felāve’i fakatino a se tagata mo se tasi tagata ti mo se fafine mo se tasi fafine, e ko ni agasala mamafa fuli anā ki le Atua. (Levitiko 18:6; Loma 1:26, 27; 1 Kolinito 6:9, 10) Kapau ko se fafine mo se tagata e lā nonofo fakatasi kae lekiaise lā āvaga, e tonu ke lā mavete pe lā āvaga o mulimuli ki le lao.–Epeleo 13:4.

E vesi’a le Atua ki le konā, le kaiā, le mānogi pa’aga, ti mo le agamakeke

3. Le Loi, Le Mānogi Pa’aga, Le Kaiā: Ko Seova Atua e se mafai ke loi. (Tito 1:2) Ko le fenua leia e lotou loto ke mālie’ia lātou e le Atua e tonu ke lotou ti’aki le loi. (Taagapati 6:16-19; Kolose 3:9, 10) Ko fa’asiga mānogi pa’aga kesekese e ko le mānumanu. Koia leia e se kau ai se Kilisiteano ki se fa’asiga mānogi pa’aga, o fai pe le loteli, le lele osi, ti mo le piniko. (Efeso 5:3-5) Ti e se kaiā le kau Kilisiteano. E se lotou totogi se koloā kae lotou iloa mālie na kaiā pe lotou to’o ni ne’a kae na se lotou kole.–Ekesote 20:15; Efeso 4:28.

4. Le ’Ita, Le Agamakeke: Ko le ’ita veli e mafai ke iku ai ki se agamakeke. (Senesi 4:5-8) Ko se tasi e agamakeke e se mafai ke kaune’a mo le Atua. (Pesalemo 11:5; Taagapati 22:24, 25) E veli le tā’ui o le veli ki se ne’a veli na fai mai ki tātou.–Taagapati 24:29; Loma 12:17-21.

5. Le Faitutuku Ti Mo Le Faifakalaula’akau: Ko ’iki e lotou kalaga’i a le makeke o laumalie mo faito’o ni masaki. Ko ’iki e lotou faitutuku ki olātou fili ke lotou masasaki pe ke lotou mamate. Ko le makeke leia e ’aga o fakasoko a ne’a fuli anā e ko Satana. Koia leia e se tonu ai ki le kau Kilisiteano ke lotou kau ki ne’a anā. (Tetelonome 18:9-13) Ko le nofo feofi ki Seova e ko se puipui mālie lenā ki ni faitutuku e fai mai e ’iki kia tātou.–Taagapati 18:10.

6. Le Konā: E se veli le inu o se gā vino, se piele, pe ko se tasi ake a kava. (Pesalemo 104:15; 1 Timoteo 5:23) Kae ko le inu lasi o le kava ti mo le konā e ko ni ne’a e veli ki mata o le Atua. (1 Kolinito 5:11-13; 1 Timoteo 3:8) Ko le inu kava fakavale e mafai ke fakatupu veli ki lokotou ma’uli malolo ti mo fakamavetevete ai lokotou famili. Tasi leia ne’a, kapau e kotou inu kava fakavale, ti e mafai ke kotou vilo gaofie ki ni’iki fakasala.–Taagapati 23:20, 21, 29-35.

7. Ko le fenua leia e lotou fai a ne’a alā e pati le Atua e veli, e se lotou “maua ia loa le Puleaga o le Atua.” (Kalate 5:19-21) Kapau e kotou alofa mā’oki ki le Atua ti mo kotou loto ke ’aga ia o tali akoutou, e mafai ke kotou ti’aki a aga anā. (1 Soane 5:3) Kotou ako le vesi’a ki ne’a alā e veli ki le Atua. (Loma 12:9) Kotou fakatasi mo le fenua leiā e lotou ma’ua’ia ni aga faka lotu. (Taagapati 13:20) E mafai ki kaukaune’a Kilisiteano kua fakapotopoto i le potu fakalaumalie ke lotou tokoi mā’oki atu. (Sakopo 5:14) I ne’a fuli, kotou fānaki tafito ki le tokoi a le Atua i le faikole.–Filipe 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.