E Fefe’aki Satātou Ma’ua a Le Lotu Mā’oki?

1. Na fakatu’u e Sesu le lotu faka Kilisiteano mā’oki fa’i e tasi. Koia i leinei le temi, e tonu fa’i ke iai se kautasi e tasi, pe ko se kūtuga e tasi, o le kau atolasio mā’oki a Seova Atua. (Soane 4:23, 24; Efeso 4:4, 5) E fakasā mai e le Tosi-Tapu e teiki a lātou alā e sa’ele i le ala lau ’iki’iki.–Mateo 7:13, 14.

2. Na fakakikite e le Tosi-Tapu i le sili o le mate o le kau apositolo, ko akonaki loi ti mo aga alā e le’aise ko ni aga faka Kilisiteano e ulu māmālie loa ki le kokelekasio faka Kilisiteano. Ko tagata e lotou fakasala’i loa a le fenua tui ke lotou muli ake ia lātou kae le’aise lotou muli’i a Kilisito. (Mateo 7:15, 21-23; Tosi Gaoi 20:29, 30) Ko le tupu’aga lenā o latātou tio ki lotu e ma’uke e lotou pati ko lātou ko le kau Kilisiteano. E fefe’aki satātou iloa le kau Kilisiteano mā’oki?

3. Ko le fakama’iloga makese o le kau Kilisiteano mā’oki ko lalātou fe’alofani. (Soane 13:34, 35) E se ako’i lātou ke lotou manatu e lotou mā’uiga ake i ni’iki atu pe ko se tasi lanu. E se ako’i lātou ke lotou vesi’a ki se tasi kese. (Tosi Gaoi 10:34, 35) Ti e le’aise lotou kau ki ni tau. Ko le kau Kilisiteano mā’oki e lotou fetokaga’aki ia lātou o fai pe ni fetaina ti mo ni tuaga’ane.–1 Soane 4:20, 21.

E fe’alofani a le kau Kilisiteano mā’oki, e lotou fakapoipoi ki le Tosi-Tapu, ti e lotou faka mafola le Pule’aga o le Atua

4. Ko se tasi fakama’iloga o lātou alā e lotou kau ki le lotu mā’oki, ko lalātou fakapoipoi lasi ki le Tosi-Tapu. E lotou fakamā’oki ko le Folafola a le Atua ti e lotou tui ki ne’a alā e fakasā ai-la. (Soane 17:17; 2 Timoteo 3:16, 17) E mā’uiga ake kia lātou le Folafola a le Atua i ni manatu pe ko ni aga’i fenua fakatagata. (Mateo 15:1-3, 7-9) E lotou fefai ke lotou mulimuli ki le Tosi-Tapu i aso fuli. Koia e se kese a ne’a alā e lotou akonaki ti mo ne’a alā e lotou fai.–Tito 1:15, 16.

5. E tonu ki le lotu mā’oki ke toe fakapoipoi ki le suafa o le Atua. (Mateo 6:9) Na fakasā e Sesu ki le fenua a le suafa o le Atua ko Seova. E tonu foki ke fai fela’aki mo le kau Kilisiteano mā’oki. (Soane 17:6, 26; Loma 10:13, 14) Ko ai ma i lokotou kolo e lotou māsau ki ’iki o uiga mo le suafa o le Atua?

6. Ko le kau Kilisiteano mā’oki e tonu ke lotou faka mafola le Pule’aga o le Atua. Na fai e Sesu le potu lenā. Na māsau ma’u a ia ki le Pule’aga. (Luka 8:1) Na fakatotonu e ia ki lana kau tisipulo ke lotou faka mafola le logo lenā i le kele kātoa. (Mateo 24:14; 28:19, 20) E tui le kau Kilisiteano mā’oki ko le Pule’aga tokotasi fa’i o le Atua leia ka ’aga o soli a le tokamālie mo le fimālie mā’oki ki le kele.–Pesalemo 146:3-5.

7. Ko le kau tisipulo a Sesu e le’aise tonu ke lotou kau ki le malama agaveli leinei. (Soane 17:16) E le’aise lotou pipiki ki ne’a faka politike o le malama leinei ti mo maveuveu faka sosiale. E lotou teke’i a māmio veli ti mo agamasani o le malama leinei. (Sakopo 1:27; 4:4) E mafai sakotou ma’ua i lokotou kolo se kūtuga faka lotu e lotou ma’ua a fakama’iloga anā o le Lotu Faka Kilisiteano mā’oki?

Copyright © 2006 Watch Tower Bible and Tract Society of Pennsylvania. All rights reserved.