E Fakaanoano Fefe’aki Le Ga’oi a Le Kau Fakamā’oki a Seova

1. I lotātou temi na kamata le isitolia o le kau Fakamā’oki a Seova i le fētu’u 1870. Na ’uluaki fakaigoa’i lātou ko le kau Ako o le Tosi-Tapu. Kae i le fētu’u 1931 na lotou to’o le igoa faka Tosi-Tapu leia ko le kau Fakamā’oki a Seova. (Esaia 43:10) I le kamata’aga na teiki a le kautasi ti na tuputupu ake loa ko le lau’i miliona kau Fakamā’oki, e lotou fakamafola i fenua e 230 tupu.

2. E lasi a kokelekasio o le kau Fakamā’oki a Seova e lotou fono tu’a tolu i le vāsa’a fuli. E fakaafe koutou ke kotou kau ki fono anā. (Epeleo 10:24, 25) Ko alātou akonaki e fakatafito ki le Tosi-Tapu. E kamata ti mo faka’oki a fono anā ki le faikole. Tasi leia ne’a, e sua i fono anā a “katiko fakalaumalie.” (Efeso 5:18, 19) E le’aise totogi a le kau leia ki fono anā, ti e le’aise fai se tae falā.–Mateo 10:8.

3. E lasi a kokelekasio e lotou fai alātou fono i Fale o Le Pule’aga. I le agamasani, e laga fa’i a fale faigaofie anā e le kau Fakamā’oki a Seova. I Fale o Le Pule’aga, e le’aise kotou tio ki ni paki, mo ni koluse, pe ko ni ne’a fena’aki. Ko le pa’aga leia na faka’aoga’i mo totogi o ne’a anā, ko se pa’aga na soli faka’alofa. Kia lātou alā e lotou fia fai se ne’a alofa, e iai a pusa tuku’aga ne’a alofa.–2 Kolinito 9:7.

4. I kokelekasio takitasi, e iai a tagata matu’a, pe ko ni tagata le’ole’o. E lotou takitaki a akonaki i le kokelekasio. (1 Timoteo 3:1-7; 5:17) E tokoi kia lātou a tagata fakasausau faka minisitelio. (1 Timoteo 3:8-10, 12, 13) Ko tagata matu’a anā e le’aise lotou fia tau’aluga ake i le kakai o le kokelekasio. (2 Kolinito 1:24) E se soli ake kia lātou ni igoa faka tu’ulaga. (Mateo 23:8-10) E se makese lalātou fa’asiga teuteu. E le’aise totogi lātou ki ga’oi alā e lotou fai. E lotou lotomalie o tokaga ki ne’a alā e aoga ki le kokelekasio i le potu fakalaumalie. E lotou fakaloto fimālie ti mo soli tokoi mokā e iai ni visia.–Sakopo 5:14-16; 1 Petelo 5:2, 3.

5. E toe fai foki e le kau Fakamā’oki a Seova a fakatasi lalasi i fētu’u fuli. I temi anā, e fakatasi ai a kokelekasio e ma’uke ki se polokalama makese o ako a le Tosi-Tapu. Ko le papitema’i o le kau tisipulo fo’ou e ko se potu e fai ma’u i le polokalama o fakatasi fuli.–Mateo 3:13-17; 28:19, 20.

6. Ko le nofolaga faka malamanei o le kau Fakamā’oki a Seova e tu’u i New York. E nofo ai le Kolesi Pule, ko se kūtuga e fa’ufa’u e ni tagata matu’a kua fakapotopoto, ti e lotou takitaki a kokelekasio o le malamanei kātoa. E toe iai foki mo filiale e 100 tupu i le malamanei. I potu anā, ko fetāina mo tuaga’ane e lotou soli lolātou temi ki le tā ti mo le fetuku o tosi faka Tosi-Tapu. Tasi leia ne’a, e lotou takitaki a le fakaanoano o le ga’oi fai fakamafola. Ko le ā e le’aise kotou fakatu’utu’u ke kotou fano o mamata ki le filiale leia e tu’u feofi mai kiō koutou?

Copyright © 2006 Watch Tower Bible and Tract Society of Pennsylvania. All rights reserved.