Tera Ana Reirei ni Koaua te Baibara?

WAREKI nuutibeeba n aekaia nako. Mataku n te TV, ke ongora n te rongorongo ae nako man te rerio. A rangi ni bati rongorongo aika a taekina te mwakuri ni kakeru, te buaka, ao te tiritiri mairouia taani kakamaaka te aba! Iangoi naba kangaanga aika rotiko ake ko raraoma iai. Tao ko karawawataki n aorakin temanna ae tangiraki iroum ke tao matena. Tao titeboo am namakin ma te aomata are raoiroi are Iobi, are e taku bwa e a ‘kororake rawawatana.’—Iobi 10:15, BK.

Titirakiniko ni kangai:

• Aio ae tangiria te Atua bwa e na riki nakoiu ao nakon te botannaomata?
• E na reke iia buokau ibukin kabebetean au kangaanga?
• Iai te tai teuana ae ti nang nora iai te rau i aon te aba?

Iai kaekaan titiraki aikai aika karaunano aika mena n te Baibara.

E REIREINIRA TE BAIBARA BWA TE ATUA E NA KAREKEI BITAKI AIKAI NAKON TE AONNABA.

“E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki.”—Te Kaotioti 21:4

“E na ewewe iai te mauku n ai aron te ria.”— Itaia 35:6

“A na kaureaki iai mataia akana mataki.”—Itaia 35:5

“A na bane iai . . . [“ake a uringaki,” NW] ake a mena i nanon ruaia ni mate . . . [n] oti nako.”—Ioane 5:28, 29

“Ane maeka iai e na aki kangai, I aoraki.”—Itaia 33:24

“Ane e na bati te uita i aon te aba.”—Taian Areru 72:16

KAREKEA KABWAIAM MAN ANA REIREI TE BAIBARA

Tai waekoa ni kaakeai bongan baike a a tibwa taekinaki bwa aongkoa bon tii karioiango. E a tia ni berita te Atua bwa e na boni kakoroi bukin baikai, ao e kabwarabwaraki n te Baibara aroni karaoana irouna.

Ma e bati iteran nako bonganan te Baibara. E taekina kiingin kakukureiam ni koaua n te tai ae imwaira, ao ngkai naba. Iangoa moa tabeaiangam ma am kangaanga nako. E kona ni kaineti ma te kataumwane, kangaanga n te utu, te aoraki ke maten temanna ae tangiraki. E na buokiko te Baibara bwa ko na kona ni kaaitarai kangaanga ni boong aikai, ao e na anganiko te kabebeteaki man karekean kaekaan titiraki aikai:

• Bukin tera ngkai ti rawawata?
• Ti na kanga n tokanikai i aon tabeaiangan te maiu aei?
• Ti na kanga ni kanakoraoa riki ara utu?
• Tera ae e na riki nakoira ngkana ti mate?
• Ti na manga kaitiboo ma raora aika tangiraki ake a a tia ni mate?
• Ti na kanga ni kakoauaa bwa e na boni kakoroi bukin ana berita te Atua nakon taai aika a na roko?

Warekan te boki aei iroum, e kaotia bwa ko kan ataia bwa baikara ana reirei te Baibara. E na boni buokiko te boki aei. Taraia bwa ni barakirabe nako, iai titiraki aika kaineti raoi ma ngaai aika a mena i nano. A a tia aomata aika mirion ma mirion mwaitiia, n noria bwa te maroro n te Baibara ma Ana tia Kakoaua Iehova, e rangi ni kaunga ngkana e waakinaki ni kabonganai titiraki ma kaeka. Ti kaantaningaia bwa ko na rangi n unga naba iai. E bia mena i aom ana kakabwaia te Atua, ngkai ko a tabe n reiakina ana reirei ni koaua te Baibara!

ATAA AM BAIBARA

BON iai booki ao reeta aika 66 mwaitiia n te Baibara. Ibukin kanakoraoan te wareware mai iai, a bwenauaki nakon mwakoro ao kiibu. Ngkana iai te kibu ae kaotaki n te boki aei, te moan nambwa imwin aran te boki e tei ibukin mwakoron te boki ke te reta, ao te nambwa are imwina, e kaineti ma kibun te mwakoro anne. N te katoto, te kibu ae te “2 Timoteo 3:16,” e nanona te kauoua n reta nakon Timoteo, te mwakoro 3, ao te kibu 16.

Ko na waekoa ni bwaati aron kabonganan te Baibara ngkana ko kakaaei kiibu aika kaotaki n te boki aei. E aera ngkai ko a aki naba moana am babaire ibukin warekan te Baibara ni katoa bong? Ngkana ko wareka tenua nakon nimaua mwakoron te Baibara ni kaota bong, ao e na bane te Baibara iroum i nanon teuana te ririki.