Ana Tia Kakoaua Iehova—Antai Ngaiia? Tera Aia Koaua?

A tabe iroum

Antai Ngaiia?

Bon nanoia Ana Tia Kakoaua Iehova bwa ko na ikikina riki ma ngaiia. Tao ko a boni bae n tia ni kaitiboo ma kaaina ake tao a maeka n am kaawa, a uaia ni mwakuri ma ngkoe, ke ko kaitiboo ma ngaiia n aron waakin te maiu aei. Tao ko a tia n noriia irarikin te kawai, ngkana a anga nako aia maekatin nakoia aomata ake a rirarikiia. Ke tao ko a tia ni maroro teutana ma ngaiia ngke a kawara am auti.

Ni koauana, Ana Tia Kakoaua Iehova a tabe ma ngkoe ao mweeraoim. A tangiria n riki bwa raoraom ao ni kaongoraeko riki ni bon taekaia, aia koaua, aia botaki, ao aia kaantaninga ibukia aomata ao te aonnaba ae ti maeka i nanona ngkai. A katauraoa te boki aei i aan kakoroan bukin te kaantaninga aei.

N angiin te tai, Ana Tia Kakoaua Iehova bon ai aroia aomata nako. N ai aroia aomata nako, bon iai naba kangaanga ake a taonaki iai—aika a irekereke ma te mwane, te aoraki, ke te namakin. A boni kakairua naba n tabetai, bwa a aki-kororaoi, a aki tuangaki bwaai ni kabane ake a na karaoi iroun te Atua, ao tiaki ngaiia aomata aika a aki kona ni bubure. Ma a kataia ni karekea reireiaia man bwaai ake a a tia n riki nakoia, ao a karaua n reiakina te Baibara ma ni kaeti aroia n aron ae e riai. A a tia ni katabui maiuia nakon te Atua bwa a na karaoa nanona, ao a kekeiaki mwaaka ni kakoroa bukin katabuani maiuiia. N aia mwakuri nako, a kakaea kairaia man ana Taeka te Atua ao taamneina ae raoiroi.

Moan te kakawaki irouia bwa e na aanaki aia koaua i aon te Baibara, ao tiaki i aon aia katautau aomata, ke reirei n Aaro. A iango n aron te abotoro Bauro ngke e taetae ni kangai i aan kairana iroun te taamnei: “E na kakoauaki ana taeka te Atua ngkana tao a kakeweaki aomata ni kabaneia iai.” (I-Rom 3:4*) Ni kaineti ma reirei aika a kaotaki bwa a nako man te Baibara, taani Kakoaua a boutokoa aroia kaaini Beroia ngkoa, ngke a ongo n ana kabwarabwara te abotoro Bauro: “A kani kaki i nanoia ana taeka te Atua, n ukeuke n te Baibara n te bong ae koraki ba tao a koaua baikekei ke a aki.” (Mwakuri 17:11) Ana Tia Kakoaua Iehova a kakoaua bwa aia reirei Aaro, a riai ni bane ni kataaki moa bwa a boraoi ma te Baibara ke a aki, tao reirei aika a roko mairouia, ke aomata tabeman. A kaoko—eng, a boni kaunga nanom—bwa ko na karaoa aei ngkana ko maroro ma ngaiia.

E teretere man aei bwa Ana Tia Kakoaua Iehova a kakoaua bwa te Baibara bon ana Taeka te Atua. A iangoi booki aika 66 ake i nanona bwa a kairaki koreaia ao a bon eti ma aron rongorongon rimoa ake a kaotaki iai. Mwakoron te Baibara ae e aranaki irouia angiia aomata bwa te Nu Tetemanti, e atongaki irouia bwa te Baibara n Erene ni Kristian, ao te Oo Tetemanti e aranaki irouia bwa te Baibara n Ebera. A onimakina te Baibara n Erene ao te Baibara n Ebera, ao a taku bwa boni bwaai ni koaua, ma tii ngkana e teretere man taeka ke bwaai aika a kaotaki iai bwa bon taiani kabotau ke taetae ni kaikonaki. A oota bwa a mwaiti taetae ni burabeti n te Baibara ake a a tia ni kakoroaki bukia, tabeua a tabe ni kakoroaki bukia ngkai, ao tabeua, a na kakoroaki bukia nakon taai aika a na roko.

ARAIA

Ana Tia Kakoaua Iehova? Eng, boni ngaia anne atongaia irouia. Bon te ara ae kabwarabwara aroia, ae e kaotia bwa a kaotioti ibukin Iehova, arona n Atua, ao ana kaantaninga. “Te Atua,” “te Uea,” ao “te tia Karikiriki”-n aron naba te “Beretitenti,” “te King,” ao “Mataniwin te Taanga ni Buaka”—bon aara n nakoa, ao a kona ni kamanenaki nakoia aomata aika kakaokoro nako. Ma “Iehova,” bon aran te aomata, ae te Atua ae moan te mwaaka ae te tia Karika te iuniweeti. E kaotaki aio n Taian Areru 83:18: “Ba a aonga n ataiko, ae IEHOVA aram, ba bon ti Ngkoe Teuare Moan te Rietata i aonaba ni bane.”

Aran te Atua n te taetae n Ebera nikawai

Te ara ae Iehova (ke Iawe, ae e kabonganaki riki n te Baibara ni Katorika ao irouia taan rabakau tabeman n taai aikai), e koreaki n te mwaiti ae kaania 7,000 te tai n te Baibara n Ebera nikawai. Angiini Baibara ngkai a aki kaota te ara aei, ma a onea mwina n “te Atua,” ke “te Uea.” Ma e ngae n anne, ni Baibara aikai, aomata a kona n atai kiibu ake e kabonganaki te ara ae Iehova iai n te Baibara n Ebera nikawai, bwa ni kiibu aikai, taeka aika kabonganaki iai a koreaki ni man bubura, n aron aei: te ATUA, te UEA. Baibara tabeua ake a karaoaki n taai aikai a kabongana te ara ae Iehova ke te ara ae Iawe. Ma te Baibara ni Kiribati e taekinna n Itaia 42:8 bwa “Bon Iehova Ngai; bon arau aei.”

Kibun te Baibara are a karekea araia mai iai Ana Tia Kakoaua Iehova, bon Itaia mwakorona 43. N te mwakoro anne, te waaki i aon te aonnaba e kabotauaki ma te waaki ae riki i nanon te tabo ni kaboowi: Atuaia botannaomata a kaoaki bwa a na kaotiia aia tia kakoaua bwa a aonga ni kakoaua aron raoiroia, ke a na ongora irouia taani kakoaua ibukin ana itera Iehova ma ni kariaia te koaua. E kangai Iehova nakoia ana aomata: “Bon taani kakoaua au taeka ngkami, ao au tia makuri ae I rineia: ba kam aonga n ataibwai ma n ira nanou, ma n ataai ba boni Ngaia Ngai; e aki karaoaki te Atua temanna i mwaiu, ao bon akea naba i mwiu. Bon Iehova Ngai, ae Ngai; ao akea naba te tia kamaiu i rarikiu.”—Itaia 43:10, 11.

Bon iai naba taani kakoaua ibukin Iehova ae te Atua i aon te aonnaba, ngaa ma ngaa te ririki imwain bungiakin Iesu. Tabeman mai buakoia mwaane aika onimaki aikai a taekinaki n Ebera mwakorona 11, ao imwina e a manga kangai Ebera 12:1: “Ma ngaia aei, ngkai iai taani kaotioti aika uanao aika otabaninira n ai aron te nang, ao ti na kaki rawawatara ni kabane ma te bure ae kai nimtira, ao ti na botumwaka ni biribiri n te kabobirimwaka ae kamenaki i mwaira.” E taekina ae kangai Iesu ngke e tei imatan Bontio Birato: “I bungiaki i bukin ae te kaotiota te koaua, ao I roko i aon te aba, i bukin aei naba.” E atongaki bwa “te tia kaotioti are kakaonimaki are koaua.” (Ioane 18:37; Te Kaotioti 3:14) E tuangia taan rimwina Iesu ae kangai: “Ma ane kam na anganaki te mwaka, ngkana E roko te Tamnei are Raoiroi i aomi: ao ane kam na riki ba taani kaotioti i bukiu i Ierutarem, ao i Iutaia ni kabanea, ao i Tamaria, ao ni karokoa tabon aonaba.”—Mwakuri 1:8.

Mangaia are aomata aika 6,000,000 tabun mwaitiia aika a kaotiota euangkerion ana Tautaeka n Uea Iehova rinanon Kristo Iesu n aaba aika raka mwaitiia nakon 230, a taku bwa e riai ngkana a atongiia bwa Ana Tia Kakoaua Iehova.

Taani Kakoaua aika 6,000,000 tabun n aaba aika a raka mwaitiia nakon 230

* Taeka aika mwaneweaki man te Baibara i nanon te boki aei a anaaki man te Baibara ni Kiribati, ma tii ngkana e kaotaki ae e kaokoro.

Copyright © 2006 Watch Tower Bible and Tract Society of Pennsylvania. All rights reserved.