Ana Tia Kakoaua Iehova—Antai Ngaiia? Tera Aia Koaua?

Tera Aia Koaua?

ANA TIA KAKOAUA IEHOVA a onimakina te Atua ae Moan te Mwaaka ae Iehova, ae te tia Karika karawa ma aonnaba. Bwaai aika baireaki ma ni karaoaki raoi ake a noraki n te iuniweeti, a boutokoa te iango ae riai, ae iai te tia Karikiriki ae moan te wanawana ma ni mwaaka, are e karaoi bwaai aikai ni kabane. N aron are e noraki aroaroia mwaane ma aine man aia mwakuri ake a kakaraoi, ao e noraki naba aroaron Iehova ae te Atua man ana mwakuri. Te Baibara e tuangira bwa “ana bwai ake a aki nonoraki ao a bon noraki raoi ma ngke a moa ni karikaki aonaba, n ataki ni baike a karaoaki.” Irarikin anne, n akea te bwana ke te taeka, “a tataekina mimitongin te Atua taiani karawa.”—I-Rom 1:20; Taian Areru 19:1-4.

TE AONNABA . . . e karikaki iroun Iehova . . . e kawakinaki irouia aomata . . . e na maekanaki n aki totoki

Aomata, a aki karaoi bwaata man te bokaboka ke taian TV ma kombiuta, n akea raoi bukina. Moan te rangi ni kamimi riki nakon bwaai aikai, aron te aonnaba ma bwaai ake a karikaki i aona, aika taian aroka ma maan. E riaon ara kona, ataakin raoi aron rabwatan te aomata ma bwaai ake e karaoaki mai iai aika mwaiti kurikuri—ao bon moanibaan te kamimi naba te kaburoro are ti kona n iaiango iai! Ngkana iai irouia aomata bukin karaoan aia bwai aika boou ke aika mangori riki ni kabotauaki ma bwaai aikai, ao te koaua naba bwa bon iai bukina ngkai Iehova ae te Atua e waakina naba ana karikibwai ae kamimi! E taekinaki anne n Taeka N Rabakau 16:4 (BK): “Iai bukini bai ni kabane ake e karaoi Iawe.”

Bon iai bukin karaoan te aonnaba iroun Iehova, n aron are e kaotia nakoia te moan taanga n aomata: “Kam na bati ni kariki, ao kam na kabatiaingkami, ao kaona aonaba . . . tau aroia ikani marawa, ma manin aan-nang, ma maan aika maiu aika kawakawa i aontano ni kabaneia.” (Karikani Bwaai 1:28) Ibukina bwa a aki ongeaba, te taanga aei a aikoa kona ni kaona te aonnaba irouia utu aika raraoi ake a na kawakina raoi te aonnaba ma aroka ao maan ake i aona. Ma aki-karaoan anne irouia, e aki kamatebuakaa ana kaantaninga Iehova. Ngaa ma ngaa te ririki imwin anne, e koreaki ae kangai: “Te Atua . . . ae karika aonaba ma ni karaoia . . . e aki matebuaka karaoana i Rouna.” E “karaoia ba e na maekanaki.” E na bon aki kamaunaki, ma “e teimatoa aonaba n aki toki.” (Itaia 45:18; Te Minita 1: 4, Te Baibara ni Katorika) E na boni koro bukin ana kaantaninga Iehova ibukin te aonnaba: “E na tei matoa au taeka, ao N na karaoi bwaai ni kabane aika I tangiri.”—Itaia 46:10.

Mangaia are Ana Tia Kakoaua Iehova a onimakina ae te aonnaba aei, e na teimatoa n aki toki, ao aomata ni kabaneia, aika a maiu ngkai ao ake a a tia ni mate, ake a kaboraoi aroia ma nanon Iehova ibukin te aonnaba ae katamaraoaki ma ni maekanaki, a na kona ni karekea irouia te maiu n aki toki iai. E itiuaki te botannaomata n te aki-kororaoi mairoun Atam ao Nei Ewa, mangaia are a bane ni bure. (I-Rom 5:12) E tuangira ae kangai te Baibara: “Boon te bure te mate.” “Akana a maiu a ataia ba a na mate, ma a aki ata te bai teuana akana a mate.” “Te aomata ae e bure, boni ngaia ae e na mate.” (I-Rom 6:23; Te Minita 9:5, BK; Etekiera 18:4, 20, BK) A na kanga ngkanne ni kona ni manga maiu bwa a aonga ni karekei kakabwaiaia i aon te aonnaba? Bon tii rinanon ana karea ni kaboomwi Kristo Iesu, bwa e kangai: “Boni Ngai te manga-uti, ao te maiu: ane onimakinai, ngkana tao e boni mate, ao e na boni manga maiu.” “A na bane iai n ongo bwanana aomata ake a mena i nanon ruaia ni mate, ao a na oti nako.”—Ioane 5:28, 29; 11:25; Mataio 20:28.

E na kanga n riki anne? E kabwarabwaraki n ‘euangkerion te tautaeka n uea,’ are e moan taekinna Iesu ngke e mena i aon te aonnaba. (Mataio 4:17-23) Ma ni boong aikai, Ana Tia Kakoaua Iehova a tabe n tataekina te rongorongo ae raoiroi n te aro ae rangi ni kaokoro.

Aia Koaua Ana Tia Kakoaua Iehova

Aia Koaua	Kakoauana man te Baibara
Te Baibara bon ana Taeka te Atua ao e koaua	2 Timoteo 3:16, 17; 2 Betero 1:20, 21; Ioane 17:17
E onimakinaki riki te Baibara nakon katei nikawai	Mataio 15:3; I-Korote 2:8
Aran te Atua bon Iehova	Taian Areru 83:18; Itaia 26:4; 42:8; Te Otinako 6:3
Kristo bon Natin te Atua ao e mangori riki Nakoina	Mataio 3:17; Ioane 8:42; 14:28; 20:17; 1 I-Korinto 11:3; 15:28
Kristo bon ana moani karikibwai te Atua	I-Korote 1:15; Te Kaotioti 3:14
E mate Kristo i aon te kai, ao tiaki te kaibangaki	I-Karatia 3:13; Mwakuri 5:30
Maiun Kristo n aomata e kabwakaki, bwa boon te kaboomwi ibukia aomata aika ongeaba	Mataio 20:28; 1 Timoteo 2:5, 6; 1 Betero 2:24
E bon tau ana karea Kristo ae tii teuana	I-Rom 6:10; Ebera 9:25-28
E kautaki man te mate Kristo bwa te aomata ae te taamnei ae e aki-mamate	1 Betero 3:18; I-Rom 6:9; Te Kaotioti 1:17, 18
E mena irarikia aomata Kristo n arona n taamnei	Ioane 14:19; Mataio 24:3; 2 I-Korinto 5:16; Taian Areru 110:1, 2
Ti a mena ngkai i nanon ‘tain te toki’	Mataio 24:3-14; 2 Timoteo 3:1-5; Ruka 17:26-30
Te Tautaeka n Uea ae kairaki iroun Kristo e na tautaekana te aonnaba n te raoiroi ma te rau	Itaia 9:6, 7; 11:1-5; Taniera 7:13, 14; Mataio 6:10
Te Tautaeka n Uea e na uota te maiu ae kororaoi nakon te aonnaba	Taian Areru 72:1-4; Te Kaotioti 7:9, 10, 13-17; 21:3, 4
E na bon aki kamaunaki te aonnaba, ao a na aki kamaunaki aomata ni kabaneia mai i aona	Te Minita 1:4; Itaia 45:18; Taian Areru 78:69
Te Atua e na kamauna te waaki ae ngkai n te buaka ae Aremaketon	Te Kaotioti 16:14, 16; Tebania 3:8; Taniera 2:44; Itaia 34:2; 55:10, 11
A na kamaunaki n aki manga kamaiuaki aomata aika buakaka	Mataio 25:41-46; 2 I-Tetaronike 1:6-9
Aomata aika a tangiraki iroun te Atua a na anganaki te maiu are aki toki	Ioane 3:16; 10:27, 28; 17:3; Mareko 10:29, 30
Bon tii teuana te kawai nakon te maiu	Mataio 7:13, 14; I-Ebeto 4:4, 5
A mate aomata ibukin ana bure Atam	I-Rom 5:12; 6:23
Akea te bwai ae maiu nako naba imwin maten te aomata	Etekiera 18:4; Te Minita 9:10; Taian Areru 6:5; 146:4; Ioane 11:11-14
Moone, bon ruanimateia aomata	Iobi 14:13, Dy; Te Kaotioti 20:13, 14, AV (irarikin te kibu)
E kaantaningaki te manga-uti ibukia maate	1 I-Korinto 15:20-22; Ioane 5:28, 29; 11:25, 26
E na toki te mate are e a reke mairoun Atam	1 I-Korinto 15:26, 54; Te Kaotioti 21:4; Itaia 25:8
Bon tii te nanai ae uarereke ae 144,000 mwaitiia ake a na nako karawa ma n tautaeka ma Kristo	Ruka 12:32; Te Kaotioti 14:1, 3; 1 I-Korinto 15:40-53; Te Kaotioti 5:9, 10
A manga bungiaki kaain 144,000 bwa natin te Atua n taamnei	1 Betero 1:23; Ioane 3:3; Te Kaotioti 7:3, 4
E karaoaki te berita ae boou ma te Iteraera n taamnei	Ieremia 31:31; Ebera 8:10-13
Ana ekaretia Kristo e kateaki ibon i aona	I-Ebeto 2:20; Itaia 28:16; Mataio 21:42
E na tataro te aba nakon Iehova n tii ngaia, rinanon Kristo	Ioane 14:6, 13, 14; 1 Timoteo 2:5
A aki riai ni kabonganaki katotongan bwaai n te taromauri	Te Otinako 20:4, 5; Nakoaia Ibonga 26:1; 1 I-Korinto 10:14; Taian Areru 115:4-8
E riai n rarawa te aba nakon te tabunea	Te Tua-Kaua 18:10-12; I-Karatia 5:19-21; Nakoaia Ibonga 19:31
Tatan bon te tia tautaekana te aonnaba aei, ae e aki-nonoraki	1 Ioane 5:19; 2 I-Korinto 4:4; Ioane 12:31
E aki riai ni buokanibwai te Kristian n te reitaki n te taromauri ma Aaro tabeua	2 I-Korinto 6:14-17; 11:13-15; I-Karatia 5:9; Te Tua-Kaua 7:1-5
E riai ni kaokoro te Kristian ma te aonnaba	Iakobo 4:4; 1 Ioane 2:15; Ioane 15:19; 17:16
Ongeaba n aia tua aomata, ngkana a aki bobuaka ma ana tua te Atua	Mataio 22:20, 21; 1 Betero 2:12; 4:15
Kanakin ke nimakin te raraa ke karinana i nanon ian te rabwata e urua ana tua te Atua	Karikani Bwaai 9:3, 4; Nakoaia Ibonga 17:14; Mwakuri 15:28, 29
A riai n iraki nanon ana tua te Baibara ni kaineti ma te aroaro ni maiu ae riai	1 I-Korinto 6:9, 10; Ebera 13:4; 1 Timoteo 3:2; Taeka N Rabakau 5:1-23
Kawakinan tuan te Taabati ngkoa e kaineti nakoia I-Iteraera n tii ngaia, ao e toki ngke e a toki te Tua Mairoun Mote	Te Tua-Kaua 5:15; Te Otinako 31:13; I-Rom 10:4; I-Karatia 4:9, 10; I-Korote 2:16, 17
E aki riai, kaokoroakin te korakina bwa mataniwi n Aro, ao kabonganan nakoa aika kaokoro	Mataio 23:8-12; 20:25-27; Iobi 32:21, 22
E aki rikirake te aomata man te ewarutin ma e karikaki	Itaia 45:12; Karikani Bwaai 1:27; Mataio 19:4
Kristo e karaoa te katoto ae a riai ni kakairi aomata iai, ni kaineti ma te beku iroun te Atua	1 Betero 2:21; Ebera 10:7; Ioane 4:34; 6:38
Te babetito ae kateboakin te rabwata ni kabane e karaoaki ibukin kaotan tian katabuani maiun te aomata	Mareko 1:9, 10; Ioane 3:23; Mwakuri 19:4, 5
A kukurei ni kaotiota te koaua man te Baibara i mataia aomata Kristian	I-Rom 10:10; Ebera 13:15; Itaia 43:10-12

Boretiaki n 2001
Copyright © 2006 Watch Tower Bible and Tract Society of Pennsylvania. All rights reserved.