Ana Tia Kakoaua Iehova—Antai Ngaiia? Tera Aia Koaua?

Te Euangkerio ae A Tangiriko bwa Ko na Ongora Iai

NGKE e mena Iesu i aon te aonnaba, ao a kawaria taan rimwina n titirakinna ni kangai: “Tera te kanikina ibukin menam ma [aomata] ao ibukin tokin te waaki i aon te aonnaba?” (NW) E kaekaia man taku bwa a na buaka botannaomata aika mwaiti, e na riki taian rongo, aoraki aika kakaiaki, mwaeiein te aba, ao rikiraken te aki-ako. A na mwamwanaia aomata aika mwaiti mataniwi n Aaro aika kewe, a na riribaiia ma ni bwainikiriniia taan rimwin Iesu ni koaua, ao e na mauna tangiran te raoiroi irouia aomata aika mwaiti. Ngkana a moanna n riki bwaai aikai, ao e na oti iai bwa e a mena Kristo ma aomata n aki nonoraki, ao e a tia n tei te Tautaeka n Uea i karawa. Bon te rongorongo ae kakawaki aei—ae te rongorongo ae raoiroi! Mangaia are Iesu e manga taekina kanoan te kanikina aei n taeka aikai: “E na tataekinaki euangkerion uean te Atua aei i aonaba ni bane ba te bwai ni kaotioti nakoia botanaomata ni kabaneia; ao ngkanne e na roko naba iai te toki.”—Mataio 24:3-14.

Te koaua bwa bwaai aika a riki n te aonnaba n taai aikai a aki raoiroi, ma e bon raoiroi te bwai are e kanikinaeaki iai, ae taekan menan Kristo ma aomata. Bwaai aika a taekinaki i eta a moanna n noraki n te ririki ae namataki are 1914! E kanikinaea tokin aia Tai Tientaire, ao moanakin maanin te tai ae e na mena imarenan onean mwin te tautaeka mairouia aomata, n ana Tautaeka Kristo ae Maanna Tenga te Ririki (ae te Mireniam).

E kaotaki ae e na iai maanin te tai ae e na waakinaki te bitaki anne iai, n te ka 110 n Areru, ni kibuna 1 ao 2, ao Te Kaotioti 12:7-12. E kaotaki iai bwa Kristo e na tekateka i angaatain te Atua i karawa, ni karokoa te tai are e na riki iai bwa te Uea. Ao ngkanne, te buaka are i karawa e na karika karenakoakin Tatan nakon te aonnaba, ma ni kareke kaiia kaain te aonnaba, ao Kristo e na tautaeka ibuakoia ana kairiribai. Tokin te buakaka ni kabane e na reke rinanon te ‘rawawata are korakora,’ ae te tai ae e na roko n tokina, n te buaka are Aremaketon, ao e na rimwiaki n ana Tautaeka Kristo ae Maanna Tenga te Ririki, ae e na rau.—Mataio 24:21, 33, 34; Te Kaotioti 16:14-16.

“Ma ko na ata aei,” e taku te Baibara, “ba ane a na roko tai aika kamamate ni boong aika kaitira. Ba ane a na riki aomata ba taan tangiriia i bon i rouia, n taani kani manemane, taani kamoamoaia, taani kainikatonga, taan taetaebuaka te Atua, taan aki iri nanoia aia karo, taani bangaomata, taan aki itiaki, taani babakaine, taani kainamatoa, taani winanti, taan aki tauu baangia, taan tiritiri, taan riba te raoiroi, taani kamwanea te aba, taan tautau aroia, taan nanorietata, taan tangira riki te maie nakon te Atua; taani bakan tangira te Atua, ma a kaakea mwakan tangirana: ko na tan nako mairouia aikai.”—2 Timoteo 3:1-5.

Tabeman a kona n taku bwa a a tia n riki bwaai aikai ngkoa, ma ni koauana raoi, a tuai man noraki n te aro ae rangi ni korakora, n aron ae riki ngkai. N aron are a taekinna taani koro rongorongo rimoa ao taan rabakau iai, bon akea riki te tai teuana ae ai aron are te tai man 1914 ni karokoa ngkai. (Nora te kaongora ae “Rikirakeia n Taai Aikai.”) A korakora riki kangaanga ngkai, nakon are rimoa. Ao n reitaki ma kanoan ana kanikina Kristo tabeua riki ibukin boong aika kaitira, a riai n iangoaki koaua aikai: Kabutan te aonnaba n tataekinan rongorongon menan Kristo ma aomata ao ana Tautaeka n Uea, e a moanna n rangi ni korakora riki ngkai nakon taai ake rimoa. Bwainikirinaia taan ua rongorongo e tuai ni karaoaki nakoia aomata tabeman, n aron karaoana nakoia Ana Tia Kakoaua Iehova. Bubua ma bubua mwaitiia ake a kamateaki n aia auti ni kaikain taian Nazi. Ni karokoa te bong aei, a katabuakaki Ana Tia Kakoaua Iehova n taabo tabeua, ao n taabo ake tabeua, a tauaki ni katikaki, a karabutinaki, a kammarakaki, ao a kamateaki. Bwaai aikai ni kabane bon kanoan te kanikina are e a kaotaki iroun Iesu.

N aron are e taetae ni burabetinaki n Te Kaotioti 11:18, “a un botanaomata” nakoia ana tia Kakoaua Iehova aika kakaonimaki, ao e oti iai bwa e nang kaotaki ‘unin’ Iehova ni kaitaraia botannaomata akanne. Te kibu aei e taekinna naba ae te Atua e nang ‘tiringia akana a urua aon te aonnaba.’ Akea te tai teuana riki rimoa are e kararaoma aron kateimatoan te maiu i aon te aonnaba. Ma e ngae n anne, e a rangi ni kaokoro n te tai aei! A mwaiti taan rabakau n te aonnaba ake a reirei bwa ngkana a teimatoa ni kabareka te aonnaba aomata, ao e nang bon aki tau ni maekanaki. Ma Iehova e “karaoia ba e na maekanaki,” ao e na boni kamaunaia taani kabareka, imwain ae e na rababa nako aia urubwai i aon te aonnaba ni kabuta.—Itaia 45:18.

KAKABWAIA I AON TE AONNABA I AAN ANA KAIRIRI TE TAUTAEKA N UEA

Kaantaningan ae a na maiu aomata i aon te aonnaba i aan ana kairiri ana Tautaeka n Uea te Atua, e aki boraoi ma aia kaantaninga taani kakoaua te Baibara aika mwaiti, aika a iangoia bwa a na mena i karawa aomata ni kabane ake a na kamaiuaki. Te Baibara e kaotia bwa tii te koraki ae e katauaki mwaitiia ake a na nako karawa, ao aomata aika a na maiu i aon te aonnaba bon te koraki ae uanao ae e aki kona ni warekaki mwaitiia. (Taian Areru 37:11, 29; Te Kaotioti 7:9; 14:1-5) E kaotaki ae ana Tautaeka n Uea te Atua i aan ana kairiri Kristo e na kaona te aonnaba ma n tautaekanna, n te taetae ni burabeti teuana ni bokin te Baibara ae Taniera.

Ana Tautaeka n Uea Kristo e kaikonakaki iai bwa te atibu ae tataaki man ana tautaeka Iehova ae ai aron te maunga. E orea ma ni kamauna te boua, ae e tei ibukiia botannaomata aika mwaaka n te aonnaba, ao “te atibu are orea te boua e riki ba te maunga ae ababaki, ao e kaon aonaba ni kabane.” E reitakinako te taetae ni burabeti anne ni kangai: “N aia bong uea akanne ao E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, ma e na ururu ma ni kamaunai uea akanne ni kabane, ao e na tei matoa n aki toki.”—Taniera 2:34, 35, 44.

Netherlands

Nigeria

Bon taekan te Tautaeka n Uea aio, ao te kaantaninga ae boutokoaki man te Baibara ibukin karekean te maiu are aki toki n te aonnaba ae e a tia ni kaitiakaki ma ni katamaroaki, are a ingainga nanoia kaain Ana Tia Kakoaua Iehova ni kani kaongoraeko iai. Mirion ma mirion mwaitiia aomata aika a maiu ngkai, n ikotaki naba ma mirion ma mirion aika a mena i nanon ruaia ni mate ngkai, ake a na anganaki aia tai ni maiu n aki toki iai. Ao ngkanne, i aan ana Tautaeka Kristo Iesu ae Maanna Tenga te Ririki, e na koro bukin ana kaantaninga nikawai Iehova, are e karaoa iai te aonnaba ma ni kamaekaia te moan taanga i aona. E na bon aki kona ni kabotu te Baretaiti i aon te aonnaba aei. N aron Atam are e mwiokoaki bwa e na mwakuri n te oo-n-aroka are Eten, botannaomata naba a na anganaki te mwakuri ae kamaiu ae kawakinan te aonnaba ma aroka, ao maan ake a maiu i aona. A na maan ni “kabaia ni uan aia makuri.”—Itaia 65:22, BK; Karikani Bwaai 2:15.

A mwaiti kiibu man te Baibara aika a kona n taekinaki aika a kaota aron te maiu n te tai are e na kaekaki iai te tataro are e reireinira Iesu: “E na roko ueam. E na tauaki am taeka i aonaba, n ai aron tauana i karawa.” (Mataio 6:10) Ma e bia tau moa tii te kibu aei: “Ao I ongo te bwana ae korakora man te kaintokanuea ba e kangai, Noria, e mena uman te Atua irouia aomata, ao E na maeka i rouia, ao a na riki ba ana botanaomata, ao te Atua E na boni memena i rouia, ao E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki: ba a mauna nako bwaai rimoa. Ao Teuare tekateka i aon te kaintokanuea E kangai, Noria, I a manga karaoi bwaai ni kabane ba bwaini ngkai. Ao e taku, Ko na koroboki: ba a kakaonimaki taeka aikai ao a koaua.”—Te Kaotioti 21:3-5.