Ana Tia Kakoaua Iehova—Antai Ngaiia? Tera Aia Koaua?

Aroia n Taekina te Euangkerio Nakoim

Hawaii

Venezuela

Yugoslavia

KRISTIAN a tuangaki bwa a riai ni “kakiritiania botanaomata ni kabaneia,” ma e aki nanonaki iai bwa a na kairoroia ke n taumatoaia aomata bwa a na rairi nanoia iai. Te mwioko mairoun Iesu bon ‘tataekinan te rongorongo ae raoiroi nakoia akana nanorinano,’ ‘bautaia akana a uruaki nanoia ni kamaiuia,’ ao ‘kabebetean nanoia akana tang.’ (Mataio 28:19; Itaia 61:1, 2; Ruka 4:18, 19) Ana Tia Kakoaua Iehova a kataia ni karaoa aei n te aro are a tataekina te rongorongo ae raoiroi ae kaotaki n te Baibara. N ai aron te burabeti rimoa are Etekiera, Ana Tia Kakoaua Iehova ni boong aikai a kataia ni kakaaeia aomata ake a “ikenrawa ma n tang i bukini bwaai ni kabane akana riai ni bati n ribaki akana karaoaki.”—Etekiera 9:4.

Aroia ae tanoata riki taekana, ae a kakaaeia iai aomata aika a rawawata nanoia ibukin bwaai aika buakaka aika a waakinaki ngkai, bon aroia n nakonako man te auti teuana nakon te auti teuana. N aroia anne, a kakorakoraia ni kawariia aomata n aron naba are e karaoia Iesu ngke e “kabuta taiani kawa ma maeka, n reirei, ma ni kaota rongorongon uean te Atua, ae raoiroi.” A karaoa naba anne taan rimwina rimoa. (Ruka 8:1; 9:1-6; 10:1-9) Ni boong aikai, n taabo ake a konaa, Ana Tia Kakoaua Iehova a kataia ni kawari auti nako tabeua te tai ni katoa ririki, ni kataia ni maroro ma kaain auti aikai i nanon tabeua te miniti ibukin taekan te bwai teuana are e kan ataaki ke e tatabeakinaki n te tabo anne ke n aban te aonnaba teuana. E kona ni maroroakinaki te kibu teuana ke uoua man te Baibara, ao ngkana e kan ongora te aomata are e kawaraki arei, ao te tia Kakoaua e kona ngkanne ni baireia bwa e na manga oki n te tai teuana ae nakoraoi, ibukin reitan te maroro. Baibara ma bwai ni wareware ake a kabwarabwara taekan te Baibara, a kona ni katukaki irouia kaain te auti, ao ngkana a tangiria, e kona ni waakinaki ngkanne te reirei n te Baibara ma ngaiia ni mwengaia, n akea boona. Mirion ma mirion mwaitin reirei n te Baibara n aron aikai aika a waakinaki ma aomata ao utu ni katobibia te aonnaba.

Te anga riki teuana are e tataekinaki iai “rongorongon uean te Atua, ae raoiroi,” bon rinanon botaki ake a booaki n taiani Maneaba n Uea. Taani Kakoaua a karaoi botaki iai ni katoa wiki. Te botaki teuana bon te kabwarabwara ibukia aomata nako i aon te reirei teuana ae a kakannongora aomata iai, ao e a rimwiaki n te ukeuke i aon te reirei ke te taetae ni burabeti teuana man te Baibara, are e kabonganaki iai te maekatin ae Te Taua-n-Tantani. Te botaki riki teuana bon te kuura ibukin kataneiakiia taani Kakoaua bwa a na mwaatai riki n tataekina te euangkerio, ma n rimwiaki n te reirei are e maroroakinaki iai aron tataekinan te rongorongo n ana aono te ekaretia. Irarikin anne, teuana te tai ni katoa wiki, taani Kakoaua a botaki ni mweenga tabeua ni kurubu aika uarereke, bwa a na reirei n te Baibara.

A uki nakoia aomata nako botaki aikai ni kabane. Akea te rikomwane iai. Botaki aikai a manena ibukia aomata ni kabane. E taku te Baibara: “Ti na i taratara n iangoi arora ba ti aonga ni keiakinira ni karika te tangira ma makuri aika raraoi. Ao ti na tai kaki te bobotira, n ai aroia tabemang, ma ti na taetae n i kauungaira i roura; ni kakorakoraira riki iai n te aro ane kam nora te Bong arei ba e a kan roko.” Te reirei ao te ukeuke ibon iroura, bon bwaai aika kakawaki naba, ma te bobotaki ma aomata tabemwaang e kaungai nanora: “E taimaki te biti n te biti; e reireiaki naba te aomata ngkana e bobo ma te aomata.”—Ebera 10:24, 25; Taeka N Rabakau 27:17, BK.

Taani Kakoaua a kareke tai naba ngkana a waakina tabeia i nanoni maiuiia, ibukin maroroakinan te euangkerio ma aomata tabeman ake a bo ma ngaiia. Tao a kona n taekin taeka tabeua nakoia kaain rarikiia, ke raoia ni mwananga i aon te bwati ke te wanikiba, ke ni waakinan te maroro ae abwabwaki riki ma raoraoia temanna ke aia koraki, ke te maroro ma raoia ni mwakuri ngkana a katawanou n aia tabo ni mwakuri. Angiin ana mwakuri n tataekina te rongorongo Iesu ngke e mena i aon te aonnaba, e a waakinaki n te aro aei—ngke e nakonako irarikin taari, e tekateka i aon te tabuki, e amwarake ni mwengan te aomata temanna, e kaea te botaki ni mare, ke e borau n te booti n akawa i nanon Naman Kariraia. E reirei n taiani maneaba ao i nanon te tembora i Ierutarem. N aki ongea bwa e ngaa te tabo are e mena iai, ma e bon reke naba ana tai iai ni maroroakina taekan ana Tautaeka n Uea te Atua. Ana Tia Kakoaua Iehova a kataia naba ni kakairi ni mwanekana aei.—1 Betero 2:21.

TATAEKINAN TE RONGORONGO RINANON KARAOAN TE KATOTO AE RAOIROI

Ni maiuia ma aia utu, ao ngkana a kaitiboo ma aomata tabeman, taani Kakoaua a kekeiaki mwaaka ma nanoia ni koaua ni kakaraoa ae e boraoi ma are a taekin naba nakoia aomata

Bon akea manenan aaro aikai n tataekina te rongorongo ae raoiroi, ngkana te tia ua rongorongo nakoim e aki kamanenai moa te rongorongo i nanoni maiuna. Bon te aro ni mwamwana te aba ngkana ko taekina te bwai teuana, ma ko karaoa ae kaokoro ma are ko taekinna, ao iai aomata aika mirion ma mirion mwaitiia ake a a tia n tannako man te Baibara ni mwamwanan te aba ae waakinaki irouia Aaro. E aki riai ni bukinaki te Baibara iai. Bon iai te Baibara n Ebera irouia taani koroboki ma Baritaio, ma Iesu e kabuakakaia te koraki aikai n atongia bwa taani mwamwana te aba. E taekinna bwa a wareware man te Tua mairoun Mote, ao e a manga tuangia taan rimwina ae kangai: “Ma ngaia ae kam na kawakini baikana a tuangngkami, ao karaoi: ma tai kakairi n aia makuri; ba a tutuatua, ma a aki karaoi.” (Mataio 23:3) E bati riki ae e kaotiotaki n ana katoto te Kristian ni maiuakina te aroaro ae riai irouna, nakon ae e kaotaki n te kabwarabwara ae rangi n ananau. A reireinaki n anne buu-aine aika Kristian ake iai buuia aika tiaki kaain te onimaki: “A na anaaki nanoia n aroaroia buuia ni maeka: ngkana a nora aroaromi ni maeka ae itiaki.”—1 Betero 3:1, 2.

Mangaia are Ana Tia Kakoaua Iehova a kataia ni kaota te rongorongo ae raoiroi n te aro naba aei: n te aro ae a karaoa te katoto ae moanibaan te raoiroi n aron te aroaro ni Kristian ae riai, ae a tataekinna naba nakoia aomata tabemwaang. A kataia ni ‘karaoia nakoia aomata tabemwaang, are a tangiria bwa e na karaoaki nakoia, irouia aomata tabemwaang.’ (Mataio 7:12) A kataia ni karaoa aei nakoia aomata ni kabane, ao tiaki tii nakoia raoraoia aika taani Kakoaua, ke raoraoia, kaain rarikiia, ke aia koraki. Kioina ngkai a aki-kororaoi, a aki tokanikai ni karaoa anne n taai nako. Ma nanoia, bwa a na karaoa ae raoiroi nakoia aomata ni kabane tiaki tii n te tai are a kaongoia iai taekan te rongorongo ae raoiroi i bukin te Tautaeka n Uea, ma buokaia naba n taai ni kabane ake a kona iai.—Iakobo 2:14-17.

Copyright © 2006 Watch Tower Bible and Tract Society of Pennsylvania. All rights reserved.