Ana Tia Kakoaua Iehova—Antai Ngaiia? Tera Aia Koaua?

Manenan te Euangkerio Nakoia Kaain Am Kaawa

N TAAI aikai ti a bati n ongongo te iango ae kangai: “A bon aki manena reirei ni Kristian. E aki kona n nakoraoi kamanenakiia n taai aikai are e bati te kangaanga iai.” Ma e ngae n anne, ao e noraki man te maroro i marenan te tia kairiia Hindu ae Mohandas K. Gandhi ao te British Viceroy i Inria rimoa ae Lord Irwin, bwa e ribootinaki te iango ae rangi ni kaokoro ma anne. E taekinaki bwa Lord Irwin e titirakina Gandhi bwa tera ana iango ibukin katokani kangaanga ni kabane imarenan Buritan ao Inria. E tabeka te Baibara Gandhi ma n rairia nakon kanimauani mwakoron Mataio, ao e taku: “Ngkana [kaain] abam ao [kaain] abau a uaia ni maiuakin reirei ake a taekinaki iroun Kristo n te Kabwarabwara i aon te Maunga aei, ao ti na boni bae n tia ngkanne ni katoki taiani kangaanga i abara, ma tiaki tii ara kangaanga, ma aia kangaanga naba kaain te aonnaba ae bwanin.”

Te kabwarabwara anne e taekina aron ukoukoran bwaai n taamnei, te nimamannei, te rau, te nanoanga, ao tangiran te raoiroi. E aki tii kabuakaka te tiriaomata, ma e kabuakaka naba te un ma aomata tabemwaang, ao tiaki tii te wene ni kimoa, ma iaiangoan naba te kaibwabwaru i nanom. E kabuakaka te buu-raure n akea raoi bukina, ae e urui utu ma ni karawawataia ataei. E tuangira ae kangai: ‘Tangiria naba te koraki aika a ribai ngkami, buokia aomata aika kainnano, tai motiki taekaia aomata n akea te nanoanga, ao karaoa ae ko tangiria bwa e na karaoaki nakoim nakoia aomata.’ A na mwaiti kakabwaia aika a na reke ngkana a kamanenaki reirei aikai. Ngkana a mwaiti aomata n am tabo aika a maiuakin reirei aikai, ao a na ririkirake n raoiroi kaain am kaawa!

Ana Tia Kakoaua Iehova a buoka aron waakinan aei. Te Baibara e reireiniia bwa a na karinea te mare. A kataneiaki natiia n reirei aika raraoi. E katuuaki riki kakawakin te maiu n utu. Utu aika a kukukurei bon te kakabwaia nakon am kaawa ao nakon am botannaomata. A mwaiti rongorongon te aonnaba rimoa aika a kaotii katoto n aron tautaeka aika mwaaka n te aonnaba ake a uruaki ngke e a mamaara te reitaki n te utu, ao e a moanna n rikirake riki te wene ni bure. Ngkana a mwaiti aomata aika a kairaki irouia Ana Tia Kakoaua Iehova bwa a na maiuakin reirei ni Kristian, ao ai aron ae e na kakerikakaki riki iai te maiu-buaka, te wene ni bure, ao mwakuri ni kakeru, n am kaawa.

Te kangaanga teuana ae e korakora irouia natannaomata ma botannaomata, bon taekan te kairiribai ibukin kaokoron te reeti. Ni kaitaran te iango anne, e kangai te abotoro Betero: “I ataia ba bon te koaua ba te Atua E bon aki nanonano n tarakin aroia aomata; ma e tangiraki i Rouna ane makua, ma ni karaoa te raoiroi, i buakoia botanaomata ni kabaneia.” Ao e korea naba ae kangai Bauro: “Akea te I-Iutaia i nanoni Kristo ao akea naba te I-Erene, ao akea te toro ao akea naba te inaomata, ao akea te mwane ao akea naba te aine: ba ti temanna ngkami ni kabaneingkami i nanoni Kristo Iesu.” (Mwakuri 10:34, 35; I-Karatia 3:28) A butimwaea anne Ana Tia Kakoaua Iehova. Aomata mai buakoia reeti nako ao aika a kakaokoro nako kuniia a uaia ni mwakuri ni kautun aia botaki n te aonnaba, ni mwaangana nako, ao n taian ekaretia.

I Aberika, iai baronga tabeua aika a aki kona n reitaki n akea te buaka ae e na riki iai. Ma n aia ruunga Ana Tia Kakoaua Iehova n te aba anne, aomata mai buakoia baronga aika mwaiti a kona ni uaia n amwarake, ni matu, ao n taromauri n te boonnano ao te iraorao ae kaunga. Taani mwakuri n te tautaeka a mimi n noran aei irouia. Te katoto teuana ae kaota aron mwaakan te waaki ni Kristian ni koaua ni kona ni katiteuanaia aomata, e taekinaki n nuutibeeban New York ae te Amsterdam News ae bonginaki n Aokati 2 1958. A kairaki taeka aikai n noran te ruunga ibukin aaba aika kakaokoro are e taekinaki ma imwaina, are e boo i New York City ae a roko iai taani Kakoaua aika a raka mwaitiia nakon 250,000.

“N taabo nako, Ibwatabwata, Imatang, ao kaain Atia aika a kakaokoro nako aroia ao abaia, a botaki ma te kimwareirei n akea waewaeaia. . . . Taani Kakoaua man aaba aika 120 mwaitiia ake a taromauri iai a uaia ni maiu ma n taromauri n te rau, ma ni kaota aron bebeten karaoan anne nakoia kaain Amerika. . . . Te ruunga bon te katoto ae moanibaan te raoiroi ae kaota aroia aomata ni kona ni uaia ni mwakuri ma ni maiu n te tabo teuana.”

A mwaiti aomata aika a kona n taku bwa a aki manena reirei ni Kristian n te aonnaba ae ngkai. Ma e ngae n anne, iai riki te bwai teuana ae e a tia n noraki nakoraoina, ke e na bon nakoraoi? Reirei ni Kristian a kona n rangi ni manena nakoia kaain am kaawa ngkai ngkana a kamanenai raoi, ao e na aanaki iai aron buokaia ‘botannaomata, natannaomata, ao baronga’ ni katobibia te aonnaba, i aan ana kairiri ana Tautaeka n Uea te Atua ae e na tautaeka i aoia aomata nako.—Te Kaotioti 7:9, 10.

Copyright © 2006 Watch Tower Bible and Tract Society of Pennsylvania. All rights reserved.