Ana Tia Kakoaua Iehova—Antai Ngaiia? Tera Aia Koaua?

E KARIAIA moa waakinakoan te buakaka te Atua ngkai, ao mirion ma mirion mwaitiia kaain te aonnaba aika a karaoa ae buakaka ni bon oin nanoia. N aron anne, a kateirakea te buaka, a kabwakai boom i aoia ataei, a kabueka te aonnaba, ao a kariki taian rongo. Mirion ma mirion aomata ake a moko ao a ituaki ni kaentian te mama, a kakaraoa te wene ni kimoa ao a ituaki n aorakin te wene ni bure, a kabonganai mooi aika manging n te aro ae riao ao a bwakaato, ao a mwaiti riki nakon akanne. Aomata aikai a aki tangira raoi katokan te buakaka ni kabane. A tii tangiria bwa a na kamaunaki taian reke ni kai ake a reke man karaoan bwaai aikai. Ngkana a taia uaan are a unikia ao a takarua ni kangai, “Bukin tera ngkai e riki aio nakoiu?” Ao a bukina te Atua n aron are e taekinaki n Taeka N Rabakau 19:3: “E katekebuaka te aomata arona n nanobaba; Ao ngkanne e ngurengure nanona nakon Iehova!” Ao ngkana e katoki aia mwakuri aika buakaka te Atua, ao a na ngurengure iai n tangitang ibukin buan inaaomataia ni karaoa ae buakaka!

Oin bukina are Iehova e kariaia moa waakinakoan te buakaka, bwa e aonga ni kaekaa ana kauntaeka Tatan. E taku Tatan te Riaboro bwa te Atua e aki kona ni karekeia aomata i aon te aonnaba aika a na teimatoa ni kakaonimaki Irouna ngkana a kataaki. (Iobi 1:6-12; 2:1-10) Iehova e kamaana Tatan teutana bwa e aonga n nonoraki kakoauan ana kauntaeka arei. (Te Otinako 9:16) E teimatoa Tatan ni kariki kangaanga bwa e aonga ni katannakoia aomata mairoun te Atua, ngkai e kataia ni kamaiua ana kauntaeka. (Te Kaotioti 12:12) Ma e ngae n anne, e boni kakaonimaki Iobi. E kakaonimaki naba Iesu. A karaoa naba aron anne Kristian ni koaua aika a maiu ngkai.—Iobi 27:5; 31:6; Mataio 4:1-11; 1 Betero 1:6, 7.

Ma tiaki arona anne are e taekinaki n te Baibara. Ai aron ae e a riaon are e kona ni kakoauaki, ma tii ibukina bwa aomata a maan n nonora te buakaka i nanon tienture aika mwaiti. Iehova e karika te aonnaba ao e tuangia aomata bwa a na kaonna irouia mwaane ao aine aika raoiroi aika a na kawakini taian aroka ao maan ake a maiu i aona, ma ni kateimatoa tamaroana n aki kamauna. (Nori kaongora aika “Tera Aia Koaua?” ao “Te Euangkerio ae A Tangiriko bwa Ko na Ongora Iai.”) Tiaki te koaua bwa te Baretaiti are e beritanaki e a rangi n riaon ae e kona n reke, ma ni koauana, e a rangi ni kakaiaki aron te aonnaba ngkai n te aro are e aki kona ni kariaiakaki waakinakoana. E na oneaki mwina n te Baretaiti.

Onimakinan berita aikai bon tiaki te aeka n onimaki ae akea aana. “E reke te onimaki n te ongora.” Rinanon reiakinan ana Taeka te Atua, e a kateretereaki iai aron rabakaun ana reirei, ao e a rikirake iai te onimaki.—I-Rom 10:17; Ebera 11:1.

Te rabakau n neneri bwain rimoa aika a kuneaki aika iai irekerekeia ma te Baibara, e kakoaua etin angiin rongorongon te Baibara. Te rabakau n aonnaba ae koaua e boraoi naba ma rongorongo ake n te Baibara. Koaua aika a na kaotaki ngkai a kamani mena i nanon te Baibara imwain kuneakiia irouia taan rabakau: rinanin karaoan te aonnaba, ae e mronron te aonnaba, ae e tine te aonnaba n te akea, ao ae a mwamwananga man te aba teuana nakon te aba teuana mannikiba.—Karikani Bwaai, mwakorona 1; Itaia 40:24; Iobi 26:7; Ieremia 8:7.

Kairan korean te Baibara e kakoauaki n taetae ni burabeti ake a kakoroaki bukiia. E taetae ni burabeti Taniera ibukin teiraken ao manga kerikakin tautaeka n te aonnaba aika mwaaka riki, n ikotaki naba ma te tai are e na roko iai te Mesia, ao kamateana. (Taniera mwakorona 2, 8; 9:24-27) Ni boong aikai, bon iai riki taetae ni burabeti tabeua ake a tabe ni kakoroaki bukiia, ao a kanikinaei boong aikai bwa “boong aika kaitira.” (2 Timoteo 3:1-5; Mataio mwakorona 24) Bon akea irouia aomata te kona n taekin kanoan taai aika imwaia n aron anne. (Itaia 41:23) Ibukin norakin koaua tabeua riki, ao nori booki aika The Bible—God’s Word or Man’s? ao Is There a Creator Who Cares About You?, ake a boretiaki iroun te Watchtower Bible and Tract Society.

Ko riai n nenera te Baibara ao n iangomwaaka n taekan kanoana, ma ni bubutii anganakim taamnein te Atua bwa e na kairiko. (Taeka N Rabakau 15:28; Ruka 11:9-13) “Ngkana akea ana rabakau temanna i buakomi,” e taku te Baibara, “e na butiia te Atua, ae tituaraoi n angangania aomata ni kabaneia, n aki ngurengureakiniia, ao e na bon anganaki.” (Iakobo 1:5) Bon iai naba booki aika a kabwarabwara te Baibara aika a manena warekaia. N angiin te tai e kainnanoaki naba te ibuobuoki mairouia aomata tabemwaang, n aron are e riki ngke Biribo e reirei ma te I-Itiobia. (Mwakuri 8:26-35) Ana Tia Kakoaua Iehova a waakin reirei n te Baibara n aki kabooaki, ni mwengaia aomata aika a kan ongora. Ko inaaomata ni bubutii karaoan aei nakoim.

E ribaki ana mwakuri Iesu n tataekina te rongorongo, ao e taekinna bwa a na ribaaki naba taan rimwina. Ngke a nano n ana reirei Iesu aomata tabeman, a manga kangai mataniwi n Aro tabeman: “Ao ngkami kam burebureaki naba? Iai ane kakoauaa mai buakoia taan tau-taeka ma Baritaio?” (Ioane 7:46-48; 15:20) A mwaiti aomata aika a reiakiniko bwa ko na aki reirei ma taani Kakoaua ma te koraki akanne a aki rangi n ataa te bwai are a taekinna, ke a boni kairiribai. Reirei irouia taani Kakoaua, ao noria ibon iroum bwa e na ririkirake iai am atatai i aon te Baibara, ke e na aki.—Mataio 7:17-20.

A kakairi iroun Iesu ngkana a karaoa anne. E bon nakoia I-Iutaia. Bon iai oin aia Aro I-Iutaia, ma e a tia n raure nako ma ana Taeka te Atua n itera aika mwaiti. (Mataio 15:1-9) Bon iai aia Aaro botannaomata nako, ngkana Aaro aika aongkoa a Kristian, ke tiaki Kristian. Moan te kakawaki bwa aomata a na kakoauai bwaai aika a boraoi ma ana Taeka te Atua, ao aia kekeiaki taani Kakoaua ibukin buokaia aomata n te itera aei e a kaota aron tangiraia aomata irouia.

Aomata ni kabane aika a nano n aia Aro a riai n taku bwa aia Aro bon te Aro ae eti. Bwa ngkana a aki, ao bukin tera bwa a kaainna? A kaungaki ni kangai Kristian: “Kam na katai bwaai ni kabane ba ua ra; kam na taua ae raoiroi.” (1 I-Tetaronike 5:21) Te aomata e riai n taraia bwa ana koaua a boutokoaki raoi n te Baibara, bwa bon tii teuana te onimaki ni koaua. E kakoauaki aei n I-Ebeto 4:5, are e taekina “ti temanna te Uea, ao ti teuana te onimaki, ao ti teuana te babetito.” E aki boraoi ana kaantaninga Iesu ma te kaantaninga ae bwainaki ngkai, ae aongkoa a mwaiti kawai ao Aaro aika a bane n nakon te kamaiuaki. Ma e kangai: “Ba e wariki te mataroa, ao e irariki te kawai are nako n te maiu, ao a karako akana kunea.” Ana Tia Kakoaua Iehova a kakoaua bwa a a tia ni kunea te kawai aei. Bwa ngkana tiaki ngaia, ao ngkanne a na bae ni kakaaea riki te Aro teuana ae eti.—Mataio 7:14.

Tiaki. Mirion ma mirion aomata ake a maiu i nanon tienture ake a a tia n nako ao ake a aki kaaina Ana Tia Kakoaua Iehova a na kautaki ma n anganaki aia tai ni maiu. Tao a mwaiti aomata aika a maiu ngkai aika a na tei ibukin te koaua ao te raoiroi imwain rokon te ‘rawawata ae korakora,’ ao a na kamaiuaki. Ao e taku naba Iesu bwa ti aki riai ni motika taekan raora. Bwa ti taratara tinanikuia aomata; te Atua e tuoa te nano. E eti ana taratara ao e motikitaeka ma te nanoanga. E anga te motikitaeka nako nanoni bain Iesu, ao tiaki nako nanoni baira.—Mataio 7:1-5; 24:21; 25:31.

E taekina ae kangai te abotoro Bauro ibukin bwaintangira aika taiani mwane: “E na angabwai te aomata n ai aron are e karekea nanona iai; n aki rawawata, ao tiaki n ai aron ae tebonaki ba e na anga: ba te Atua E tangira te aomata ae e waerake nanona ni kan angabwai.” (2 I-Korinto 9:7) Akea te rikomwane ae karaoaki n aia Maneaba n Uea ke aia tabo ni bwabwaro Ana Tia Kakoaua Iehova. Iai bwaoki ake a kateaki n taabo aika a angaraoi ibukia aomata aika a tangiria ni bwaintangira. Akea ae ataa mwaitin aia angabwai ake tabeman. Tabeman a kona n anga ae mwaiti riki nakon are a kona n anga tabeman; tabeman tao akea aia bwai ae a kona n anga. Iesu e kaota te kaantaninga ae riai ngke e taekina te nne ni mwane n te tembora are i Ierutarem, ma aomata ake a karin aia bwaintangira iai: Bon tiaki mwaitin te mwane ae karinaki ae kakawaki, ma e kakawaki riki ana kona n anga ao nanona ni kan anga.—Ruka 21:1-4.

Ngkana e on nanon te aomata temanna n ataakin te Baretaiti i aon te aonnaba ae e na tautaekanaki n ana Tautaeka n Uea Kristo are e a taetae ni beritanaki, ao e na tangiria n tibwatibwa te rongorongo anne nakoia aomata tabeman. Ngkoe naba ko na tangiria ni kani karaoa anne. Bon te rongorongo ae raoiroi!—Mwakuri 5:41, 42.

Karaoan aei bon te aro ae kakawaki ae ko kaotiko iai bwa te tia rimwin Iesu Kristo. N te Baibara, e atongaki Iesu bwa “te tia kaotioti are kakaonimaki are koaua.” E tataekina te rongorongo ngke e mena i aon te aonnaba ni kangai: “E a kan roko uean te Atua,” ao e kanakoia taan rimwina bwa a na tataekina naba ae aron anne. (Te Kaotioti 3:14; Mataio 4:17; 10:7) Imwina riki Iesu e tuangia taan rimwina ni kangai: “Ma ngaia ae kam na nako ni kakiritiania botanaomata ni kabaneia, . . . n reireiia.” E taetae ni burabeti naba ni kaotia bwa imwain rokon te toki, ao e na “tataekinaki euangkerion uean te Atua aei i aonaba ni bane ba te bwai ni kaotioti nakoia botanaomata ni kabaneia.”—Mataio 24:14; 28:19, 20.

A mwaiti aanga ike e kona n taekinaki iai te euangkerio aei. Te taetae nikawai ma raoraom ao aomata ake a kinaaki iroum e aki toki ni karekea kawain karaoan anne. Tabeman a karaoia rinanon te kororeta ke rinanon te tarebon. Tabeman riki a kona ni kanakoi booki tabeua nakoia aomata ake a kinaia, ake a taku bwa a na kukurei ni wareki. Ibukin nanoia ni kani kawaria aomata ni kabaneia, taani Kakoaua a mwananga man te auti teuana nakon te auti teuana ma te rongorongo aei.

Iai n te Baibara te kakao ae kaunga aei: “Ao E kangai te Tamnei, ma te aine ae a tiba mareaki, Mai. Ao ane ongo e na kangai, Mai. Ao ane kani moi ao e na nako mai: ane kan anaa te ran ni kamaiu ao e na anaia ao akea boona.” (Te Kaotioti 22:17) Kaongoakiia aomata taekan te Baretaiti i aon te aonnaba ao kakabwaia ake a na reke iai, e na waakinaki irouia aomata aika a kukurei nanoia ni karaoa anne, are e on nanoia n tangiran kan tibwakin te rongorongo ae raoiroi aei.

Ti ataia bwa e na boni bae n iai riki am titiraki tabeua ibukia Ana Tia Kakoaua Iehova ao ibukin aia koaua. Tao rongorongoia tabeua a kauntaekaki n taabo tabeua. Ti kukurei ni kaeka am titiraki. E aki tau buburan te boki aei ibukin karaoan anne, mangaia are ti kaoko bwa ko na titirakinia taani Kakoaua aika a mena n am tabo. Ko kona ni karaoa anne n aia botaki ake a booaki n aia Maneaba n Uea, ke ngkana a kawariko ni mwengam. Ke ko kona ni kanakoi am titiraki nakon te Watch Tower, ni kabongana te atureti teuana are e oti i nano.