A Riai n Itiaki Ana Toro te Atua

1. E itiaki te Atua ae Iehova ao e tabu. E tangiriia taan taromauria bwa a na teimatoa n itiaki—n te aro n taamnei, n aroaroni maiuiia, n aia iango, ao n rabwataiia. (1 Betero 1:16) E tangiraki te korakora ngkana ti na teimatoa n itiaki imatan te Atua. Ti maiu n te aonnaba ae aki itiaki. Ti riai ni buakani aroarora aika a tangira te bure. Ma a aki riai n toki nanora.

2. Itiaki n te Aro n Taamnei: Ngkana ti tangiria n toro iroun Iehova, ti aki kona n taui reirei ke katei aika reitaki ma te Aro ae kewe. Ti riai n otinako mai buakon te Aro ae kewe n aki buokanibwai ma ngaia. (2 I-Korinto 6:14-18; Te Kaotioti 18:4) Ngkana ti a tia n reiakina te koaua ibukin te Atua, ti riai n tarataraira bwa ti aki mwamwanaki irouia aomata aika a reirei bwaai aika kewe.—2 Ioane 10, 11.

3. Itiakin te Aroaro ni Maiu: Iehova, e tangiriia taan taromauria bwa a na karaoa te aroaro ni Kristian ni koaua n aki toki. (1 Betero 2:12) E nori bwaai ni kabane ake ti karaoi, e ngae ngkana ti karaoi ni karaba. (Ebera 4:13) Ti riai n rarawa nakon te wene ni bure, ao aro riki tabeua aika kammaira aika a karaoaki n te aonnaba aei.—1 I-Korinto 6:9-11.

4. Itiakin te Iango: Ngkana ti karina inanora, iango aika itiaki ma n raoiroi, e na itiaki naba aroaroni maiura. (I-Biribi 4:8) Ma ngkana ti iaiangoi bwaai aika kammaira, ti na kairaki nakon karaoan mwakuri aika buakaka. (Mataio 15:18-20) Ti riai n rarawa nakon aro ni kaki botu aika a kona ni kabareka ara iango. Ti kona ni karin inanora iango aika itiaki ngkana ti reirei n Ana Taeka te Atua.

5. Itiakin te Rabwata: A riai n itiaki rabwataia ao kunnikaia Kristian kioina ngkai a tei ibukin te Atua. Ti riai n tebokii baaira imwin kawaran te roki n nako tinaniku, ao ti riai n tebokii naba imwain amwarakera ke katauraoan te amwarake. Ngkana akea te kai n nako tinaniku ae raoiroi, a riai n taunaki bwain mwin te nako tinaniku. (Te Tua-Kaua 23:12, 13) E buoka aron kateimatoan te marurung ngkana e itiaki raoi te rabwata. Mwengan te Kristian, e riai n tara raoi ma n itiaki, nanona ao tinanikuna. E riai n taraaki irouia kaain te kawa bwa te katoto ae raoiroi.

6. Te Taetae ae Itiaki: A riai n taekina te koaua n taai nako ana toro te Atua. A aikoa rin n Ana Tautaeka n Uea te Atua taani kewekewe. (I-Ebeto 4:25; Te Kaotioti 21:8) A aikoa kabongana te taetae ae kammaira Kristian. A aki manikangare n taekin bwaai aika kammaira, ao a aki naba ongo n aekan manikangare aikai. A taraaki bwa aomata aika kaokoro n aia tabo ni mwakuri, n aia tabo n reirei, ao n aia kawa, ibukina bwa a kabongana te taetae ae itiaki.—I-Ebeto 4:29, 31; 5:3.

A riai n itiaki ana toro te Atua n aroaroia ni kabane

Copyright © 2006 Watch Tower Bible and Tract Society of Pennsylvania. All rights reserved.