Aron Baireakin Ana Tia Kakoaua Iehova

1. E a tibwa manga tei aia botaki Ana Tia Kakoaua Iehova ni boong aikai, n te ririki 1870 tabun. N te moan tai, a aranaki bwa Taan Reirei n te Baibara. Ma n 1931, a bwaina te ara man te Baibara, ae Ana Tia Kakoaua Iehova. (Itaia 43:10) E a rikirake man te botaki ae uarereke, n riki bwa te botaki ae bubura, ae kaaina, bon Taani Kakoaua aika mirion ma mirion mwaitiia, aika a tabe n tataekina te rongorongo n aaba aika a raka riki mwaitiia nakon 230.

2. Angiin aia ekaretia Ana Tia Kakoaua Iehova, a botaki tenua te tai ni katoa wiki. Ko a kaoaki bwa ko na kaei botaki aikai ni kabane. (Ebera 10:24, 25) A aanaki reirei ni botaki aikai, i aon te Baibara. A kaukaki ao a kainaki botaki aikai n te tataro. N angiini botaki, a anaaki “anene ma kuuna aika bwain te tamnei.” (I-Ebeto 5:18, 19) Akea te kanrin, ke te riko mwane iai.—Mataio 10:8.

3. Angin ekaretia, a botaki n te Maneaba n Uea teuana. Taabo ni botaki aikai, bon auti aika a kateaki irouia Taani Kakoaua aika a aki kabooaki. Ko aki kona n nori katotongan bwaai, kaibangaki ke bwaai n aron aikai n te Maneaba n Uea. A kabooaki kabane mwane, man bwaintangira aika a reke. Iai te baoki ae tauraoi ibukia aomata aika akana ngaaia bwaintangira.—2 I-Korinto 9:7.

4. Iai unimwaane, ke mataniwi aika a mena n ekaretia nako. A kaira reiakinaia kaain te ekaretia. (1 Timoteo 3:1-7; 5:17) A buokaki irouia tooro-ni-minita. (1 Timoteo 3:8-10, 12, 13) Mwaane aikai, a aki karietataki riki i aoia kaain te ekaretia. (2 I-Korinto 1:24) A aki anganaki nakoa aika kaokoro. (Mataio 23:8-10) E aki okoro aia kunnikai ma aomata tabeman. Ao a aki kabooaki ibukin aia mwakuri. A kukurei unimwaane, ni buoka aron karekean bwaai n taamnei aika kainnanoaki iroun te ekaretia. A kona ni kabebetei naano, ma n anga reirei ibukin buokan kanganga.—Iakobo 5:14-16; 1 Betero 5:2, 3.

5. Iai naba aia bwabwaro ke botaki aika bubura aika a karaoi Ana Tia Kakoaua Iehova, ni katoa ririki. A mwaiti ekaretia aika a botaki ibukin karekean reireiaia ae okoro man te Baibara. A babetitoaki iai taan reirei aika a boou, ni bwabwaro ke botaki aikai.—Mataio 3:13-17; 28:19, 20.

6. Kautun aia botaki Ana Tia Kakoaua Iehova n te aonnaba, e mena i New York. E mena iai te Rabwata n Tautaeka, ae te rabwata n unimwaane aika rabakau, ae tararua te ekaretia ae katobibia te aonnaba. Iai naba mwangan te aobiti aei, aika a raka mwaitiia nakon 100, n aban te aonnaba aika bati. N taabo aikai, aomata aika a aki kabooaki, a mwakuri ni boreeti ma n tibwatibwai booki ibukin te Baibara. E a baireaki naba maiai te mwakuri n tataekina te rongorongo. Bukin tera ngkai ko aki bairea kawaran mwangan te aobiti aei ae kaan ma ngkoe?

Copyright © 2006 Watch Tower Bible and Tract Society of Pennsylvania. All rights reserved.