Ñamomba’eva’erã ñande rekove ha ñande ruguy

1. Jehová ha’e tekove Me’ẽha. Opa tekove oĩva oiko Ñandejára oipotágui. (Salmo 36:10 [36:9, NM].) Pe tekove ha’e tuichaiterei mba’e Jehovápe g̃uarã. Mitã rekove ne’ĩrava onase, upéva jepe mba’e guasu Jehovápe. Ñandejárape g̃uarã ivai ojejuka pe mitã oñeformavahína. (Éxodo 21:22, 23; Salmo 127:3.)

Ñambovy’a hag̃ua Ñandejárape, ñamboykeva’erã tuguy ñemoĩ, vicio ky’a ha oimeraẽ mba’e ikatúva ojapo vai ñanderehe

2. Cristiano añetegua ojepy’apy ha oñangareko ijehe. Oñeha’ã omoĩ porã imbayruguata ha hogakuéra, ani hag̃ua ojehu mba’eve ivaíva. (Deuteronomio 22:8.) Ñandejárape oservíva ndojapói mba’eve ikatuva’erã oapeligra hekove vy’a rehehápe. Upévare noha’ãi mba’eveichagua deporte oĩháme violencia ikatúva ojapovai hapicháre. Omboyke opaichagua juego omokyre’ỹva violencia. (Salmo 11:5; Juan 13:35.)

3. Ñande Apohare omomba’eguasu avei mymbakuéra rekove. Cristiano ikatu ojuka mymbakuéra ho’u hag̃ua, oñemonde térã oñeñangareko hag̃ua mba’asy ha ambue pelígrogui. (Génesis 3:21; 9:3; Éxodo 21:28.) Upéicharõ jepe naiporãi oñenupa térã ojejuka mymbakuéra depórtegui rei térã vy’arãnte. (Proverbios 12:10.)

4. Jepita ha jesu’u petỹ térã droga ojeporúva vy’arã ndaha’éi cristiánope g̃uarã. Ko’ã mba’e ojejapóva naiporãi 1) ojapógui ñandehegui hembiguái, 2) ombyaígui ñande rete ha 3) ñanemongy’águi. (Romanos 6:19; 12:1; 2 Corintios 7:1.) Ikatu hasy jaheja ko’ã vicio vai, upevére ñambovy’asérõ Jehovápe tekotevẽ jaheja umi mba’e.

5. Pe tuguy ha’e avei tuicha mba’e Ñandejárape g̃uarã. Ha’e he’i pe alma, ñande rekove, oĩha ñande ruguýpe. Upévare tuguy ndoje’uiva’erã. Upéicha avei naiporãi ja’u mymba ro’o ndojehuguy’óirõ hekopeporã. Oime rire peteĩ mymba ojejuvy térã omano ñuhãme, ndoje’uiva’erã. Ojejuka rire kyse térã mbokápe, pya’e ojehuguy’ova’erã ikatu hag̃ua oje’u. (Génesis 9:3, 4; Levítico 17:13, 14; Hechos 15:28, 29.)

6. Oĩ vaípa ñamoĩ tuguy ñande retepýpe? Nemandu’áke Jehová ojerureha jajejoko hag̃ua tuguýgui. Kóva he’ise ndaikatuiha ñamoĩ ñande retepýpe, mba’eveichavérõ, ñande rapicha ruguy, térã ñande ruguy oñeñongatuva’ekue. (Hechos 21:25.) Upévare cristiano añetéva nomoĩkái tuguy ijupe. Pero ikatu oiporu tratamiento ndoguerekóiva tuguy. Ha’ekuéra oikovese, upéicharõ jepe nomboykemo’ãi Ñandejára ley osalvapotávo hekove. (Mateo 16:25.)

Copyright © 2006 Watch Tower Bible and Tract Society of Pennsylvania. All rights reserved.