Guutip nunarsuaq sumik siunertaqarfigaa?

1. Jehovap nunarsuaq manna pingortissimavaa inunnit naassaanngitsumik inuusunit najugarineqarsinnaaqqullugu. Kissaatigaa nunarsuaq naapertuilluartunik pilluartunillu inoqartuaannassasoq. (Tussiaat 115:16; Jesaja 45:18) Taamaattumik nunarsuaq aserunngisaannassaaq; naassaanngitsumik atassaaq. — Tussiaat 104:5; Nalunaajaasup oqaasii 1:4.

2. Guutip inuk pinngortinngikkallaramiuk nunarsuup ilamininngua paratiisiliaraa alianaatsoq. Edenip Naatsiivianik taavaa. Tassunga angut arnarlu siulliit, Adam Evalu, najugassippai. Taakkua meeqqiorlutik nunarsuaq ulikkaassagaat nunarsuarlu tamaat paratiisinngoriartuaartissagaat Guutip siunertaraa.. — 1 Moses 1:28; 2:8, 15.

Paratiisi maangaannartoq

3. Kisianni Adam Evalu Guutip inatsisaanik piaaralutik unioqqutitsinermikkut ajortuliorput. Taamaattumik Jehovap Edenip Naatsiivianit anisippai. (1 Moses 3:1-6, 23) Jehovalli nunarsuarmut siunertani puiunngilaa. Neriorsuisimavoq paratiisinngortikkumaarlugu inuit naassaanngitsumik inuuffigisinnaasaat. Qanoq iliorluni tamanna piviusunngortissavaa? — Tussiaat 37:29.

4. Nunarsuaq paratii- sinngorsinnaassappat inuit ajortut nungutinneqaqqaartariaqarput. (Tussiaat 37:38) Tamanna pissaaq Harmagedonimi, sorsunnermi Guutip ajortunik tamanik nungutitsiffissaani. Taava Satan ukiuni tuusintini susinnaajunnaarsinneqassaaq. Tamatuma kingunerisaanik inoqarunnaassaaq ajortunik nunarsuarmik aserorterisunik. Guutip kiffai kisimik aniguissapput. — sarĸúmersitat 16:14, 16; 20:1-3.

5. Taava Jesus Kristus ukiuni tuusintini nunarsuarmut kunngitut aqutsissaaq. (sarĸúmersitat 20:6) Taassuma ajorti isumatsinnit timitsinnillu peeriartuaassavaa. Adamip Evallu ajortuliunngikkallaramik issimanerattut inuttut naammalluinnartunngussaagut. Nappaatit, utoqqalisarneq toqulu atuukkunnaassapput. Inuit napparsimasut ajorunnaarsinneqassapput, utoqqalisimagaluartullu inuususseqqissapput. — Job 33:25; Jesaja 33:24; sarĸúmersitat 21:3, 4.

6. Jesusip ukiuni tuusintini naalakkersuinerani inuit aalajaatsut nunarsuaq tamaat paratiisinngortikkiartuaassavaat. (Lúkarse 23:43) Aamma toqusimasut millionilikkuutaat nunarsuarmi inuunermut makitinneqassapput. (apustilit suliait 24:15) Guutip piumasaqaatai malikkunikkik nunarsuarmi naassaanngitsumik inuujuaannarsinnaassapput. Taamaaliunngikkunilli toqussapput naassaanngitsumut suujunnaarsitaassallutik. — Juánase 5:28, 29; sarĸúmersitat 20:11-15.

7. Taamaalilluni Guutip nunarsuarmut aallaqqaammulli siunertaa piviusunngussaaq. Tamanna misigerusussinnaaviuk? Taava Jehova ilinniartuaannartariaqarpat piumasaqaataalu malittuarlugit. Najukkanni Jehovap nalunaajaasuisa naalagaaffilersaartarfianni ataatsimiinnerit taamaaliornissannut iluaqutigissaqaatit. — Jesaja 11:9; Eprîarit 10: 24, 25.

Harmagedonip kingorna nunarsuaq paratiisinngortinneqassaaq

Copyright © 2006 Watch Tower Bible and Tract Society of Pennsylvania. All rights reserved.