Guutip naalagaaffia suua?

1. Jesusip nunarsuarmiikkallarami malitsini Guutip naalagaaffiata tikiunnissaata qinnutiginissaanik ilinniartissimavai. Guutip naalagaaffia tassaavoq naalakkersuineq immikkorluinnaq ittoq, ’naalagaaffittulli’ allatut siuttuusumik kunngilik. Qilammiippoq, nunarsuarmullu aqutsilerumaarluni. Guutip aqqanik illernarsisitsissaaq, Guutillu piumasaata qilammisut nunarsuarmi pinissaa isumagissavaa. — Matîuse 6:9, 10.

2. Guuti neriorsuisimavoq naalagaaffimmini Jesus kunngiujumaartoq. (Lúkarse 1:30-33) Jesusip nunarsuarmiikkallarami takutissimavaa naalakkersuileruni inussiarnersuujumaarluni, naapertuilluartuujumaarluni naammalluinnartuujumaarlunilu. Qilammut uterami ingerlaannaq Guutip naalagaaffiani kunnginngortinneqanngilaq. (Eprîarit 10:12, 13) 1914-imili Jehovap Jesus neriorsuisimanermisut oqartussaassusilerpaa. Taamanimiilli Jesus qilammi kunngitut naalakkersuilerpoq. — Daniel 7:13, 14.

3. Jehova aamma nunarsuarmi angutinik arnanillu aalajaatsunik qilaliartussanik toqqaasimavoq. Taakkua Jesus kunngitut, eqqartuussisutut palasitullu inunnut naalakkersueqatigissavaat. (Lúkarse 22:28-30; sarĸúmersitat 5:9, 10) Guutip naalagaaffiani naalakkersueqataasussat taakku Jesusip ’savarpannguanik’ taasimavai. Taakkua 144.000-iupput. — Lúkarse 12:32; sarĸúmersitat 14:1-3.

4. Jesusip kunnginngorniariarluni Satan inngilipiluilu qilammit anisippai nunarsuullu eqqaanut igillugit. Taamaattuminguna nunarsuarmi pissutsit 1914-imiilli taama ajortunngorsimatigisut. (sarĸúmersitat 12:9, 12) Sorsunnerit, kaannersuit, nappaalanersuit toqoraataasut, inatsisaassuseq annertusiartuinnartoq — tamakkua tamarmik ’nalunaaqummut’, Jesusip aqutsilerneranut aaqqissuussaanerullu matuma ullussaasa kingulliit atuutilersimanerannut, takussutissaasumut ilaapput. — Matîuse 24:3, 7, 8, 12; Lúkarse 21:10, 11; 2 Timûtiuse 3:1-5.

5. Ungasinngitsukkut Jesusip inuit eqqartuutissavai, savanik paarsisup savanik savaasanillu avissaartiterisarneratut iliorluni avissaartitissavai. ’Savat’ tassaapput taassumunnga naalatsigitittut ilumoorfiginnittut. Taakku nunarsuarmi inuunermik naassaanngitsumik akissarsissapput. ’Savaasat’ tassaapput Guutip naalagaaffianik ajattuisut. (Matîuse 25:31-34, 46, NV) Siunissami qanittumi Jesusip inuit savaasatut ittut tamaasa suujunnaarsissavai. (2 Tásalûníkamiut 1:6-9) Jesusip ’savaataanut’ ilaarusukkutta Guutip naalagaaffia pillugu tusarliussamut tusarnaartariaqarpugut tusakkavullu naapertorlugit iliuuseqarluta. — Matîuse 24:14.

Jesusip naalakkersuinerani uumissuineq paqumisunnerlu atuunnavianngillat

6. Ullumikkut nunarsuaq nunarpassuarnut aggugaavoq. Nunat tamarmik immikkut naalakkersuisoqarput. Nunat tamakku imminnut akersuukkajupput. Guutilli naalagaaffia inuit naalakkersuisui tamaasa peerlugit atuutilissaaq. Guutip naalagaaffia kisimi nunarsuarmut tamarmut naalakkersuissaaq. (Daniel 2:44) Taava sorsuttoqartarunnaassaaq, pinerluttoqartarunnaarluni nakuusertoqartarunnaarlunilu. Kikkut tamarmik eqqisseqatigiillutik ataasioqatigiillutillu inooqatigiissapput. — Mika 4:3, 4.

7. Jesusip ukiuni tuusintini naalakkersuinerani inuit aalajaatsut naammalluinnartunngussapput, nunarsuarlu tamarmi paratiisinngussaaq. Ukiut tuusintit qaangiunneranni Guutip iliuusereqqusai tamaasa Jesusip naammassereersimalissavai. Taava Guutip naalagaaffia Ataataminut utertissavaa. (1 Korintumiut 15:24) Ikinngutitit asasatillu tamaasa Guutip naalagaaffiata qanittukkut iliuuseriumaagassaanik oqaluttuussinnaavatit.

Copyright © 2006 Watch Tower Bible and Tract Society of Pennsylvania. All rights reserved.