Ilaqutariittut inuuneq Guutimut nuannaarutaasoq

1. Biibili naapertorlugu uiusoq ilaqutariinni ’niaquuvoq’. (1 Korintumiut 11:3) Angut ataasiinnarmik nuliaqarsinnaatitaavoq. Angut arnarlu inatsisinut naapertuuttumik katissimasariaqarput. — 1 Timûtiuse 3:2; Títuse 3:1.

2. Uiusup nuliani immisut asasariaqarpaa. Jesusip ajoqersukkaminik pissuseqarfiginninneratut pissuseqarfigisariaqarpaa. (Evfisumiut 5:25, 28, 29) Nuliani unatanngisaannassavaa arlaatigulluunniit pinerlinngisaannassallugu. Akerlianilli ataqqinninnermik ersersitsivigisariaqarpaa. — Kulorsamiut 3:19; 1 Pîtruse 3:7.

Ataataasoq asannittoq ilaquttaminik timikkut anersaakkullu isumassuisarpoq

3. Ataataasoq ilaquttani pilersorniarlugit eqiasuilluni sulisariaqarpoq. Nuliani meeqqanilu nerisassatigut, atisassatigut inissaqarnikkullu isumagisariaqarpai. Aamma ilaquttani anersaakkut isumagisussaavai. (1 Timûtiuse 5:8) Guutimik taassumalu siunertaanik ilinniartitsinermi ilaquttaminut siuttuusussaavoq. — 5 Moses 6:4-9; Evfisumiut 6:4.

4. Nuliaasoq uiminut ikiuutaalluartariaqarpoq. (1 Moses 2:18) Meeqqaminnik ajoqersuinermi perorsaanermilu uini tapersersortariaqarpaa. (Ussatit 1:8) Nuliaasup ilaquttaminik asannittumik isumassuinissaa Jehovap naatsorsuutigaa. (Ussatit 31:10, 15, 26, 27; Títuse 2:4, 5) Nuliaasullu uini ataqqingaartariaqarpaa. — Evfisumiut 5:22, 23, 33.

5. Meeqqat angajoqqaaminnut naalannissaat Guutip piumasaraa. (Evfisumiut 6:1-3) Angajoqqaat meeqqaminnik ilitsersuussillutillu perorsaanissaat naatsorsuutigaa. Angajoqqaat meeqqamik ilaginissaannut Biibilimillu atuaqqissaaqatiginissaannut piffissaqartariaqarput, anersaakkut inuttullu pisariaqartitaannik matussutissiisinnaaqqullutik. (5 Moses 11:18, 19; Ussatit 22:6, 15) Angajoqqaat meeqqaminnik peqqarniitsumik misigittaatsumillu naveersinngisaannartariaqarput. — Kulorsamiut 3:21.

Angajoqqaat meeqqaminnik unnersuussillutillu perorsaanissaat Guutip naatsorsuutigaa

6. Aappariit ajornartorsiuteqarunik Biibilimi unnersuussutit malinniartariaqarpaat. Biibilimi kajumissaarneqarpugut asaqatigeeqqulluta isumakkeerfigeqatigiittaqqullutalu. (Kulorsamiut 3:12-14) Ajornartorsiutit angerujussuanngitsut pissutigiinnarlugit aappariit qimannissaat Guutip oqaasiani kajumissaarutigineqanngilaq. Nuliaasorli aalajangersinnaavoq uini qimanniarlugu (1) ilaquttaminik pilersuiumanngilluinnarpat, (2) ima nakuuserfigisartigippani allaat peqqissutsini inuuninilu navianartorsiortillugit, imaluunniit (3) akerlilersuinerujussua pissutigalugu Jehovamik pallorfiginninnissani ajornarluinnarpat. — 1 Korintumiut 7:12, 13.

7. Aappariit ilumoorfigeqatigiittariaqarput. Allasiorneq Guutimut aapparmullu ajortuliorneruvoq. (Eprîarit 13:4) Allasiorneq kristumiup avinnissaanut allamullu kateqqinnissaanut pissutaasinnaasutuaavoq. (Matîuse 19:6-9; Rûmamiut 7:2, 3) Biibilimik tunngaveqanngitsumik avinneq allamullu katinneq Jehovap uumigaa. — Malaki 2:14-16, (NV).

Copyright © 2006 Watch Tower Bible and Tract Society of Pennsylvania. All rights reserved.