Iliuutsit Guutip uumigisai

1. Guutip kiffaasa ajunngitsoq nuannaraat. Aammali ajortup uumiginissaa ilinniartariaqarpaat. (Tussiaat 97:10) Tamanna isumaqarpoq iliuutsinik Guutip uumigisaanik ingalassimannissasut. Iliuutsit tamakku ilaatigut makkuupput:

2. Kanngunartuliorneq: Katissimanani atoqatigiinneq, allasiorneq, uumasunik atoqateqarneq aammalu anguteqammik arnaqammilluunniit atoqateqarneq — tamakku tamarmik Guutimut ingasattumik ajortuliornerupput. (3 Moses 18:6; Rûmamiut 1:26, 27; 1 Korintumiut 6:9, 10) Katissimanatik inooqatigiittut qimattariaqarput imaluunniit inatsisinut naapertuuttumik katittariaqarput. — Eprîarit 13:4.

Imerajussuseq, tillinneq, aningaasanoorneq nakuusernerlu Guutip uumigai

3. Salluneq, aningaasanoorneq tillinnerlu: Jehova Guuti sallusinnaanngilaq. (Títuse 1:2) Inuit taassumannga iluarisaarusuttut sallu ingalassimasariaqarpaat. (Ussatit 6:16-19; Kulorsamiut 3:9, 10) Aningaasanoornerit suulluunniit piumatussutsimut atassuteqarput. Taamaattumik kristumiut aningaasanoornernut qanorluunniit ittunut, soorlu eqquiniarnernut, sukkaniuttunik eqquiniarnernut bingornernullu ilaaneq ajorput. (Evfisumiut 5:3-5) Aammattaaq kristumiut tillinneq ajorput. Tillitanik pisineq ajorput, imaluunniit akuerineqaqqaartinnatik allat piinik tigusineq ajorlutik. — 2 Moses 20:15; Evfisumiut 4:28.

4. Kamajassuseq nakuusernerlu: Kamajassuseq nakuusernermik kinguneqarsinnaasarpoq. (1 Moses 4:5-8) Inuk nakuuserajuttoq Guutimut ikinngutaasinnaanngilaq. (Tussiaat 11:5; Ussatit 22:24, 25) Akiniaaneq imaluunniit ajortumik pineqarnerup ajoqutaanik akisineq eqqunngitsuliorneruvoq. — Ussatit 24:29; Rûmamiut 12:17-21.

5. Angakkuarneq anersaarsiornerlu: Inuit ilaat napparsimasunik ajorunnaarsitsiniarlutik anersaanut saaffiginnittarput. Allat akeqqatik napparsimalersinniarlugit toqunniarlugilluunniit ilisiinniartarpaat. Tamakkununnga tamanut Satan tunuliaqutaavoq. Kristumiut tamakkununnga peqataaqqusaanngillat. (5 Moses 18:9-13) Jehovamut qanimut attaveqarneq allat uagutsinnut ilisiinniutaannut illersuutissaalluarnerpaavoq. — Ussatit 18:10.

6. Imerajussuseq: Viinnisulaarneq, immiaarartulaarneq allanilluunniit imigassartulaarneq kukkunerunngilaq. (Tussiaat 104:15; 1 Timûtiuse 5:23) Aalakoornerli killeqanngitsumillu aalakoornartutorneq Guutip isaani eqqunngitsuliornerupput. (1 Korintumiut 5:11-13; 1 Timûtiuse 3:8) Imerpallaarneq peqqissutsimut ilaqutariinnullu aseruutaasinnaavoq. Aamma ussernartunut allanut qaninnerulersitsisinnaavoq. — Ussatit 23:20, 21, 29-35.

7. Iliuutsinik Guutip ajorisaanik iliortartut ’Guutip naalagaaffia kingornussarissanngilaat’. (Galâsiamiut 5:19-21) Guuti ilumut asagukku taassumalu iluarisaanik iliorusukkuit iliuutsinit tamakkunannga aniguisinnaavutit. (1 Juánase 5:3) Guutip eqqunngitsuuneragaasa uumigilernissaat ilinniaruk. (Rûmamiut 12:9) Inuit Guutimik mianerinnillutik inuusut ilagisakkit. (Ussatit 13:20) Kristumiunik inersimalluartunik peqateqarneq nakussatsissutaasarpoq. (Jâko 5:14) Tamanillu pingaarnermik: Guutimut qinusarit, taassumanngalu ikiorneqarnissat tunaariuk. — Filípimiut 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.