Pathian Cu Ahodah A Si? - Jehovah Hngaltu hna: Watchtower Society Tazavun Web Site

Jehovah Hngaltu hna: Watchtower Society Tazavun Web Site

Beliefs

Future

Pathian Nih Zeidah A Kan Hal?

Cawnnak 2

Pathian Cu Ahodah A Si?
	A hmaanmi Pathian cu ahodah a si i, a min cu zeidah a si? (1, 2)
	Zeibantuk phun pum dah a ngeih? (3)
	A lang bikmi a ziaza hna cu zeidah an si? (4)
	Amah kan biaknak ah milem le hmelchunhnak hna kan hmang lai maw? (5)
	Pathian kong kan hngalh khawhnak lam pahnih cu zeidah an si? (6)

1. Minung nih thil tampi an biak hna. Sihmanhsehlaw Baibal nihcun A HMAANMI Pathian cu pakhat lawng a um tiah a kan chimh. Van le vawlei cung i zeizong vialte hi amah nih a ser hna. Nunnak a kan pek caah amah lawng hi kan biak awk a si.—1 Korin 8:5, 6; Biathlam 4:11.

2. Pathian nih upatnak min tampi a ngei nain a min taktak cu pakhat lawng a ngei. Cu min cu JEHOVAH a si. Baibal cauk tampi ahcun Pathian min cu an hloh cang i upatnak min BAWIPA asiloah PATHIAN tiah an thlen did. Sihmanhsehlaw Baibal ṭial a rak si lio ah khan, Jehovah timi min cu 7,000 hrawng a rak um.—Exodus 3:15; Salm 83:18.

3. Jehovah nih pum pakhat a ngeih, asinain cucu kanmah pum bantuk a si lo. “Pathian cu Thlarau (Spirit) a si,” tiah Baibal nih a ti. (Johan 4:24) Thlarau (Spirit) cu kanmah nunnak nakin let tampi in a sang deuhmi nunnak phun a si. Minung ahohmanh nih Pathian cu an hmu bal lo. Jehovah cu vancung ah a um, sihmanhsehlaw thil vialte a hmuh khawh dih. (Salm 11:4, 5; Johan 1:18) Asiahcun thiangthlarau cu tah zeidah a si kun? Cucu Pathian bantuk in mi pakhat a si ve lo. Cu nak in hi cu Pathian a rian ṭuan ṭhawnnak tu a si.—Salm 104:30.

4. Baibal nih Jehovah a sining kha a langhter. A lang bikmi aziaza hna cu dawtnak, dinnak, fimnak, le ṭhawnnak an si tiah a langhter. (Deuteronomi 32:4; Job 12:13; Isaiah 40:26; 1 Johan 4:8) Baibal nih amah cu zangfahtu, velngeimi, ngaithiamtu, nunsiang, le lungsau a si tiah a kan chimh. Nawlngaimi fale bantuk in, kannih nih amah nawl kha cawn awkah kan i zuam awk a si.—Efesa 5:1, 2.

A sermi le Baibal chungin Pathian kong kan cawn khawh

5. Kan biaknak ah milem, hmanthlak, asiloah hmelchunhnak te hna kha kan kunpiak in an sin ah thla kan cam awk a si lai maw? Si hlah! (Exodus 20:4, 5) Jehovah nih amah lawng kan biak awk a si tiah a chim. A sunparnak kha ahohmanh le zei thil hmanh a hrawm ve hna lailo. Milem nihcun kanmah bawmh awk ṭhawnnak zeihmanh an ngei lo. —Salm 115:4-8; Isaiah 42:8.

6. Pathian kha zeitindah kan hngalh khawh deuh lai? Hngalhnak lam pakhat cu a sermi thil hna zohnak le cu thil hna nih an kan chimhmi kong thukpi in ruahnak thawng in a si. Pathian sermi hna nih amah cu ṭhawnnak le fimnak nganpi a ngei ti kha an kan hmuhsak. A sermi vialte chungah a dawtnak kha kan hmuh khawh. (Salm 19:1-6; Rom 1:20) Pathian kong kan hngalh khawhnak lam dang pakhat cu Baibal cawnnak thawng in a si. Mah chung ahcun zeibantuk Pathian phun dah a si ti kha tam deuh suaomaupi a kan chimh. Mahnihcun a timhnak kong le tuah hna seh ti a kan duhmi hna zong a kan chimh ve.—Amos 3:7; 2 Timote 3:16, 17.

1996 kum ah chuah asi
Copyright © 2006 Watch Tower Bible and Tract Society of Pennsylvania. All rights reserved.