Vawlei Ca i Pathian Timhnak Cu Zeidah A Si?

1. Jehovah nih vawlei cu minung nih a cungah zungzal nung in an i nuamhpi khawh nakhnga caah a rak ser. Vawlei cu a dingmi le aa lawmmi minung nih umnak zungzal hna seh ti a rak duh. (Salm 115:16; Isaiah 45:18) Vawlei cu zeitikhmanhah hrawh a si bal lai lo; zungzal in a hmun lai.—Salm 104:5; Phungchimtu 1:4.

2. Pathian nih minung a rak ser hlanah, vawlei hmun bite pakhat a rak thim i, aa dawh ngaimi paradis pakhat ah a rak tuah. Mah cucu Eden dum tiah a rak ti. Cuka ahcun hmasa bik mipa le minu, Adam le Evi kha a rak chiah hna. Tefa ngeih in vawlei khahter dingah an caah Pathian nih a rak timhpiak hna. Duhsah tein vawlei dihlak kha paradis ah an canter lai.— Genesis 1:28; 2:8, 15.

Paradis sungh asinak

3. Pathian nawlbia hramhram in buarnak thawngin, Adam le Evi cu misual ah an rak cang. Cucaah Jehovah nih annih cu Eden dum in a rak ṭhawl hna. Paradis cu sungh a rak si. (Genesis 3:1-6; 23) Sihmanhsehlaw hi vawlei ca i a timhnak kha cu a philh hlei lo. Minung nih zungzal an umnak dingah, paradis i canter awkah bia aa kam. Mah cucu zeitindah a tuah te lai?—Salm 37:39.

4. Hi vawlei paradis i a can khawh hlanah, miṭhalo cu hrawh dih an si hmasa lai. (Salm 37:38) Cucu ṭhatlonak dihternak ca i Pathian ral dohnak a simi Armagedon ah a tlung te lai. Khi hnu ah Satan cu kum 1,000 chung thong thlak a si lai. Hicu zeibantuk miṭhalo hmanh vawlei hrawk ding ah nganh an si lai lo tinak a si. Pathian miphun pawl lawng an luat lai.—Biathlam 16:14, 16; 20:1-3.

5. Khitikah Jesuh Khrih nih hi vawlei cu kum 1,000 chung a uk lai. (Biathlam 20:6) Kan ruahnak le kan pum chungin sualnak kha duhsah tein a kan lakpiak lai. Adam le Evi an sual hlan i bantuk khan a tlingmi minung ah kan cang lai. Cutik ahcun zawtnak, tarnak, le thihnak a um ti lai lo. Mizaw cu an dam dih lai i, tar cu an no ṭhan dih cang lai.—Job 33:25; Isaiah 33:24; Biathlam 21:3, 4.

6. Jesuh kum Thongkhat Uknak chung ahcun, zumhawktlakmi minung hna nih vawlei dihlak kha paradis i canter awkah rian an ṭuan lai. (Luka 23:43) Mithi nuai tampi zong vawlei cungah minung in nun awkah thawhter ṭhan an lai. (Lamkaltu 24:15) Pathian nih a halmi hna an tuah a si ahcun, vawlei cungah zungzal in an nung ve lai. An tuah lo belte ahcun, zungzal in hrawh an si te lai.—Johan 5:28, 29; Biathlam 20:11-15.

7. Cuticun Pathian hramthawk timhnak cu a tling lai. Cu hmailei thluachuahnak cu hmuh na duh ve maw? Na duh ahcun, Jehovah a kong kha hngalh awkah na cawn i an halmi kha na tuah a herh. Jehovah Hngaltu hna an Kingdom Hall i pumhnak ah na kainak nih cuti na tuah khawh ding ah an bawmh lai.—Isaiah 11:9; Hebru 10:24, 25.

Armageddon dihin, vawlei cu paradis ah acang ṭhan lai

Copyright © 2006 Watch Tower Bible and Tract Society of Pennsylvania. All rights reserved.