Pathian Lung A Tongmi Chungkhar Nunnak

1. Baibal nih va cu a innchungkhar lu a si a ti. (1 Korin 11:3) Pa pakhat nih nupi pakhat lawng a ngeih awk a si. Upadi ning tein a hmaan tein an i ṭhit awk a si fawn.—1 Timote 3:2; Titas 3:1.

2. Pa nih amah aa dawt bantukin a nupi kha a dawt ve lai. Jesuh nih amah zultu pawl a rak tuah hna bantukin khan a nupi cu a tuah ve lai. (Efesa 5:25, 28, 29) A nupi kha a velh awk le ningcang loin a tuah awk a si lo. Cunakin amah kha upatnak le hmaizahnak a langter lai.—Kolose 3:19; 1 Piter 3:7.

Dawtnak a ngeimi pa nih a innchungkhar kha thilpuan lei le thlarau lei in a zohkhenh lai

3. Pa nih a innchungkhar zohkhenh awkah fakpiin rian a ṭuan lai. A nupi le a fale caah rawl, hnipuan, le inn a khanpiak hna lai. Pa pakhat nihcun a chungkhar thlaraulei herhnak zong kha a pek hna awk a si. (1 Timote 5:8) Pathian le a timhnak kong hngalh awk bawmhnak ah amah nih lam a hruai hna lai.—Deuteronomi 6:4-9; Efesa 6:4.

4. Nupi cu a va caah bawmtu ṭha a si lai. (Genesis 2:18) An fale cawnpiaknak le chimhhrinnak ah a va kha a bawmh lai. (Phungthlukbia 1:8) Nupi pakhat cu a chungkhar kha dawtnak in zohkhenh awkah Jehovah nih a hal. (Phungthlukbia 31:10, 15, 26, 27; Titas 2:4, 5) A va zong kha a upat taktak lai.—Efesa 5:22, 23, 33.

5. Pathian nih fale cu an nu le pa nawl ngaih awkah a hal hna. (Efesa 6:1-3) Nu le pa hna cu an fale kha cawnpiak awk le chimhhrin awkah aa ruahchan hna. Nu le pa nih an fale he caan hman in Baibal cawnpiak in an thlaraulei le thinlunglei herhnak kha an zohkhenh hna awk a si. (Deuteronomi 11:18, 19; Phungthlukbia 22:6, 15) Nu le pa hna nih an fale kha zeitikhmanhah zangfahnak ngei lo le awhrang in an chimhhrin hna awk a si lo.—Kolose 3:21.

Pathian nih nu le pa hna cu an fale kha cawnpiak awkah le chimhhrinh awkah aa ruahchan

6. Nu le va hna nih hmunkhat i um ṭi awkah harnak an ngeih ahcun, Baibal ruahnak cheuhnak kha hman awkah an i zuam awk a si. Baibal nih dawtnak langhter awk le ngaihthiam awkah a kan forh. (Kolose 3:12-14) Harnak hmete hna teinak caah ṭhennak cu Pathian nih tha a pe lo. Sihmanhsehlaw a va nih (1) a innchungkhar cawm awk lunghak ngaiin a al, (2) a puarhrang tuk ca i a ngandamnak le a nunnak caah thinphang a si, asiloah (3) a luan tukin a ralchan i Jehovah biak awkah a caah a si khawh lo ding a si ah cun, nupi pakhat nih a va kaltak awk kha aa thim men ko lai.—1 Korin 7:12, 13.

7. Nu le va hna cu pakhat le pakhat cungah zumhawktlakin an um awk a si. Zuanzamnak cu Pathian ralchan le mah innchung ralchan in sualnak a si. (Hebru 13:4) Zuanzamnak hi Khrihfa pakhat nih a innchung mak in innchung dang ngeih khawhnak sullam pakhat lawnglawng a si. (Matthai 19:6-9; Rom 7:2, 3) Minung nih Baibal cherhchan in si loin an innchung an mak hna i midang he an i um ṭhan mikha Jehovah nih a huat.—Malakhi 2:14-16.

Copyright © 2006 Watch Tower Bible and Tract Society of Pennsylvania. All rights reserved.