Pathian Sal Hna Cu An Thian Awk A Si

1. Jehovah Pathian cu a thiang. Amah biatu hna kha—thlaraulei in, ziazalei in, thinlunglei in, le pumsalei in thiang hna seh ti a duh hna. (1 Piter 1:16) Pathian mit hmuh i thiang tein um awkahcun fakpi in zuam a hau. Kannih cu a thiang lomi vawlei ah kan nung. Kanmah nih ṭhatlonak tuah kan duhnak zong doh kan herh ve. Sihmanhsehlaw lung dongin kan ngol awk cu a si hlei lo.

2. Thlaraulei thiannak: Jehovah biak kan duh ahcun, a hmaanlomi biaknak cawnpiaknak le phung kha kan i tlaih peng kho lai lo. A hmaanlomi biaknak incun kan chuak lai i, zeibantuk lam hmanhin kan bawm ti lai lo. (2 Korin 6:14-18; Biathlam 18:4) Pathian kong biatak kha voikhat kan hngalh cang hnu ahcun, a hmaanlomi cawnpiaktu hna nih an kan hlen khawh nakhnga lo kan i ralrin awk a si.—2 Johan 10, 11.

3. Ziazalei Thiannak: Jehovah nih amah biatu vialte cu a hmaanmi Khrihfa bangin nun zungzal awk a duh hna. (1 Piter 2:12) A thli tein kan tuahmi thil hmanh kha a hmuh dih hna. (Hebru 4:13) Nu le pa sualnak le a dang a thianglomi hi vawlei tuah sernak vialte kha kan hrial dih hna lai.—1 Korin 6:9-11.

4. Thinlunglei Thiannak: Kan thinlung kha a thiangmi ruahnak in kan khahter ahcun, kan ziaza zong a thiang kho ve lai. (Filipi 4:8) Sihmanhsehlaw a thianglomi thil he kan um peng a si ahcun, a ṭha lomi tuahsernak a chuahter kho. (Matthai 15:18-20) Kan ruahnak a thurhnomhter khomi nuamhngaihnak kha kan hrial awk a si. Pathian Bia cawnnak thawngin kan thinlung kha a thiangmi ruahnak in kan khahter khawh.

5. Pumsalei Thiannak: Pathian ai awhtu an si caah, Khrihfa hna nih an pum le an thilpuan kha thiang tein an chiah awk a si. Zunput kal hnu ah kan kut kan i ṭawl awk a si i, rawl kan ei hlan le kan tong hlan zongah kan ṭawl hna lai. Ti toihmi zunput nan ngeih lo ahcun zun le ek hna cu vawlei chungah phum awk an si lai. (Deuteronomi 23:12, 13) Pum thiang tein chiahnak nih ngandamnak a chuahter. Khrihfa pakhat a inn cu a chunglei he a lenglei he a thian awk a si. Sang le veng chungah zohchunh awk ṭha in a lang lai.

6. A Thiangmi Holh: Pathian sal hna cu biatak lawng chim zungzal awk a si. Lihbia chimtu hna cu Pathian Pennak chungah an lut lai lo. (Efesa 4:25; Biathlam 21:8) Khrihfa hna cu holh ṭhalo an hmang lo. A thurhnommi capo bia le a thianglomi tuanbia hna zong an ngai lo. A thiangmi an holh ruangah an rianṭuannak ah le sianginn ah le an innpa hna lakah an i thleidang.—Efesa 4:29, 31; 5:3.

Pathian sal hna cu azeipoah ah thian awk a si

Copyright © 2006 Watch Tower Bible and Tract Society of Pennsylvania. All rights reserved.