OMAANDERO WONGAMBURIRO YOPOSYO
YA TUMBUKA!

Ongamburiro yoposyo oyo otjikwatjike? Ove u rikenda nozondjito zotjitandi nḓe tji twa mena rongamburiro? Ovita, outirise netiku ndi tjitwa i imba mbe ri tja ve karera Mukuru vi ku handuza? Omena ratjike tji pe munika ayoo ongamburiro ondji kara pohonga yomaputi omengi?

Ondjo ka i ri mozongamburiro azehe nungwari i ri mongamburiro yoposyo. Jesus Kristus omuyozikwa tjinene wongamburiro wa raisa kutja ongamburiro yoposyo i ruka oviungura ovivi otja ‘omuti omuvi tji u ruka ovihape ovivi.’ (Mateus 7:15-17) Ongamburiro yoposyo i ruka ovihape mbya sana pi?

Ongamburiro yoposyo . . .

OYO I RI ṊIṊIKIZIRA MOVITA NOPOLITIKA: Orutuu Asiaweek maru tja: “Ongondoroka na komeho yAsia ovanane veraru rouvara nokuhina ohoṋi ve ṋiṋikiza oukambure wovandu okutjata kozondando zawo oveni.” Motjimbe tjanao orutuu indwi maru rakiza nai: “Ouye mau munika ayoo mau ka vera oviyoze.” MOvihuro Ovikutasane vyAmerika omunene ohongora wongamburiro watja: “Ove mo sokuzepa ovatirise tji mo vanga okuyandisa onḓepero.” Komurungu wa tja: “Ngave yandekwe avehe mena raMuhona.” Ombeibela munda imbo warwe mai tja: ‘Ingwi ngu ma tja wa suvera Mukuru, nungwari a tondo omukwao, eye omunavizeze.’ (1 Johanes 4:20, sasaneka Etestamente Epe nOmapsalme.) Nandarire Jesus wa tja: “Suvereye ovanavita na eṋe.” (Mateus 5:44) Ove mo ri zemburuka nozongamburiro ngapi ouṋepo wazo mbu kara norupa movita?

I HANDJAURA OMAHONGERO WOPOSYO: Ozongamburiro ozengi ze honga kutja omuinyo poo ombepo orupa rwomundu oruhamunikwa ndu tuurunga onḓiro yorutu orwini. Mokutuurungira momahongero inga otjingi tjozongamburiro nḓa ze punda ouṋepo wazo mo ku veningira ovimariva okukumbira ominyo vyovaṱi. Posi yokutja Ombeibela i honga omahongero warwe. “Ovanamuinyo ve tjiwa kutja mave koka, nungwari ovakoke kave tjiwa otjiṋa.” (Omuzuvarise 9:5) Jesus wa honga kutja ovaṱi mave ka pendurwa pu ma pe raisa kutja katja rira ohepero indu omundu tje na omuinyo mbu ha koka. (Johanes 11:11-25) Ongamburiro yoye i honga kutja omuinyo ka u koka?

I YANDJERA ORUVAKIRO: Ovira vyozongereka momahi omengi vi zeuparisa ouṋepo outunduka vavena noutunduka vasuko mbu ri ounane wozongereka nu vi tuva ozohoromende okuyakura otukupo tjimuna hwi. Nandarire ozongereka nḓe nakaura oruvakiro ze yandjera ozohongora zawo nḓe tjera ounatje okukara ouṋepo komeho. Nungwari Ombeibela mai hongo vi? Oyo oukahu mai tja: ‘Amu riwovisa oveni. Ovandu mbe vakirasana poo mbe rikotamena koomukuru vovisenginina poo mbe katuka otukupo poo mbe nanukirasana mokutjita ouhakohoke, nanga rire ovatunduka vena kamaave kara norupa mouhona waMukuru.’ (1 Ovakorinte 6:9, 10, sasaneka EEP.) Ove mo tjiwa ozongamburiro nḓe ha yandja ombakatwi koruvakiro?

Ozongamburiro nḓe ruka ovihape mbya wora zena oruyaveze ndwa sana pi? Jesus wa rakiza: ‘Omuti auhe ngamwa mbu ha ruku ovihape oviwa u kewa, au yumbwa momuriro.’ (Mateus 7:19) Ii otjinga peri, ongamburiro yoposyo mai kewa nai yandekwa. Nungwari imbi mavi tjitwa ruṋe nu momuano uṋe? Eziriro riri motjirimunikise tjomaprofetero nga tjangwa membo rOmbeibela Omavandururiro omakondwa 17 na 18.

Ongamburiro yoposyo mai yanda vi?

Ri pura ohunga naihi. Omukazendu omukorondu wa kavire kotjipuka otjikuryoma otjitirise. Otjipuka otjikuryoma tji na oviuru hambombari nozonya omurongo. (Omavandururiro 17:1-4) Omukazendu omukorondu u kuramena po uṋe? Eye u nouvara “kombanda jozombara zehi.” Eye we ri zareka ozombanda ozoserarovazu, nu u ri vava ovyomoro omuwa nu wa tumba tjinene. Nu komeho ‘oviwaṋa avihe otjinga vya pukisiwa’ i oundjai we. (Omavandururiro 17:18; 18:12, 13, 23, EEP) Ombeibela mai tu vatere okumuna kutja omukazendu omukorondu ingwi otjira tjongamburiro ouparanga nu ka kuramene po ongamburiro imwe porwayo, nungwari inḓa ozongamburiro azehe nḓe ruka ovihape mbya wora.

Otjipuka otjikuryoma tji tja kavirwa i omukazendu omukorondu tji kuramena po ouhonapare wouye wopolitika.* (Omavandururiro 17:10-13) Ongamburiro yoposyo ondji ri ketambo rotjipuka otjikuryoma tjopolitika ihi, amai kondjo okuveraera kutja va sokutjita tjike na okuvetoororera omuhunga.

Nungwari tjimanga mape tjitwa otjitjitwa otjihimise. “Ozonya nḓa omurongo nḓu wa muna notjipuka mavi tondo omukazendu omukorondu ingwi; ovyo mavi mu yeka oviṋa avihe mbye na vyo navi mu esa mutundu; novyo mavi ri onyama ye navi mu ningiririsa momuriro.” (Omavandururiro 17:16) Nu mondjito ohanduze yatjimanga ouhonapare wouye wopolitika mau wire ongamburiro yoposyo nau i yandeke! Otjitjitwa ihi matji hohiziwa i tjike? Embo rOmbeibela Omavandururiro mari ziri: ‘Mukuru wa ṱunine omitima vyavyo kutja vi tjite avihe otja kombango ye.’ (Omavandururiro 17:17, sasaneka EEP.) Otjingaperi, Mukuru ma eta ongamburiro yoposyo kotjombanguriro tjomberero motjimbe tjovitjitwa oviyaukise avihe mbi ya tjita mena re. Ama tuurungire mousemba ohomonena eye ma ungurisa okatamaneyo vayo opolitika otjotjiungurisiwa tje tjomberero.

Ove wa sokutjita vi indu tji u hina okuvanga okukara norupa momberero yongamburiro yoposyo? “Piteye, tjiwana tjandje! Piteye mu tjo!” Omuhindwa waMukuru otji ma hoko. (Omavandururiro 18:4) Tjiri, nai ooruveze rokutaura okupita mongamburiro yoposyo! Posiyo kutja kupi ku mo taurire? Ka kongwi kwovahenangamburiro orondu oruyaveze rwawo rwa zorera. (2 Ovatesalonika 1:6-9) Ondjamo aiyerike i ri mongamburiro youatjiri. Ongamburiro youatjiri mo i zemburuka vi?

Okuzemburuka ongamburiro youatjiri

Ovihape oviwa viṋe ongamburiro youatjiri mbi ya soku ruka?—Mateus 7:17.

Ongamburiro youatjiri . . .

YA ZIKAMA MORUSUVERO: Overikotemene vouatjiri ‘owo kavouye,’ owo kave na ohaṋi yomuhoko poo yombazu nu ‘va suverasana.’ (Johanes 13:35; 17:16; Oviungura 10:34, 35) Pendje nokuzepasana owo ve ri kamwaha okuyandjera omuinyo wawo kovakwao.—1 Johanes 3:16.

VE ṰAKAMA MEMBO RAMUKURU: Pendje nokuhonga ‘omihingo vyeṋu’ ‘nomahongero, nge ri omaraerero wovandu,’ ongamburiro youatjiri i zikamisa omahongero wayo kEmbo raMukuru, Ombeibela. (Mateus 15:6-9, EEP) Omena ratjike? Omena rokutja “omambo omatjangua aehe ja suvirirua movaraere i Ombepo jaMukuru, nu je noviungura komahongero, komaviuriro, komasorisiro.”—2 Timoteus 3:16, EEP.

I PAMEKA OMAṰUNḒU NOKUTUNDUZA ONDONDO YOKOMBANDA YOMERITJINDIRO: Ongamburiro youatjiri i honga ovarumendu ‘okusuvera ovakazendu vawo otja tjinga ava suvera otutu twawo oveni,’ i vatera ozoserekaze ‘okukuna ondjozikiro kovarumendu vawo,’ nu i honga ovanatje ‘okukara nonḓuviro kovanene vawo.’ (Ovaefese 5:28, 33, sasaneka oNew World Translation; 6:1.) Komeho imba mba pewa ouyara wokuhongora ve sokukara otjihorerwa otjiwa tjomeritjindiro.—1 Timoteus 3:1-10.

Pe na ongamburiro kangamwa ndji yenenisa ozondondo inḓa? Embo Holocaust Politics nda pirindwa mo 2001 mari tja: “Andakuzu otjingi tjovandu ve hupa omuinyo tjimuna Ovahongonone vaJehova tji ve hupa mokukongorera omahongero wawo, omatau wovaJuda katja ve ṱa mOvita Ovitjavari vyOuye. Nu wina otjiṱiro otjindjandja ohamukwao nai ho katja tji tjitwa mouye.”

Otjingaperi momahi 235 Ovahongonone vaJehova kave zuvarisa ozondondo zomeritjindiro wokombanda wOmbeibela porwao uriri—ve ze ungurisa mominyo vyawo. Eṱe matu ku ku kutja u pure umwe wOvahongonone vaJehova me ku vatere okurihonga imbi Mukuru mbye undjira ko kove kokutja ove u rikotamene kuye momuano omuyakurwa. Nai ooruveze okusaruka. Oombo. Omaandero wongamburiro yoposyo ya tumbuka!—Sefanja 2:2, 3.

*  Okumuna omazengururiro wokomeho wotjihungiriro hi twende kembo indi Revelation—Its Grand Climax At Hand! nda pirindwa i yOvahongonone vaJehova.