Ouhona waMukuru Otjikwatjike?

1. Indu tja ri kombanda yehi, Jesus wa honga ovemukongorere okukumbira Ouhona waMukuru. Ouhona owo ohoromende ndji hongorerwa po i ombara. Ouhona waMukuru owo ohoromende ya peke. Oyo ya tuwa meyuru nu mai honapara kombanda yehi. Oyo mai yapura ena raMukuru. Oyo mai tjiti kutja ombango yaMukuru i tjitwe kombanda yehi tjina tji i tjitwa keyuru.—Mateus 6:9, 10.

2. Mukuru wa kwizika kutja Jesus ma rire Ombara yOuhona We. (Lukas 1:30-33) Indu Jesus tja ri kombanda yehi, eye wa zikamisa kutja eye ma rire Omunane womunyaṋutima, omusemba nohomonena. Indu eye tja yaruka keyuru, eye ke na pa urikwa otjOmbara yOuhona waMukuru tjimanga. (Ovaheberi 10:12, 13, EEP) Mo 1914, Jehova wa mbandja Jesus ouhonapare Eye mbwe mu kwizikira. Okuzambo, Jesus wa honapara meyuru otja Ombara ndja urikwa i Jehova.—Daniel 7:13, 14.

3. Jehova wina wa toorora tjiva vovarumendu novakazendu ovaṱakame okuza kehi okuyenda keyuru. Owo mave honapara pu na Jesus otja ozombara, ovapangure novapristeri kombanda yovandu. (Lukas 22:28-30; Omavandururiro 5:9, 10) Jesus wa ruka ovahonapare vapamwe mOuhona we imba “okarupanda okaṱiṱi.” Otjivarero tjawo 144 000.—Lukas 12:32; Omavandururiro 14:1-3.

4. Tjimanga kombunda yokurira Ombara Jesus, wa imbirahi Satana novaengeli ve ovahangundu okuza meyuru okuya kondendera yehi. Omena ranao oviṋa opu vya zokurira ovivi imba kombanda yehi okuza ko 1914. (Omavandururiro 12:9, 12) Ovita, ozondjara, omitjise ounatjitandi mbu ryamenako—avihe imbi orupa ‘rotjisanekero’ tji tji raisa kutja Jesus u honapara nokutja indji ondyero ndji iri momayuva wayo omasenini.—Mateus 24:3, 7, 8, 12; Lukas 21:10, 11; 2 Timoteus 3:1-5.

5. Tjimanga Jesus ma pangura ovandu, eve haṋa tjimuna omurise tje haṋa ozonḓu kozongombo. “Ozonḓu” owomba mbu mave rizikamisa kutja ovakongorere ve ovaṱakame. Owo mave munu omuinyo waaruhe kombanda yehi. “Ozongombo” owomba mba nakaura Ouhona waMukuru. (Mateus 25:31-34, 46) Moruyaveze rwopopezu, Jesus ma yandeke avehe mbe ri tjimuna ozongombo. (2 Ovatesalonika 1:6-9) Ove tji mo vanga okurira imwe ‘yozonḓu’ zaJesus, ove wa sokupuratena kombuze yOuhona notoorere ko ondando ku imbi ove mbi we rihongo.—Mateus 24:14.

Kehi yomahonaparero waJesus, opo kape na okukara rukwao omatondero poo ombangu

6. Ku nai ehi ra haṋewa momahi omengi. Arihe rina ohoromende yaro orini. Oviwaṋa mbi potuingi vi rwisa sana. Nungwari Ouhona waMukuru mau pingene ozohoromende azehe zovandu. Owo mau honaparere ouye auhe otja ohoromende aiyerike. (Daniel 2:44) Okuzambo opo kape na okukara ovita, ozondjito zozondjo nozondjito zotjitandi. Ovandu avehe mave hupu pamwe mohange na moruwano.—Mika 4:3, 4.

7. Mokati kOzombura Eyovi zOmahonaparero waJesus, ovandu ovaṱakame mave rire ozohomonena na indi ehi arihe ma ri rire oparadisa. Komaandero wozombura eyovi, Jesus handje wa tjita avihe Mukuru mbye mu ningira okutjita. Okuzambo eye otji ma yarura Ouhona kuIhe. (1 Ovakorinte 15:24, EEP) Omena ratjike tji u hina okuraera omapanga novasuverwa voye ohunga na imbi Ouhona waMukuru mbi mau tjiti?

Copyright © 2006 Watch Tower Bible and Tract Society of Pennsylvania. All rights reserved.