Ovakarere vaMukuru Va sOkukara Ovakohoke

1. Jehova Mukuru omukohoke nomuyapuke. Eye u undjira ko koverikotamene ve okukara ovakohoke—mombepo, mongaro osemba yomeritjindiro, momeripura, nakorutu. (1 Petrus 1:16) Opo pe kambura ongondjero aihe okukara omukohoke momeho waMukuru. Eṱe tu kara mouye ouhakohoke. Eṱe wina tu na ongondjero ku na omaiririro wetu oveni okutjita ouvi. Nungwari eṱe atu umbu ohama.

2. Oukohoke mOmbepo: Indu eṱe tji matu vanga okukarera Jehova, eṱe katu na okuyenena okukakatera ku kangamwa omahongero poo ozongaro zongamburiro yoposyo. Eṱe twa sokupita mongamburiro yoposyo nu atu he ipe oruvara mu kangamwa omuano. (2 Ovakorinte 6:14-18; Omavandururiro 18:4) Nu indu eṱe tji twe rihongo ouatjiri ohunga naMukuru, eṱe twa sokuṱakamisa kutja atu ha pukisiwa i ovandu mbe honga oviṋa vyoposyo.—2 Johanes 10, 11.

3. Oukohoke mOngaro yOmeritjindiro Omasemba: Jehova u vanga overikotamene ve okuritjinda otja Ovakriste vatjiri oruveze aruhe. (1 Petrus 2:12, EEP) Eye u muna avihe mbi matu tjiti, nandarire mbi matu tjiti mokuhoreka. (Ovaheberi 4:13, EEP) Eṱe twa sokuyepa omararasaneno omahakohoke nozondjito zarwe ozohakohoke zouye mbwi.—1 Ovakorinte 6:9-11, EEP.

4. Oukohoke wOuripura: Indu eṱe tji matu urisa ouripura wetu nomeripura omakohoke, ozondjito zetu maze rire ozongohoke wina. (Ovafilipi 4:8) Nungwari tji twa kara pokuripura oviṋa ovihakohoke ovyo vi tu tjitisa ourunde. (Mateus 15:18-20) Eṱe twa sokuyepa omihingo vyomanyando mbi mavi yenene okuzunḓa ouripura wetu. Eṱe matu yenene okuurisa ouripura wetu nomeripura omakohoke mokukonḓonona Embo raMukuru.

5. Oukohoke kOrutu: Mena rokutja Ovakriste ve kuramena po Mukuru, owo va sokuṱiza otutu twao nozombanda zao ozongohoke. Eṱe twa sokukoha omake wetu indu tji twa zu nokuungurisa okaruwo, nu eṱe twa sokuyekoha ngunda atu hiya rya poo okuungura novikurya. Indu ove tji u hina ondyero osemba yokutwara ondova yokaruwo, ondova yokaruwo i sokusirwa mehi. (Deuteronomium 23:12, 13) Okukara omukohoke korutu ku twara kouveruke ouwa. Ondjuwo yOmukriste ya sokukara ongohoke nohirona pendje namoukoto. Oyo ya sokuzikama momaturiro wapamwe otja otjihorera otjisemba.

6. Omahungiriro Omakohoke: Ovakarere vaMukuru aruhe va sokuhungira ouatjiri. Ovanavizeze kave na ku hita mOuhona waMukuru. (Ovaefese 4:25; Omavandururiro 21:8, EEP) Ovakriste kave ungurisa eraka ehazendu. Owo kave puratene poo kave hungire omiṱuka vyombonḓi poo omahungi omahakohoke. Mena romahungiriro wawo omakohoke owo kave ri otja varwe poviungura poo poskole nomomaturiro wawo.—Ovaefese 4:29, 31; 5:3, EEP.

Ovakarere vaMukuru va sokukara ovakohoke momihingo avihe

Copyright © 2006 Watch Tower Bible and Tract Society of Pennsylvania. All rights reserved.