Ozongamburiro nOtuzo Tu Tu Ha Tjata Ku Mukuru

Mukuru eye kaUtatumumwe

1. Ozongamburiro notuzo atuhe katji tu ri otuvi. Nungwari Mukuru ke ze itavere indu ozo tji za za kozongamburiro zoposyo poo tji ze ri ombirukira nomahongero wOmbeibela.—Mateus 15:6.

2. Outatumumwe: Jehova eye Outatumumwe—ovandu vetatu mu Mukuru umwe? Kako! Jehova, Ihe, eye “Mukuru uatjiri erike.” (Johanes 17:3; Markus 12:29, EEP) Jesus eye Omuna We otjiveri, neye uwa kehi yaMukuru. (1 Ovakorinte 11:3) Ihe eye omunene kombanda yOmuna. (Johanes 14:28) Ombepo ondjapuke kamundu; oyo omasa omaungure waMukuru.—Genesis 1:2; Oviungura 2:18.

Okresmes nOkambo kOnḓiro vya za kozongamburiro zoposyo zanare

Opo kape na epu rokurikotamena kovaṱi poo okuvetira

3. Okresmes nOkambo kOnḓiro: Jesus ke na pa kwatwa mu 25 Tjitarazu. Eye wa kwata ape mu 1 Oseninaṋi, oruveze rombura indu ovarise tjive ṱizira ozonyanda zawo pendje ouṱuku. (Lukas 2:8-12) Jesus ke na paraa Ovakriste okuzemburuka ongwatero ye. Nungwari eye wa raera ovahongewa ve okuzemburuka onḓiro ye. (Lukas 22:19, 20) Okresmes notuzo twayo ovyo vya za kozongamburiro zoposyo zanare. Opo otji pe ri wina kotuzo tOkambo kOnḓiro, tjimuna omaungurisiro womai noupi. Ovakriste ovatenga kaave zemburuka Okresmes poo Okambo kOnḓiro nandarire Ovakriste vatjiri kundino kave tjiti nao.

4. Ozongwatero: Omazemburukiro wongwatero yevari ayeerike nga tamunwa mOmbeibela ya tjitwa i ovandu mbaave he rikotamene kuJehova. (Genesis 40:20-22; Markus 6:21, 22, 24-27) Ovakriste vanare kaave zemburuka ozongwatero. Oruzo rokuzemburuka ozongwatero rwa za kozongamburiro zoposyo zanare. Ovakriste vatjiri ve yandja oviyandjewa nave kara noruveze ronyuṋe pamwe motuveze tware mokati kombura.

5. Ondira yOvaṱi: Ovaṱi kave tjiti otjiṋa poo kave munu otjiṋa. Eṱe kanaa tu yenene okuvevatera nowo kave tu ihamisa. (Epsalme 146:4; Omuzuvarise 9:5, 10) Omuinyo (soul) u ṱa; owo kau hupu kombunda yonḓiro. (Esekiel 18:4) Nungwari ovaengeli ovahangundu, mbe isanewa ozondemone, ve ri tjita ayoo owo ozombepo zovaṱi. Otuzo kangamwa tu tu na omaungurisiro wondira yovaṱi poo omerikotameno kovaṱi oto tu ri navi.—Jesaja 8:19.

6. Otjikroise: Jesus ke na pa ṱira kotjikroise. Eye wa ṱira kotjihenḓe. Embo rOtjingrike nda rundururwa “otjikroise” mOzombeibela ri heya orupa rumwe uriri romuti. Otjisanekero tjotjikroise tja za kozongamburiro zoposyo zanare. Otjikroise kaatji ungurisiwa poo okurikotamenwa i Ovakriste ovatenga. Ku nao, ove mo ripura kutja osemba okuungurisa otjikroise momerikotameno?—Deuteronomium 7:26; 1 Ovakorinte 10:14.

7. Oko maku rire ouzeu okuisa tjiva zozongamburiro notuzo twi. Ovazamumwe nomapanga mave kondjisa okukuzuvisa kutja oharundurura ongamburiro yoye. Nungwari okuyorokisa Mukuru oko okunanḓengu tjinene kombanda yokuyorokisa ovandu.—Omiano 29:25; Mateus 10:36, 37.

Copyright © 2006 Watch Tower Bible and Tract Society of Pennsylvania. All rights reserved.