Ongamburiro Ouatjiri Ove Mo I Munu Vi?

1. Jesus eye wa uta ongamburiro Ongriste imwe. Mena ranao, kundinondi pa sokukara orutu poo otjimbumba tjimwe uriri tjoverikotamene vatjiri vaJehova Mukuru. (Johanes 4:23, 24; Ovaefese 4:4, 5) Ombeibela i honga kutja ovandu ovaṱiṱi uriri ombe ri mondjira okasina ndji yenda komuinyo.—Mateus 7:13, 14.

2. Ombeibela ya hunganeka kutja kombunda yonḓiro yovapostele omahongero yoposyo nomaungurisiro nge he ri yOvakriste maye hiti mombongo yOvakriste kouṱiṱiṱiṱi. Ovandu mave pukisa ovakambure oku ve kongorera pendje nokukongorera Kristus. (Mateus 7:15, 21-23; Oviungura 20:29, 30) Omena ranao eṱe otji tu muna ozongamburiro ozengi ozo nḓe ri tja Ongriste. Ovakriste vatjiri matu ve zemburuka vi?

3. Otjizemburukiro otjinenenene tjOvakriste vapeke otjohi tjokutja owo va suverasana. (Johanes 13:34, 35) Owo kave hongerwe kutja ve ripure kokutja owo ovasemba okukapita ovandu vomihoko vyarwe poo wovivara vyarwe. Nu wina owo kave hongerwe okutonda ovandu womahi yarwe. (Oviungura 10:34, 35, EEP) Mena ranao owo kave kara norupa movita. Ovakriste vatjiri ve tjindasana otjovaṱena.—1 Johanes 4:20, 21.

Ovakriste vatjiri va suverasana, va yozika Ombeibela, nu ve zuvarisa ohunga nOuhona waMukuru

4. Otjizemburukiro tjarwe tjongamburiro yatjiri otjohi tjokutja ouṋepo wawo una ondjozikiro ongoto kOmbeibela. Owo ve i yakura otja Embo raMukuru nu ve kambura mu imbi mbi mari heye. (Johanes 17:17; 2 Timoteus 3:16, 17) Owo ve tjinda Embo raMukuru otja otjiṋa otjinanḓengu tjinene okukapita omeripura wovandu poo otuzo. (Mateus 15:1-3, 7-9) Owo ve kondjisa okuhupa otja kOmbeibela momuinyo wawo weyuva arihe. Mena ranao, owo kave zuvarisa otjiṋa tjimwe nave tjiti tjarwe.—Titus 1:15, 16.

5. Ongamburiro yatjiri wina ya sokuyozika ena raMukuru. (Mateus 6:9) Jesus wa zuvakisa ena raMukuru indi Jehova, ku varwe. Ovakriste vatjiri va sokutjita otjingetjo. (Johanes 17:6, 26; Ovaroma 10:13, 14) Ovandu veṋe momaturiro woye mbe raera varwe ohunga nena raMukuru?

6. Ovakriste vatjiri va sokuzuvarisa ohunga nOuhona waMukuru. Jesus otja tjita. Eye aruhe a hungire ohunga nOuhona. (Lukas 8:1) Eye wa ronga ovahongewa ve okuzuvarisa ombuze otjingeyo mouye auhe. (Mateus 24:14; 28:19, 20) Ovakriste vatjiri ve kambura kutja Ouhona waMukuru auyerike ombu mau eta ohange yatjiri nondjeverero kouye mbwi.—Epsalme 146:3-5.

7. Ovahongewa vaJesus kave sokurira orupa rouye mbwi ouhangundu. (Johanes 17:16) Owo kave kara norupa movitjitwa vyopolotika vyouye nomapambaukiro womerikutiro wakumwe. Owo ve yepa ovitjitwa ovihihamise, omaungurisiro novikaro mbi ri omuhamure mouye. (Jakobus 1:27; 4:4) Ove mo yenene okuzemburuka otjimbumba tjongamburiro tji tjina ovizemburukiro imbi vyOukriste watjiri momaturiro woye?

Copyright © 2006 Watch Tower Bible and Tract Society of Pennsylvania. All rights reserved.