Mga Saksi ni Jehova—Sin-o Sila? Ano ang Ila Ginapatihan?

Ano ang Ila Ginapatihan?

ANG mga Saksi ni Jehova nagapati sa Labing Gamhanan nga Dios, si Jehova, ang Manunuga sang langit kag duta. Ang pagluntad mismo sang masibod sing desinyo nga mga kalatingalahan sa uniberso sa palibot naton nagapamatuod nga ang isa ka labing intelihente kag gamhanan nga Manunuga naghimo sini tanan. Subong nga ang mga binuhatan sang mga lalaki kag mga babayi nagapakita kon ano ang ila mga kinaiya, amo man kay Jehova nga Dios. Ang Biblia nagasugid sa aton nga “ang iya di-makita nga mga kinaiya maathag nga makita kutob sang gintuga ang kalibutan, bangod mahantop ini paagi sa mga butang nga ginhimo.” Subong man, sing walay tingog ukon mga pulong, “ang mga langit nagapahayag sang himaya sang Dios.”—Roma 1:20; Salmo 19:1-4.

ANG DUTA . . . gintuga ni Jehova . . . ginaatipan sang tawo . . . ginapuy-an sing dayon

Ang mga tawo wala nagadihon sing mga kulon ukon nagahimo sing mga telebisyon kag mga kompyuter nga wala sing katuyuan. Mas makatilingala ang duta kag ang mga tanom kag mga sapat nga gintuga sa sini. Indi gid naton mahangpan ang pagkahuman sa lawas sang tawo upod ang mga trilyon nga kadamuon sang mga selula sini—bisan gani ang utok nga nagapahunahuna sa aton makatilingala gid! Kon ang mga tawo may katuyuan sa paghimo sang ila diutay lamang nga mga imbension, pat-od nga may katuyuan si Jehova nga Dios sa iya dalayawon nga mga tinuga! Ang Hulubaton 16:4 nagasiling nga may katuyuan sia: “Ang tanan nga butang ginhimo ni Jehova para sa iya katuyuan.”

Ginhimo ni Jehova ang duta para sa isa ka katuyuan, subong sang ginsiling niya sa unang mag-asawa: “Magmabungahon kamo kag magbuad kag pun-a ninyo ang duta . . . , magpakaagalon kamo sa kaisdaan sang dagat kag sa nagalupad nga mga tinuga sang langit kag sa tagsa ka buhi nga tinuga nga nagagiho sa duta.” (Genesis 1:28) Bangod naglalis sila, wala mapuno sining mag-asawa ang duta sing matarong nga mga pamilya nga magaatipan sing mahigugmaon sa duta kag sa mga tanom kag mga sapat sa sini. Apang indi mapaslawan ang katuyuan ni Jehova bangod sang ila kapaslawan. Mga linibo ka tuig sang ulihi, ginsulat ini: ‘Ang Dios, ang Manughuman sang duta . . . , wala magtuga sini sa walay pulos.’ ‘Ginhuman niya ini agod puy-an.’ Indi ini paglaglagon, kundi “ang duta nagapabilin sing dayon.” (Isaias 45:18; Manugwali 1:4, The New English Bible) Ang katuyuan ni Jehova para sa duta matuman: “Ang akon tinutuyo magapadayon, kag ang tanan nga ginakahamut-an ko himuon ko.”—Isaias 46:10.

Busa, nagapati ang mga Saksi ni Jehova nga ang duta magapabilin sing dayon kag ang tanan nga tawo, buhi kag patay, nga magaugyon sa katuyuan ni Jehova para sa isa ka napatahom, napuy-an nga duta mahimo mabuhi sa sini sing dayon. Ang tanan nga tawo nakapanubli sing di-kahimpitan gikan kay Adan kag kay Eva kag, busa, mga makasasala. (Roma 5:12) Ang Biblia nagasugid sa aton: “Ang bayad nga ginabayad sa sala amo ang kamatayon.” “Ang mga buhi nakahibalo nga mapatay sila; apang nahanungod sa mga patay, wala sila makahibalo sing bisan ano.” “Ang kalag nga nagapakasala—ini mismo mapatay.” (Roma 6:23; Manugwali 9:5; Ezequiel 18:4, 20) Kon amo paano sila mabuhi liwat agod mag-ambit sa mga pagpakamaayo sa duta? Paagi lamang sa halad nga gawad ni Cristo Jesus, kay sia nagsiling: “Ako ang pagkabanhaw kag ang kabuhi. Sia nga nagapakita sing pagtuo sa akon, bisan mapatay pa sia, magakabuhi.” “Ang tanan nga yara sa handumanan nga lulubngan makabati sang iya tingog kag magaguwa.”—Juan 5:28, 29; 11:25; Mateo 20:28.

Paano ini mahanabo? Ginapaathag ini sa “maayong balita sang ginharian,” nga ginsugdan ni Jesus nga ibantala sang yari pa sia sa duta. (Mateo 4:17-23) Apang ginabantala karon sang mga Saksi ni Jehova ang maayong balita sa tuman ka pinasahi nga paagi.

ANG GINAPATIHAN SANG MGA SAKSI NI JEHOVA

Copyright © 2006 Watch Tower Bible and Tract Society of Pennsylvania. All rights reserved.