Sapa Jesus Kristus?

1. Jesus diau di serega nyadi orang roh apin iya datai ka dunya. Iya keterubah utai ditempa Petara, nya alai iya dikumbai Anak “tuai” Petara. (Kolosi 1:15; Pemandang 3:14) Jesus nya semina Anak ditempa Petara kadiri. Jehovah ngena Jesus apin iya nyadi mensia ka “tukang” dalam nempa semua utai bukai dalam serega enggau di dunya. (Jako Dalam 8:22-31; Kolosi 1:16, 17) Petara mega ngena iya nyadi tuai pengari jako Iya. Nya kebuah Jesus dikumbai “Jako.”—John 1:1-3; Pemandang 19:13.

2. Petara nganjong Anak Iya ka dunya ngidar pengidup iya ngagai kandong Maria. Nya alai Jesus nadai bapai ka mensia. Nya kebuah iya enda ngembuan sebarang dosa tauka penimpang. Tiga kebuah Petara nganjong Jesus ka dunya: (1) Deka ngajar kitai pemendar pasal Petara (John 18:37), (2) deka megai penalok ti betul, nyendia ka teladan tau dititih kitai (1 Peter 2:21), enggau (3) deka genselan nyawa iya kena ngelepas ka kitai ari dosa enggau pemati. Nama kebuah tu diguna?—Matthew 20:28.

3. Enda ngasi ka asoh Petara, mensia keterubah, Adam, ngereja ti dikumbai Bup Kudus “dosa.” Nya alai Petara ngukum iya mati. (Pemungkal 3:17-19) Iya nadai agi nyentok ba tangga sukat Petara, nya alai iya enda agi sempurna. Belubah iya mansang tuai lalu mati. Adam mai dosa ngagai semua anak iya. Nya kebuah kitai mega mansang tuai, sakit, enggau mati. Baka ni mensia diidup?—Rome 3:23; 5:12.

4. Jesus nya mensia ti sempurna baka Adam. Enda baka Adam, Jesus ckukup bendar ngasi ka Petara indah kena penguji ti pemadu besai. Nya alai iya tau genselan nyawa mensia iya ti sempurna kena mayar dosa Adam. Tu meh ko Bup Kudus nyadi “tebus.” Nya alai anak Adam tau dileka ari sumpah mati. Semua ti manggai ka pengarap sida ba Jesus dosa sida tau diampun lalu nerima pengidup ti meruan.—1 Timoti 2:5, 6; John 3:16; Rome 5:18, 19.

Pengawa Jesus nyengkaum ngajar, ngereja pengawa ajih, enggau indah ka meri nyawa iya ka kitai

5. Leboh di dunya Jesus ngerai ka sida ti sakit, meri orang lapar makai, enggau nedoh ka kabut. Iya indah ka ngangkat ka orang ti mati. Nama kebuah iya ngereja pengawa ajih? (1) Iya sinu ka orang ti merinsa, lalu iya deka nulong sida. (2) Kereja ajih iya nerang ka iya Anak Petara. (3) Sida nya nunjok ka nama deka dikereja iya ka mensia ti ngasi leboh iya merintah nyadi Raja atas dunya.—Matthew 14:14; Mark 2:10-12; John 5:28, 29.

6. Jesus mati lalu diangkat idup baru olih Petara nyadi orang roh, lalu iya pulai ka serega. (1 Peter 3:18) Kenyau ari nya, Petara ngaga iya nyadi Raja. Enda lama agi Jesus deka muai semua penyai enggau pemerinsa ari dunya tu.—Masmor 37:9-11; Jako Dalam 2:21, 22.

Copyright © 2006 Watch Tower Bible and Tract Society of Pennsylvania. All rights reserved.