Sapa Antu?

1. Reti jako “antu” nya orang ti madah bula pasal orang bukai. Reti “Sitan” nya munsoh tauka penyakal. Tu gelar diberi ngagai tuai munsoh Petara. Terubah, iya melikat ti sempurna enggau Petara dalam serega. Tang, kelama iya bepikir lebih ka diri empu lalu deka ka sembah ti patut enggi Petara.—Matthew 4:8-10.

2. Melikat tu, Sitan, bejako ngena ular ngagai Hawa. Bebula ka iya, iya ulih ngasoh Hawa enda ngasi ka Petara. Sitan ngenglanggar iya ti dikumbai “kuasa merintah Petara,” tauka penudok ti Pemadu Tinggi. Sitan nanya sekali ka Petara merintah enggau jalai ti patut enggau ka penguntong rayat Iya. Sitan mega mansut ka tanya sekali ka bisi enda mensia mengkang talok ka Petara. Ari ngereja tu, Sitan ngaga diri empu nyadi munsoh Petara. Nya kebuah iya dikumbai Antu Sitan.—Pemungkal 3:1-5; Jop 1:8-11; Pemandang 12:9.

3. Sitan nguji ngakal orang nyembah iya. (2 Korint 11:3, 14) Siti jalai iya ngelimpang ka orang nya ngena pengarap ti bula. Enti pengarap nya ngajar bula pasal Petara, nya endang ngereja peneka Sitan. (John 8:44) Orang ti raban pengarap ti bula arap bendar ka sida nyembah Petara ti bendar. Tang sida endang betuai ka Sitan. Iya ‘petara dunya tu.’—2 Korint 4:4, NW.

Pengarap ti bula, pengawa bemanang, enggau pengerindu ka menoa ngelimpang ka orang

4. Pengawa Bemanang nya siti jalai bukai Sitan mai orang di baroh kuasa iya. Sida manggil roh nyaga sida, ngemedis orang bukai, nenong jemah ila, tauka ngereja pengawa ajih. Sitan nya kuasa ti jai di belakang semua pengawa tu. Kena ngeyamai ka ati Petara, kitai mesti nadai kaul enggau pengawa bemanang.—Ulang Adat 18:10-12; Kereja Rasul 19:18, 19.

5. Sitan mega ngelimpang ka orang ngena pemalat penyumbong bansa enggau sembah gerempong politik. Sekeda ngasai ka menoa tauka bansa sida manah agi ari bansa bukai. Tang tu enda bendar. (Kereja Rasul 10:34, 35) Orang bukai ngiga gerempong politik kena mutar ka penusah mensia. Ngereja baka tu, sida nulak Perintah Petara. Semina nya aja ulih mutar ka penusah kitai.—Daniel 2:44.

Laban Sitan lalu nyambong belajar pasal Jehovah

6. Siti agi jalai Sitan ngelimpang ka orang nya nguji sida enggau pengingin ti bedosa. Jehovah madah ka kitai nyeliah ari pengawa ti bedosa laban iya nemu sida tau ngemedis kitai. (Galatia 6:7, 8) Sekeda orang deka mai nuan masuk enggau sida dalam pengawa ti baka nya. Ingat, nya endang Sitan ti ngasoh nuan ngereja utai tu.—1 Korint 6:9, 10; 15:33.

7. Sitan tau ngena pemerinsa tauka penyakal kena mai nuan ninggal ka Jehovah. Sekeda orang ti dikerindu ka nuan tau nyangka ringat bendar laban nuan belajar ka Bup Kudus. Sida bukai beduan nuan. Tang ba sapa nuan berutang nyawa? Sitan deka ngenakut ka nuan awak ka nuan ngetu belajar pasal Jehovah. Anang ngasoh Sitan menang! (Matthew 10:34-39; 1 Peter 5:8, 9) Ari ngelaban Antu, nuan ulih ngasoh Jehovah lantang lalu nunjok ka nuan nyukong kuasa merintah Iya.—Jako Dalam 27:11.

Copyright © 2006 Watch Tower Bible and Tract Society of Pennsylvania. All rights reserved.